របាយការណ៍ស្រាវជ្រាវសន្និដ្ឋានថា រវាង២០ឆ្នាំចុងក្រោយ ភ្លើងឆេះព្រៃបានកើនឡើងទ្វេដង
គិតចាប់ពីឆ្នាំ២០០១មក អគ្គីភ័យបានលេបត្របាក់ព្រៃឈើ ក្នុងទំហំមួយគុណជាពីរ នៅទូទាំងពិភពលោក។ នេះបើយោងតាមរបាយការណ៍ថ្មីមួយ របស់អង្គការឃ្លាំមើលព្រៃឈើ សហការជាមួយសកលវិទ្យាល័យ Maryland។ បើតាមអ្នកជំនាញ បម្រែបម្រួលអាកាសធាតុ ដែលបង្កឲ្យមាន គ្រោះរាំងស្ងួត និងសីតុណ្ហភាពកាន់តែក្តៅខ្លាំង គឺជាមូលហេតុចំបងមួយ ដែលធ្វើឲ្យមានភ្លើងឆេះព្រៃកាន់តែច្រើន។
ចុះផ្សាយនៅថ្ងៃ៖
ស្តាប់ - ០២:៣១
យោងតាមរបាយការណ៍ថ្មី វិភាគដោយអង្គការ Global Forest Watch (GFW) សហការជាមួយ World Ressources Institute (WRI) និងសកលវិទ្យាល័យ Maryland គឺរាប់ចាប់ពីឆ្នាំ២០០១មក ពីមួយឆ្នាំទៅមួយឆ្នាំ ព្រះអគ្គីបានលេបត្របាក់ព្រៃឈើ ចំនួន៣លានហិកតាជាមធ្យម លើសឆ្នាំមុនៗ។
៧០%នៃព្រៃឈើ ដែលត្រូវភ្លើងឆាបឆេះ គឺសុទ្ធតែជាព្រៃបូរ៉េអាល់ ពោលគឺជាព្រៃដែលស្ថិតនៅ តំបន់ប៉ូលខាងជើងនៃផែនដី ដែលមានភាគច្រើននៅរុស្ស៊ី កាណាដា និងរដ្ឋអាឡាស្កា សហរដ្ឋអាមេរិក។ នៅរុស្ស៊ី ក្នុងរវាង២០ឆ្នាំចុងក្រោយនេះ ព្រៃឈើបូរ៉េអាល់ ចំនួន៥៣លានហិកតា ពោលគឺស្មើនឹងផ្ទៃក្រឡាប្រទេសបារាំងទាំងមូល ត្រូវបានអគ្គីភ័យឆាបឆេះ។
ក្នុងចំណោមមូលហេតុដែលធ្វើឲ្យបាត់បង់ព្រៃឈើ ដែលមានដូចជាការកាប់បំផ្លាញ ឬក៏គ្រោះមហន្តរាយធម្មជាតិ ទឹកជំនន់ ខ្យល់ព្យុះជាដើម អគ្គីភ័យគឺជាអ្នកធ្វើឲ្យបាត់បង់ព្រៃឈើ ចំនួន១ភាគ៤។ អ្នកជំនាញបានសន្និដ្ឋានថា កត្តាបម្រែបម្រួលអាកាសធាតុ អាចប្រហែលមូលហេតុចំបងមួយ ដែលធ្វើឲ្យភ្លើងឆេះព្រៃមានការកើនឡើងបែបនេះ។ អាកាសធាតុប្រែប្រួល ធ្វើឲ្យមានគ្រោះរាំងស្ងួត មានរលកកំដៅកាន់តែញឹកញាប់ ហើយធ្វើដីព្រៃស្ងួតខ្សោះ គ្មានសំណើម ងាយនឹងឆាបឆេះបំផុត។
ជាងនេះទៀត ភ្លើងឆេះព្រៃនៅតំបន់ប៉ូលខាងជើង គឺជាគ្រោះថ្នាក់ធំ រុញច្រានឲ្យផែនដីកាន់តែឡើងកំដៅខ្លាំងឡើងថែមទៀត។ លោក James McCarthy អ្នកវិភាគនៅ Global Forest Watch បានពន្យល់ថា នៅក្នុងដីព្រៃបូរ៉េអាល់ គឺមានផ្ទុកទៅដោយឧស្ម័នកាបូនិក ជាច្រើនសន្ធឹកសន្ធាប់ ដែលត្រូវគ្របជិតពីលើ ដោយស្រទាប់ដីសើម។ តែនៅពេលព្រៃឈើទាំងនេះ ត្រូវភ្លើងឆាបឆេះ គេវានឹងរំដោះបញ្ចេញឧស្ម័នកាបូនិកទៅក្នុងបរិយាកាស ធ្វើឲ្យស្រទាប់ឧស្ម័នផ្ទះកញ្ចក់ នៅជុំវិញផែនដីកាន់តែមានកម្រាស់ក្រាស់។
យោងតាមអ្នកជំនាញ នៅក្នុងល្បឿននៃការហិនហោចដោយសារភ្លើងឆេះព្រៃនេះ គឺតំបន់ព្រៃបូរ៉េអាល់ នៅប៉ូលខាងជើង អាចនឹងបាត់បង់ តួនាទីជារណ្តៅកប់ស្តុកទុកនូវឧស្ម័នកាបូនិក ដ៏សំខាន់មួយរបស់ផែនដីយើង។ អង្គការអភិរក្សព្រៃឈើ បានអំពាវនាវ ឲ្យរដ្ឋាភិបាលទាំងអស់ ត្រូវផ្តោតការយកចិត្តទុកដាក់ជាអាទិភាព ក្នុងការស្តារពង្រឹងកម្លាំងរបស់ព្រៃឈើ ឲ្យអាចទប់ទល់ជាមួយអគ្គីភ័យបាន ព្រោះថាព្រៃឈើដើរតួនាទីសំខាន់ណាស់ នៅក្នុងយុទ្ធនាការប្រយុទ្ធប្រឆាំងនឹងការកើនឡើងនូវកំដៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ