រុស្ស៊ីនិងអ៊ីរ៉ង់ពង្រឹងកិច្ចសហប្រតិបត្តិការលើវិស័យប្រេងនិងឧស្ម័ន
ជាប់ទណ្ឌកម្មសេដ្ឋកិច្ចរបស់ក្រុមបសិ្ចមលោកដូចគ្នា រុស្ស៊ីនិងអ៊ីរ៉ង់ បានប្តេជ្ញាពង្រឹងពង្រីកកិច្ចសហប្រតិបត្តិការទ្វេភាគី សម្រាប់អនាគតដ៏វែងឆ្ងាយ លើវិស័យប្រេងនិងឧស្ម័ន។ នេះ បើតាមការគូសបញ្ជាក់របស់ក្រុងតេហេរ៉ង់ ក្នុងឱកាសទទួលស្វាគមន៍លោកប្រធានាធិបតីរុស្ស៊ីពូទីន។
ចុះផ្សាយនៅថ្ងៃ៖
ស្តាប់ - ០១:៥៧
ជាផ្លូវការ លោកពូទីន ប្រធានាធិបតីរុស្ស៊ីអញ្ជើញទៅប្រទេសអ៊ីរ៉ង់ក្នុងក្របខ័ណ្ឌនៃជំនួបកំពូលត្រីភាគី អ៊ីរ៉ង់ រុស្ស៊ីនិងតួកគី ប៉ុន្តែជំនួបត្រីភាគីជាឱកាសរឹតចំណងទំនាក់ទំនងទ្វេភាគីរុស្ស៊ីនិងអ៊ីរ៉ង់ យ៉ាងច្បាស់ក្រលែត។ ប្រធានាធិបតីរុស្ស៊ី និងអគ្គមគ្គុទេសក៍កំពូលអ៊ីរ៉ង់ អាយ៉ះតូឡា អាលី ខាមេណី បានបញ្ជាក់រួមគ្នា អំពីភាពចាំបាច់នៃការពង្រឹងកិច្ចសហប្រតិបត្តិការសេដ្ឋកិច្ចនិងយោធាទ្វេភាគី សម្រាប់អនាគតដ៏យូរអង្វែង និងដែលប្រទេសទាំងពីរអាចទាញប្រយោជន៍បាន។
ជាលទ្ធផល មូស្គូនិងតេហេរ៉ង់ បានពង្រឹងទំនាក់ទំនងយោធា ព្រោះរុស្ស៊ីបានសម្រេចទិញដ្រូនប្រយុទ្ធរបស់អ៊ីរ៉ង់។ ក្នុងផ្នែកសេដ្ឋកិច្ច រុស្ស៊ីនិងអ៊ីរ៉ង់បានចុះហត្ថលេខាលើកិច្ចព្រមព្រៀងជាគោលការណ៍ តម្លៃ៤០ពាន់លានដុល្លារ ធ្វើវិនិយោគរុស្ស៊ីនៅអ៊ីរ៉ងលើវិស័យប្រេងនិងឧស្ម័ន។ នេះបើតាមសេចក្តីថ្លែងការណ៍របស់អគ្គមគ្គុទេសក៍អ៊ីរ៉ង់ អាយ៉ះតូឡា អាលី ខាមេណី។
បានពង្រឹងការវិនិយោគប្រេងនិងឧស្ម័ននៅអ៊ីរ៉ង់ លោកពូទីន បានឆ្លៀតបកស្រាយរឿងក្រុមហ៊ុនប្រេងរុស្ស៊ី Gazprom កាត់បន្ថយជាគំហុកការផ្គត់ផ្គង់ហ្កាសដល់អឺរ៉ុបចំនួន៦០% ក្រោមហេតុផលថាមានបញ្ហាបន្ទាន់ ខ្វះគ្រឿងបន្លាស់។ បើតាមលោកពូទីន Gazprom កំពុងរង់ចាំគ្រឿងបន្លាស់មកពីកាណាដា។ ក្រុមហ៊ុនបាននិងកំពុងបំពេញ ហើយនឹងបំពេញកាតព្វកិច្ចរបស់ខ្លួន ទៅឱ្យអតិថិជន។ ក្រុមហ៊ុនត្រៀមតែបូមឧស្ម័នដើម្បីឆ្លើយតបទៅនឹងសេចក្តីត្រូវការដ៏ចាំបាច់ទេ ប៉ុន្តែក្រុមបស្ចិមលោកជួបការលំបាក មកពីពួកគេដាក់ទណ្ឌកម្មប្រឆាំងនឹងរុស្ស៊ី និងបិទបណ្តាញផ្គត់ផ្គង់ប្រេងឥន្ធនៈ។ នេះជាការអះអាងរបស់លោកពូទីន ពីទីក្រុងតេហេរ៉ង់។
លោកពូទីន បានជំរុញឱ្យបស្ចិមលោកលើកបម្រាមបង្ឃាំងផលិតផលកសិកម្មនិងជីររុស្ស៊ី នៅលើទីផ្សារពិភពលោកចេញទាំងអស់ ទើបព្រមសម្រួលការនាំចេញធញ្ញជាតិអ៊ុយក្រែន។
ជាចុងក្រោយជំនួបត្រីភាគីនៅអ៊ីរ៉ង់ ក៏បានបង្ខិតរុស្ស៊ីនិងតួកគីឱ្យចូលកាន់តែកៀកគ្នាដែរ។ ទោះបីនៅមានការខ្វែងគំនិតគ្នាច្រើនមែន តែលោកពូទីន យល់ថាជំនួបត្រីភាគីមានប្រយោជន៍ និងមានលក្ខណៈស្ថាបនា ដែលត្រូវបន្តមានជំនួបទម្រង់នេះ និងបានអញ្ជើញដៃគូត្រីភាគីទៅជួបជុំគ្នាទៀត នៅដំណាច់ឆ្នាំ នៅមូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ