លោកពូទីនឯកភាពឲ្យបញ្ជូនអ្នកសង្កេតការណ៍អន្តរជាតិទៅមជ្ឈមណ្ឌលនុយក្លេអ៊ែរហ្សាប៉ូរីចា
ប្រឈមនឹងក្តីបារម្ភ អំពីគ្រោះថ្នាក់នុយក្លេអ៊ែរ លោកប្រធានាធិបតីរុស្ស៊ី វ៉្លាឌីមៀរ ពូទីន បានឯកភាពឲ្យទីភ្នាក់ងារថាមពលបរមាណូអន្តរជាតិបញ្ជូនអ្នកសង្កេតការណ៍ ទៅកាន់មជ្ឈមណ្ឌលនុយក្លេអ៊ែរហ្សាប៉ូរីចា។ ក្នុងពេលជាមួយគ្នា លោកអគ្គលេខាធិការអង្គការសហប្រជាជាតិបានទាមទារដោយទទូច កុំឲ្យរុស្ស៊ីកាត់ផ្តាច់មជ្ឈមណ្ឌលនុយក្លេអ៊ែរហ្សាប៉ូរីចានេះ ពីបណ្តាញផ្គត់ផ្គង់អគ្គិសនីរបស់អ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២១
ការព្រមព្រៀងទទួលឲ្យអ្នកសង្កេតការណ៍អន្តរជាតិចូលទៅត្រួតពិនិត្យមជ្ឈមណ្ឌលនុយក្លេអ៊ែរហ្សាប៉ូរីចា ត្រូវបានធ្វើឡើង នៅក្នុងអំឡុងកិច្ចសន្ទនាតាមទូរសព្ទ រវាងលោកប្រធានាធិបតីពូទីន និងលោកប្រធានាធិបតីបារាំង អេម៉ានុយអែល ម៉ាក្រុង កាលពីល្ងាចថ្ងៃសុក្រ។
យោងតាមវិមានក្រឹមឡាំង កិច្ចសន្ទនាតាមទូរសព្ទនេះត្រូវបានធ្វើឡើង តាមសំណើរបស់លោកម៉ាក្រុង។ លោកម៉ាក្រុង ដែលកន្លងមកធ្លាប់ទទួលរងនូវការរិះគន់ ជុំវិញការរក្សាការប្រាស្រ័យទាក់ទងជាមួយលោកពូទីន ក្នុងអំឡុងពេលដែលកងទ័ពរុស្ស៊ីកំពុងឈ្លានពានអ៊ុយក្រែននោះ បានផ្អាកការទាក់ទងជាមួយលោកពូទីនចាប់តាំងពីចុងខែឧសភាមកម៉្លេះ។ វិមានអេលីបានពន្យល់ថា ការណ៍ដែលលោកម៉ាក្រុងទូរសព្ទទៅលោកពូទីនវិញ នៅពេលនេះ គឺដោយសារតែស្ថិតក្នុងស្ថានភាពចាំបាច់ ដើម្បីព្យាយាមរកដំណោះស្រាយរក្សាសុវត្ថិភាពនុយក្លេអ៊ែរនៅហ្សាប៉ូរីចា ដែលអាចជាការគំរាមកំហែងទៅដល់តំបន់អឺរ៉ុបទាំងមូល។
នៅក្នុងកិច្ចសន្ទនាតាមទូរសព្ទនេះ លោកពូទីន ក្រៅពីបានសុខចិត្តទទួលឲ្យអ្នកសង្កេតការណ៍របស់ទីភ្នាក់ងារថាមពលបរមាណូអន្តរជាតិ (AIEA) ធ្វើដំណើរទៅហ្សាប៉ូរីចា ក៏បានព្រមព្រៀងផងដែរ ឲ្យអ្នកសង្កេតការណ៍អន្តរជាតិនេះអាចធ្វើដំណើរដោយឆ្លងកាត់ពីខាងអ៊ុយក្រែន ដែលជាការបន្ធូរបន្ថយលក្ខខណ្ឌពីមុន ដែលទាមទារឲ្យអ្នកសង្កេតការណ៍ធ្វើដំណើរទៅរុស្ស៊ីជាមុន មុននឹងឆ្លងកាត់ព្រំដែនចូលទៅហ្សាប៉ូរីចា។
នៅក្នុងសេចក្តីប្រកាសព័ត៌មាន ចេញផ្សាយនៅយប់ថ្ងៃសុក្រ ប្រមុខដឹកនាំទីភ្នាក់ងារថាមពលបរមាណូអន្តរជាតិបានសម្តែងនូវការអបអរសាទរចំពោះអ្វីដែលបានព្រមព្រៀងគ្នា រវាងលោកពូទីន និងលោកម៉ាក្រុង ហើយថា លោកនឹងចេញមុខដោយផ្ទាល់ ដឹកនាំក្រុមអ្នកសង្កេតការណ៍អន្តរជាតិ ទៅកាន់ហ្សាប៉ូរីចា នៅក្នុងពេលឆាប់ៗ។ ក្នុងពេលជាមួយគ្នា ប្រមុខដឹកនាំ AIEA ក៏បានទទូចផងដែរឲ្យគ្រប់ភាគីចៀសវាងធ្វើសកម្មភាពអ្វីផ្សេងទៀត ដែលអាចធ្វើឲ្យបញ្ហាសុវត្ថិភាពនុយក្លេអ៊ែរ នៅហ្សាប៉ូរីចានេះកាន់តែត្រូវធ្លាក់ចុះដុនដាបជាងនេះទៅទៀត។
លោកអគ្គលេខាធិការអ.ស.ប.វិញ នៅក្នុងអំឡុងដំណើរទស្សនកិច្ចទៅកាន់តំបន់កំពង់ផែអូដេសារបស់អ៊ុយក្រែន ក៏បានទាមទារផងដែរ កុំឲ្យរុស្ស៊ីកាត់ផ្តាច់មជ្ឈមណ្ឌលនុយក្លេអ៊ែរហ្សាប៉ូរីចាពីបណ្តាញផ្គត់ផ្គង់អគ្គិសនីរបស់អ៊ុយក្រែន ដោយលោកបានលើកឡើងថា មជ្ឈមណ្ឌលនុយក្លេអ៊ែរនេះគឺជារបស់អ៊ុយក្រែន ហើយថាមពលអគ្គិសនីផលិតចេញពីមជ្ឈមណ្ឌលនុយក្លេអ៊ែរនេះគឺជាកម្មសិទ្ធិរបស់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ