កូនរបស់មនុស្សជំនិតនឹងលោកពូទីន ស្លាប់ក្នុងការបំផ្ទុះរថយន្ត ក្បែរក្រុងមូស្គូ
ទំនងជាភេរវកម្មសំដៅប្រឆាំងនឹងលោក អាឡិចសង់ ឌូហ្គីន (Alexandre Dougine) ដែលជាអ្នកជាតិនិយមរុស្ស៊ីបំផុត ហើយស្និទ្ធនឹងលោកពូទីនទេ ប៉ុន្តែគឺកូនស្រីគាត់ ឈ្មោះ ដារីយ៉ា ឌូហ្គីណា (Daria Douguina) ជាអ្នករងគ្រោះបាត់បង់ជីវិត កាលពីព្រលប់ថ្ងៃសៅរ៍ ទី ២០ សីហា នៅក្បែរក្រុងមូស្គូ។ បើតាមសេចក្តីប្រកាសរបស់ក្រុមអ្នកអង្កេតរុស្ស៊ី រថយន្ត បានផ្ទុះឆេះ ដោយគ្រាប់បែកបង្កប់ក្នុងឡាន។
ចុះផ្សាយនៅថ្ងៃ៖
ស្តាប់ - ០២:១០
រថយន្តរបស់លោក អាឡិចសង់ ឌូហ្គីន ដែលបើកបរដោយកូនស្រី បានផ្ទុះឆេះខ្ទេចនៅវេលាម៉ោង៩កន្លះយប់។ នេះបើតាមរូបភាពវីដេអូអមជាមួយសេចក្តីថ្លែងការណ៍របស់រុស្ស៊ី។ ហើយបើតាមវេបសាយ១១២ ស្រង់មកផ្សាយបន្តដោយ សារព័ត៌មានអង់គ្លេស The Guardian ឪពុកនិងកូន ត្រូវទៅចូលរួមក្នុងកម្មវិធីមួយនៅក្រៅក្រុងមូស្គូ ហើយត្រលប់មកផ្ទះវិញរួមគ្នា តែលោក អាឡិចសង់ ឌូហ្គីន បានប្តូរចិត្តធ្វើដំណើរបែកគ្នានៅនាទីចុងក្រោយ ទើបបានរួចជីវិត។ ឯកូនស្រី នាង ដារីយ៉ា ឌូហ្គីណា ដែលបើកឡានឪពុកបានស្លាប់ក្នុងហេតុការណ៍។ នេះសឱ្យឃើញថាជាការប៉ុនប៉ងសម្លាប់លោក អាឡិចសង់ ឌូហ្គីន ទេ។ នេះបើតាមការសន្និដ្ឋានរបស់ក្រុមគ្រួសារ។
មានអាយុ៦០ឆ្នាំ ជាប់ទណ្ឌកម្មអាមេរិកតាំងពីឆ្នាំ២០១៤មក អាឡិចសង់ ឌូហ្គីន ជាបញ្ញវន្ត ជាអ្នកនិពន្ធ ដ៏មហាអភិរក្សជាតិនិយមបំផុតរបស់រុស្ស៊ី ដែលគាំទ្រទ្រឹស្តីពង្រីកអាណាចក្ររុស្ស៊ី ដោយចង់ក្រសោបយកទឹកដីអ៊ុយក្រែន ត្រង់តំបន់មានប្រជាពលរដ្ឋនិយាយភាសារុស្ស៊ីរស់នៅច្រើន មកធ្វើជាទឹកដីរុស្ស៊ី តាំងពីយូរយារមកហើយ។ អាចចាត់ទុកថាជាមនុស្សជំនិតម្នាក់របស់លោកប្រធានាធិបតីរុស្ស៊ី លោក ឌូហ្គីន ទំនងជាមេគំនិតនៃប្រតិបត្តិការវាយឈ្លានពានអ៊ុយក្រែន ថ្ងៃទី ២៤កុម្ភៈផង។ ប៉ុន្តែឥទ្ធិពលរបស់មេជាតិនិយមឌូហ្គីនលើលោកពូទីន ហាក់ដូចជាបានចុះថយនារយៈពេលប៉ុន្មានខែចុងក្រោយនេះ។ នេះបើតាមក្រុមអ្នកជំនាញខ្លះ។
ចំណែកកូនស្រីវ័យ៣០ឆ្នាំ អ្នកស្រី ដារីយ៉ា ឌូហ្គីណា ហៅ Platonova (បើតាមប្រព័ន្ធឃោសនាព័ត៌មានផ្លូវការរុស្ស៊ី) វិញ ជាកាសែតនិងជាអ្នកវិភាគនយោបាយ។ មាននិន្នាការនិងទស្សនៈដូចឪពុក និង ក្នុងនាមខ្លួននាងផ្ទាល់ ដារីយ៉ា ឌូហ្គីណា បានការពារប្រតិបត្តិការយោធារុស្ស៊ីនៅអ៊ុយក្រែន តាមកញ្ចក់ទូរទស្សន៍ជាតិផង។
អាជ្ញាធររុស្ស៊ីបានប្រកាសបើកអង្កេតពីបទឃាតកម្ម តែមិនច្រានចោលទង្វើបែបភេរវកម្មទេ។ ប្រមុខដឹកនាំសាធារណរដ្ឋដូណេតស្ត៍ភាគខាងកើតអ៊ុយក្រែន បានចោទចំៗ នៅថ្ងៃអាទិត្យនេះភ្លាមថាកងកម្លាំងយោធាអ៊ុយក្រែនថាជាអ្នករៀបចំធ្វើភេរវកម្មប្រឆាំងលោកអាឡិចសង់ ឌូហ្គីន តែបានសម្លាប់អ្នកស្រី ដារីយ៉ា ឌូហ្គីណាជាកូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ