រំសាយអាវុធនុយក្លេអ៊ែរ ៖ សហរដ្ឋអាមេរិកច្រឡោតនឹងការងប់ជំទាស់របស់រុស្ស៊ី
សហរដ្ឋអាមេរិកបានបរិហារ កាលពីថ្ងៃអាទិត្យទី ២៨សីហា ថារុស្ស៊ីបានរារាំងយ៉ាងងងុលតែម្នាក់ឯង មិនឱ្យអង្គប្រជុំអាចអនុម័តសេចក្តីថ្លែងការណ៍រួម របស់អង្គការសហប្រជាជាតិស្តីពីការមិនរីកសាយភាយនុយក្លេអ៊ែរ (TNP)បាន។ ប៉ុន្តែទោះគ្មានរុស្ស៊ីក៏ដោយ ក៏ឯកសារចុងក្រោយស្តីការមិនរីកសាយភាយនុយក្លេអ៊ែរ ជាទម្រដ៏សំខាន់សម្រាប់សន្ធិសញ្ញា ដោយគ្រប់ប្រទេសបានគាំទ្រ។ នេះជាការអបអររបស់អ្នកទទួលខុសត្រូវជាន់ខ្ពស់អាមេរិក។
ចុះផ្សាយនៅថ្ងៃ៖
បន្ទាប់ពីបានពិភាក្សានិងចរចា យ៉ាងសកម្មនិងប្រកបដោយលក្ខណៈស្ថាបនាអស់បួនសប្តាហ៍ ក្នុងក្របខ័ណ្ឌនៃសន្និសីទអង្គការសហប្រជាជាតិ រុស្ស៊ី បានសម្រេចចិត្ត បិទខ្ទប់ មិនឱ្យមានការស្រុះស្រួលគ្នា លើឯកសារបញ្ចប់ទេ។ នេះបើតាមអ្នកនាំពាក្យរងរបស់ក្រសួងការបរទេសអាមេរិក លោក Vedant Patel។ អ្នកនាំពាក្យអាមេរិកដដែលបានលម្អិតថា រុស្ស៊ីរារាំងមិនឱ្យចេញសេចក្តីថ្លែងការណ៍រួម ក្នុងបំណងតែមួយ គឺមិនចង់ឱ្យប្រើពាក្យដែលអាចទទួលស្គាល់ហានិភ័យនៃជាតិវិទ្យុសកម្មនៅមជ្ឈមណ្ឌលនុយក្លេអ៊ែរអ៊ុយក្រែន ហ្សាប៉ូរីចា ដែលយោធារុស្ស៊ីកំពុងកាន់កាប់។
ជារោងចក្រនុយក្លេអ៊ែរដ៏ធំជាងគេនៅអឺរ៉ុប ហ្សាប៉ូរីចា បានធ្លាក់ក្នុងកណ្តាប់ដៃយោធារុស្ស៊ី តាំងពីដើមខែមីនាមក និងស្ថិតនៅជិតសមរភូមិប្រយុទ្ធរវាងកងកម្លាំងរុស្ស៊ីនិងអ៊ុយក្រែន។ កៀវនិងមូស្គូ បានចោទប្រកាន់គ្នាទៅវិញទៅ មកថាបានបាញ់ផ្លោងគ្រាប់ធ្លាក់នៅក្បែរៗមជ្ឈមណ្ឌលដែលអាចនឹងឱ្យខូចរោងចក្រ។ ក្រុមហ៊ុនអគ្គីសនីអ៊ុយក្រែនបានទាញអាសន្នតាំងពីថ្ងៃសៅរ៍មកថា រោងចក្រដំណើរការទាំងមានហានិភ័យធ្លាយវិទ្យុសកម្មនិងអគ្គីភ័យ។
សមាជិកអង្គការសហប្រជាជាតិ ១៩១ប្រទេស ជាហត្ថលេខីនៃសន្ធិសញ្ញាមិនរីកសាយភាយនុយក្លេអ៊ែរ ដែលគ្រោងហាមឃាត់ការផលិតអាវុធនុយក្លេអ៊ែរ សម្រួលការរំសាយអាវុធបរមាណូទាំងស្រុង និងផ្សព្វផ្សាយកិច្ចសហប្រតិបត្តិការដើម្បីប្រើប្រាស់ថាមពលនុយក្លេអ៊ែរដោយសន្តិវិធី កំពុងជួបប្រជុំគ្នានៅទីស្នាក់ការអង្គការសហប្រជាជាតិ នាទីក្រុងញូវយ៉ក តាំងពីថ្ងៃទី ១សីហាមក។
ប៉ុន្តែនៅថ្ងៃសុក្រទី ២៥សីហា រុស្ស៊ី បានសម្រេចរារាំង ការអនុម័តសេចក្តីថ្លែងការណ៍ រួម ដោយយកលេសថា នៅក្នុងគម្រោងអត្ថបទចុងក្រោយ មានកថាខណ្ឌខ្លះបង្កប់ន័យនយោបាយគួរឱ្យអៀនខ្មាស។ អូទ្រីសប្រទេសអព្យាក្រិត្យនិងគ្មាននុយក្លេអ៊ែរ ក៏បានបរិហារសេចក្តីសម្រេចរបស់រុស្ស៊ីនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ