កងទ័ពអ៊ុយក្រែនសំរុកវាយប្រយុទ្ធ ដណ្តើមតំបន់ភាគខាងត្បូង
ចាប់ពីថ្ងៃចន្ទទី២៩សីហាមក កងទ័ពអ៊ុយក្រែន បានសំរុកវាយប្រយុទ្ធនៅច្រើនទីតាំង ស្ថិតនៅភាគខាងត្បូង ជាក់ស្ដែងនៅទីក្រុងឃែរសុន ទីក្រុងធំមួយរបស់អ៊ុយក្រែន ដែលត្រូវបានកងទ័ពរុស្ស៊ីវាយគ្រប់គ្រងបាន តាំងតែពីខែមីនា។ ទន្ទឹមគ្នានេះ មានការព្រួយបារម្ភកាន់តែខ្លាំងឡើង អំពីសុវត្ថិភាពនៅស្ថានីយ៍នុយក្លេអ៊ែរ ហ្សាប៉ូរីចា ដែលស្ថិតនៅខាងត្បូងអ៊ុយក្រែន ខណៈការវាយប្រយុទ្ធគ្នាកាន់តែកក្រើកឡើង រវាងកងទ័ពរុស្ស៊ី និងអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៣៤
លោក Yaroslav Yanuchevytch ប្រធានរដ្ឋបាលតំបន់ឃែរសុន បានប្រកាសតាមបណ្តាញតេឡក្រាម អំពាវនាវឲ្យប្រជាជននៅទីក្រុងឃែរសុន ប្រមាណជិត៣សែននាក់ ត្រូវគោរពវិធានការសុវត្ថិភាព ខណៈកងទ័ពអ៊ុយក្រែន កំពុងបើកការវាយសំរុក ចាប់ពីយប់ថ្ងៃចន្ទ។ ដូចគ្នាដែរ លោក Serguiï Khlan សមាជិកសភាអ៊ុយក្រែនម្នាក់ បានអះអាងតាមទូរទស្សន៍ថា កងទ័ពអ៊ុយក្រែនកំពុងតែប្រឹងប្រែងប្រយុទ្ធ ដើម្បីបណ្តេញពួកសត្រូវឈ្លានពាន ឲ្យចេញពីតំបន់ភាគខាងត្បូង។ លោកម្នាក់នេះ បានអះអាងថា កងទ័ពអ៊ុយក្រែនកំពុងតែមានប្រៀប ដោយបានបាញ់កំទេចផ្តាច់ស្ពាន និងទំនប់មួយចំនួនធំ នៅលើទន្លេDniepr ដើម្បីកាត់ផ្តាច់បណ្តាញដឹកជញ្ជូនរបស់កងទ័ពរុស្ស៊ី។
ដោយឡែក ក្រសួងការពារជាតិរុស្ស៊ី បានទទួលស្គាល់ថា កងទ័ពអ៊ុយក្រែន ពិតជាបានព្យាយាមវាយប្រយុទ្ធ ត្រង់ចំណុចមុខព្រួញចំនួន៣ នៅភាគខាងត្បូង ពិតមែន។ ក៏ប៉ុន្តែកងទ័ពអ៊ុយក្រែន ត្រូវបរាជ័យយ៉ាងត្រដាបត្រដួស បន្ទាប់ពីរងគ្រាប់ប្លោងរបស់កងទ័ពរុស្ស៊ី។
គួរបញ្ជាក់ថា គ្មានប្រភពឯករាជ្យណាមួយមកបញ្ជាក់ ពីស្ថានភាពពិតប្រាកដ ទាក់ទិននឹងការវាយប្រយុទ្ធនៅភាគខាងត្បូងអ៊ុយក្រែននេះទេ។ លោកNatalia Goumeniouk អ្នកនាំពាក្យកងបញ្ជាការអ៊ុយក្រែនប្រចាំសមរភូមិខាងត្បូង បានលើកឡើងថា កងទ័ពអ៊ុយក្រែនព្យាយាមរុញច្រានកងទ័ពរុស្ស៊ី ឲ្យដកថយទៅកាន់ត្រើយខាងឆ្វេងនៃទន្លេ Dniepr។ លោកបន្ថែមថា យប់ថ្ងៃចន្ទឈានចូលថ្ងៃអង្គារ រុស្ស៊ីបានបាញ់មីស៊ីលចំនួន១៦គ្រាប់ នៅក្រុងមីកូឡែវ ដែលបានបណ្តាលឲ្យខូចខាតយ៉ាងដំណំ ដល់ហេដ្ឋារចនាសម្ព័ន្ធនិងផ្ទះសំបែងប្រជាជន។ យ៉ាងហោចណាស់ មានជនស៊ីវីលអ៊ុយក្រែន២នាក់បានស្លាប់ និងរបួសជាង២០នាក់។
កាលពីយប់ថ្ងៃចន្ទ នៅក្នុងសារវីដេអូប្រចាំថ្ងៃរបស់ខ្លួន លោកប្រធានាធិបតីវ្លូឌីមៀរ ហ្សេឡេនស្គី បានប្រកាសថា កងទ័ពអ៊ុយក្រែន នឹងប្រឹងប្រែងវាយប្រយុទ្ធដណ្តើមទឹកដី ដែលជារបស់អ៊ុយក្រែនមកវិញឲ្យបាន។ តំបន់ទាំងនោះមានដូចជា ខារគីវ លូហ្កង់ស្ក៍ ដូណេតស្ក៍ ហ្សាប៉ូរីចា ឃែរសុន គ្រីម៉េ ព្រមទាំងដែនទឹកក្នុងសមុទ្រអាហ្សូវ និងសមុទ្រខ្មៅជាដើម។
គួរកត់សំគាល់ដែរថា ការវាយប្រយុទ្ធគ្នាយ៉ាងកក្រើកនៅភាគខាងត្បូងអ៊ុយក្រែននេះ វាជួនចំពេលដែលក្រុមមន្ត្រីជំនាញ នៃទីភ្នាក់ងារថាមពលនុយក្លេអ៊ែរអន្តរជាតិ កំពុងតែធ្វើដំណើរទៅកាន់ស្ថានីយ៍នុយក្លេអ៊ែរ ហ្សាប៉ូរីចា។ ស្ថានីយ៍នុយក្លេអ៊ែរដ៏ធំជាងគេនៃទ្វីបអឺរ៉ុបនេះ ស្ថិតនៅលើដងទន្លេDniepr ចំងាយតែជាង១០០គីឡូម៉ែត្រប៉ុណ្ណោះ ពីក្រុងឃែរសុន។ ការសំរុកវាយប្រយុទ្ធនៅតំបន់នេះ ធ្វើឲ្យគេភ័យបារម្ភជាខ្លាំង ពីគ្រោះមហន្តរាយនុយក្លេអ៊ែរដ៏ធ្ងន់ធ្ងរបំផុតក្នុងប្រវត្តិសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ