បិទទិដ្ឋាការ លែងឲ្យជនជាតិរុស្ស៊ីជាន់ដីអឺរ៉ុប ជាកាដូដែលអឺរ៉ុបឲ្យទៅលោកពូទីន?
កាលពីថ្ងៃអង្គារ រដ្ឋមន្ត្រីការបរទេសអឺរ៉ុប បានជួបប្រជុំគ្នានៅទីក្រុងប្រាហ្ក សាធារណរដ្ឋឆេក។ សំណុំរឿងដ៏សំខាន់មួយ នៃការជជែកគ្នានេះ គឺទាក់ទិននឹងគំនិតស្នើដោយប្រទេសខ្លះ ដូចជាហ្វាំងឡង់ ហូឡង់ ប៉ូឡូញ ជាដើម ថាអឺរ៉ុបត្រូវបិទទិដ្ឋាការ ហាមឃាត់ប្រជាជនរុស្ស៊ីទាំងអស់ កុំឲ្យមកជាន់ដីអឺរ៉ុប។ តែយ៉ាងណា គំនិតនេះ ហាក់មិនទទួលការគាំទ្រជាឯកច្ឆ័ន្ទ ពីគ្រប់ប្រទេសសមាជិកនោះទេ។ ជាក់ស្តែង រដ្ឋាភិបាលអាល្លឺម៉ង់ បានអះអាងថា វាមិនមែនជាគំនិតល្អទេ ដែលចង់ដាក់ពិន័យរដ្ឋាភិបាលរុស្ស៊ី ដោយការហាមឃាត់ទេចរណ៍រុស្ស៊ី ទាំងស្រុងបែបនេះ។ អាល្លឺម៉ង់យល់ថា ការហាមឃាត់ជនជាតិរុស្ស៊ីទាំងស្រុង មិនឲ្យចូលដីអឺរ៉ុប គឺវានឹងដាក់ការលំបាក ទៅលើអ្នកកាសែតរុស្ស៊ី អ្នកនយោបាយរិះគន់ ឬក៏និស្សិតរុស្ស៊ី ដែលចង់មករៀននៅអឺរ៉ុបជាដើម។
ចុះផ្សាយនៅថ្ងៃ៖
យ៉ាងណាមិញ លោក វ្លាឌីមៀរ វ៉ារឡាម៉ូវ អ្នកវិភាគសង្គមនៅលើទំព័រ Blog ដ៏ល្បីម្នាក់នៅរុស្ស៊ី បានលើកឡើងថា បើអឺរ៉ុបបិទទិដ្ឋាការទាំងស្រុង នោះគឺវាមិនខុសពីអឺរ៉ុប ធ្វើកាដូ ឲ្យរបបរបស់លោកពូទីននោះឡើយ។ លោកពូទីននឹងបានលេសនេះ ឃោសនាប្រាប់ទៅប្រជាជនរុស្ស៊ី ឲ្យឃើញថាអឺរ៉ុបអាក្រក់ ចង់ធ្វើបាបប្រជាជនរុស្ស៊ីទាំងមូល។
សម្រាប់សំដីលោក Vladimir Varlamov
"យុទ្ធនាការឃោសនាបោកបញ្ឆោតមួយដ៏សំខាន់ នៃអំណាចនយោបាយរបស់រុស្ស៊ី គឺយកប្រជាជាតិរុស្ស៊ី ឲ្យប្រឆាំងទល់នឹងបស្ចឹមលោក។ គេនិយាយផ្សាយប្រាប់ទៅប្រជាជនរុស្ស៊ីថា ពួកបស្ចឹមលោក ចង់ធ្វើបាប ចង់រំលាយ ចង់កម្ទេចរុស្ស៊ី។ ពាក្យទាំងនេះ មានអ្នកជឿមែន។ ជនជាតិរុស្ស៊ី ដែលមិនសូវបានចេញដើរ ទៅប្រទេសផ្សេងៗនៅអឺរ៉ុប ជឿថា នៅអឺរ៉ុបគេហាមមិនឆ្កែ និងជនជាតិរុស្ស៊ីទៅជាន់ទេ។ ដូច្នេះ អំណេះតទៅ ក្រុមចាត់ចែងប្រព័ន្ធឃោសនារបស់ក្រឹមឡាំង កាន់តែសប្បាយចិត្ត ព្រោះមានអ្នកសហការជួយក្នុងការឃោសនា អ្នកនោះគឺថ្នាក់ដឹកនាំនៅអឺរ៉ុប នេះឯង។ គឺវាប្រៀបបីដូចជាអឺរ៉ុប ធ្វើអំណោយដ៏មានតម្លៃអស្ចារ្យ ទៅឲ្យពូទីន !
ពីមុន ពួកមេដឹកនាំរុស្ស៊ីប្រកាសថា អឺរ៉ុបឈ្លោះតែជាមួយអំណាចនយោបាយរបស់ក្រឹមឡាំងទេ។ តែឥឡូវ គេអាចមានលេស និយាយថា អឺរ៉ុបរករឿងឈ្លោះជាមួយជនជាតិរុស្ស៊ីទូទៅតែម្តង មិនថាអ្នកនោះ មាននិន្នាការនយោបាយបែបណាឡើយ។ គេនឹងឃោសនាថា អឺរ៉ុបចង់ធ្វើបាប មិនមែនតែពួកអ្នកប្រកាសសង្គ្រាម ឬអ្នកដែលគាំទ្រឲ្យរុស្ស៊ីបញ្ជូនទ័ពទៅឈ្លានពានអ៊ុយក្រែនទេ គឺចង់ធ្វើបាបជនជាតិរុស្ស៊ី គ្រប់គ្នាតែម្តងដោយមិនរើសមុខ។
ខ្ញុំហ៊ានភ្នាល់ថា នៅពេលដែលអឺរ៉ុបចាប់ផ្តើម នាំគ្នានិយាយពីរឿងចង់បិទទិដ្ឋាការ លែងឲ្យជនជាតិរុស្ស៊ីចូល គឺពួកមេដឹកនាំនៅវិមានក្រឹមឡាំង បាននាំគ្នាសើច ទះដៃអរកញ្ច្រៀវ ហើយគាស់ស្រាឆំប៉ាញផឹកថែមទៀត។ ពីពេលនេះទៅ ពូទីនមិនបាច់ចាំទៅខ្វល់គិតពិចារណា រកវិធីទប់ស្កាត់ កុំឲ្យមនុស្ស ឬក៏មូលធន រត់ចេញពីរុស្ស៊ីទៀតឡើយ។ ហើយក៏មិនចាំបាច់ទៅខ្វល់ រកវិធីបិទមាត់ពួកអ្នកប្រឆាំង ឬក៏អ្នកកាសែតតទៅទៀតដែរ។ ក្រុមថ្នាក់ដឹកនាំនយោបាយអឺរ៉ុប កំពុងតែធ្វើរឿងនេះ ជំនួសពូទីនហើយ !"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ