ទីភ្នាក់ងារថាមពលនុយក្លេអ៊ែរអន្តរជាតិ ទាមទារបង្កើតតំបន់សុវត្ថិភាព នៅស្ថានីយ៍នុយក្លេអ៊ែរហ្សាប៉ូរីចា
បន្ទាប់ពីបានចុះទៅត្រួតពិនិត្យស្ថានការណ៍ នៅស្ថានីយ៍អគ្គិសនីនុយក្លេអ៊ែរហ្សាប៉ូរីចា ក្រុមអ្នកជំនាញនៃទីភ្នាក់ងារថាមពលនុយក្លេអ៊ែរអន្តរជាតិ បានបង្ហាញរបាយការណ៍មួយកាលពីថ្ងៃអង្គារទី៦កញ្ញា ទៅកាន់ក្រុមប្រឹក្សាសន្តិសុខ នៃអង្គការសហប្រជាជាតិ។ ក្នុងរបាយការណ៍នេះ ទីភ្នាក់ងារនុយក្លេអ៊ែរអន្តរជាតិ បានទាមទារថា ត្រូវតែបង្កើតតំបន់សុវត្ថិភាព គ្មានអាវុធជាបន្ទាន់ នៅស្ថានីយ៍ហ្សាប៉ូរីចានេះ ព្រោះលក្ខខណ្ឌសន្តិសុខ នឹងមិនអាចទ្រាំទ្របានទៀត ប្រសិនបើគេ ចង់បញ្ចៀសមិនឲ្យមានគ្រោះថ្នាក់នុយក្លេអ៊ែរទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ទីភ្នាក់ងារថាមពលនុយក្លេអ៊ែរអន្តរជាតិ បានសន្និដ្ឋានថា ស្ថានការណ៍នៅស្ថានីយ៍ហ្សាប៉ូរីចានាពេលនេះ គឺមិនអាចទ្រាំទ្របានទៀតទេ ព្រោះស្ថានីយ៍នុយក្លេអ៊ែរនេះ បានរងនូវការបាញ់ទំលាក់គ្រាប់បែក យ៉ាងដំណំ ជាច្រើនលើកច្រើនសា។ ត្រូវតែការពារស្ថានីយ៍នេះ ពីការទំលាក់គ្រាប់បែកជាបន្ទាន់។ ត្រូវតែរៀបចំ ឲ្យស្ថានីយ៍នេះក្លាយជាតំបន់សុវត្ថិភាពពិសេស គ្មានអាវុធ។
នៅក្នុងសារវីដេអូប្រចាំថ្ងៃរបស់ខ្លួន លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានថ្លែងអបអរ ដោយក្នុងរបាយការណ៍នេះ អ្នកជំនាញនៃទីភ្នាក់ងារថាមពលនុយក្លេអ៊ែរអន្តរជាតិ AIEA បានលើកឡើងថា គេបានប្រទះឃើញគ្រឿងសព្វាវុធ របស់កងទ័ពរុស្ស៊ី នៅក្នុងបរិវេនស្ថានីយ៍ហ្សាប៉ូរីចា។ វត្តមានកងទ័ពនិងគ្រឿងសព្វាវុធរុស្ស៊ីនេះ គឺវាបានដាក់សំពាធយ៉ាងខ្លាំង និងជារៀងរាល់ថ្ងៃ ទៅលើបុគ្គលិកអ៊ុយក្រែន ដែលបំពេញការងារនៅក្នុងស្ថានីយ៍ហ្សាប៉ូរីចា។ លោកហ្សេឡេនស្គី បានអះអាងថា អ៊ុយក្រែនគាំទ្រពេញទំហឹង ចំពោះការបង្កើតតំបន់សុវត្ថិភាព ពិសេស គ្មានអាវុធ គ្មានកងទ័ព នៅស្ថានីយ៍ហ្សាប៉ូរីចានេះ។
ដោយឡែក ភាគីរុស្ស៊ីវិញ បានទាមទារ ឲ្យទីភ្នាក់ងារថាមពលនុយក្លេអ៊ែរអន្តរជាតិ ត្រូវផ្តល់ព័ត៌មានបញ្ជាក់លំអិត ទាក់ទិននឹងរបាយការណ៍នេះ។ លោកស៊ែរហ្កី ឡាវរ៉ូវ រដ្ឋមន្ត្រីការបរទេសរុស្ស៊ីបានអះអាងថា មានចំណុចច្រើនដែល ភាគីរុស្ស៊ីមានចម្ងល់ ជាក់ស្តែងទាក់ទិនចំណុចដែល ភាគីរុស្ស៊ីបានប្រគល់ឯកសារភស្តុតាងគ្រប់គ្រាន់បញ្ជក់ថា កងទ័ពអ៊ុយក្រែន គឺជាអ្នកបានបាញ់ប្លោងគ្រាប់ មកលើស្ថានីយ៍ហ្សាប៉ូរីចា តែរបាយការណ៍បែរជាមិនយកបញ្ហានេះមកនិយាយឲ្យចំៗទៅវិញ។ លោកស្រី Maria Zhakharova អ្នកនាំពាក្យក្រសួងការបរទេសរុស្ស៊ី បានចោទថាគឺក្រុមប្រទេសលោកខាងលិច ដែលបានដាក់សំពាធទៅលើ AIEA ព្រោះថាការពិត គឺអ៊ុយក្រែនជាអ្នកបាញ់ប្លោងគ្រាប់នៅលើស្ថានីយ៍ហ្សាប៉ូរីចា ដោយមានជំនួយពីអាមេរិក។
គួរបញ្ជាក់ថា ស្ថានីយ៍នុយក្លេអ៊ែរហ្សាប៉ូរីចា និងតំបន់នៅជុំវិញ បានធ្លាក់ចូលក្នុងការគ្រប់គ្រងរបស់កងទ័ពរុស្ស៊ី តាំងតែពីខែមីនាមកម្លេះ។ ស្ថានីយ៍នុយក្លេអ៊ែរដ៏ធំជាងគេនៅអឺរ៉ុបនេះ បានរងនូវការទម្លាក់គ្រាប់ជាច្រើនដង ធ្វើឲ្យមានការបារម្ភខ្លាំងពីគ្រោះថ្នាក់នុយក្លេអ៊ែរ។ កាលពីថ្ងៃព្រហស្បតិ៍សប្តាហ៍មុន ក្រុមអ្នកជំនាញ ដឹកនាំដោយលោក Rafael Grossi អគ្គនាយក AIEA ផ្ទាល់ បានទៅដល់ស្ថានីយ៍ហ្សាប៉ូរីចានេះ ដើម្បីពិនិត្យស្ថានការណ៍ បន្ទាប់ពីមានអន្តរាគមន៍ទាមទារពីអង្គការសហប្រជាជាតិ។
គិតត្រឹមថ្ងៃចន្ទដើមសប្តាហ៍នេះ អ្នកជំនាញរបស់ AIEA បានចាកចេញពីស្ថានីយ៍ហ្សាប៉ូរីចាហើយ ដោយទុកនៅតែ២នាក់ប៉ុណ្ណោះ ដើម្បីប្រចាំការជាអចិន្ត្រៃយ៍។ កាលពីថ្ងៃអង្គារ លោកស្រីឧបនាយករដ្ឋមន្ត្រីអ៊ុយក្រែន បានទាមទារឲ្យបង្កើតច្រកផ្លូវសុវត្ថិភាព ដើម្បីឲ្យប្រជាជនចាកចេញពីតំបន់ក្បែរស្ថានីយ៍នុយក្លេអ៊ែរហ្សាប៉ូរីចានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ