លោកពូទីនអះអាងថា រុស្ស៊ីបានចំណេញក្នុងការពង្រឹងអធិបតេយ្យជាតិ ហើយពួកបស្ចឹមលោកកំពុងផុងជ្រៅក្នុងទណ្ឌកម្មទ័លច្រក
សង្គ្រាមនៅអ៊ុយក្រែន បានធ្វើឲ្យក្រុមប្រទេសលោកខាងលិច ជាពិសេសសហភាពអឺរ៉ុប ត្រូវស្ថិតក្នុងវិបត្តិខ្វះថាមពលប្រើប្រាស់។ ក្រុមហ៊ុន Gazprom របស់រុស្ស៊ី បានប្រកាសកាលពីថ្ងៃសុក្រ សប្តាហ៍មុនថា គេនឹងបិទរ៉ូក្បាលរ៉ូប៊ីណេទាំងស្រុង លែងបង្ហូរឧស្ម័នទៅ ឲ្យអឺរ៉ុបតទៅទៀត រហូតណាទាល់តែខាងភាគីក្រុមហ៊ុនអាល្លឺម៉ង់ ធ្វើការជួសជុល និងប្រគល់ម៉ាស៊ីនតួរប៊ីនបង្ហូរឧស្ម័នមកឲ្យខាងរុស្ស៊ីវិញ។ អឺរ៉ុប បានចោទរុស្ស៊ីថា បានយកទំនិញថាមពលហ្កាសនេះ ជាអាវុធដើម្បីវាយធ្វើបាប សងសឹកអឺរ៉ុប។
ចុះផ្សាយនៅថ្ងៃ៖
ថ្ងៃពុធទី៧កញ្ញា នៅក្នុងឱកាស បើកវេទិកាសេដ្ឋកិច្ចបូព៌ា នៅទីក្រុងវ្ល៉ាឌីវ៉ូឆតុក លោកប្រធានាធិបតីពូទីន បានឆ្លើយតបនឹងការចោទប្រកាន់របស់អឺរ៉ុប ដោយអះអាងថា ភាគីរុស្ស៊ីបានគោរពកាតព្វកិច្ចផ្គត់ផ្គង់ទំនិញវត្ថុធាតុដើមថាមពលជារៀងរហូត។ ផ្ទុយទៅវិញ គឺក្រុមប្រទេសលោកខាងលិចទេ ដែលកំពុងផុងជ្រៅ ទៅក្នុងវិធានការទណ្ឌកម្មទ័លច្រករបស់ខ្លួនឯង។
សំឡេងលោកពូទីន ដែលអះអាងថា រុស្ស៊ីមិនបានយកវត្ថុធាតុដើមថាមពល ធ្វើជាអាវុធនោះទេ
« ពួកលោកខាងលិច និយាយថារុស្ស៊ីបានយក វត្ថុធាតុដើមថាមពល ធ្វើជាអាវុធ។ នេះគឺជាសំដីគ្មានន័យខ្លឹមសារមួយទៀតរបស់ពួកគេ។ តើអាវុធអ្វីទៅ ដែលយើងបានប្រើ? យើងបានបំពេញកាតព្វកិច្ច ផ្គត់ផ្គង់ទំនិញវត្ថុធាតុដើមទៅតាមការបញ្ជាទិញ របស់ប្រទេសដែលជាអតិថិជន ដោយត្រឹមត្រូវរហូត មិនដែលខកខានទេ។
ប្រគល់ម៉ាស៊ីនតួរប៊ីនមកឲ្យយើងមក នោះស្អែក យើងនឹងចាប់ផ្តើមដំណើរការបំពង់បង្ហូរឧស្ម័ន Nord Stream ឡើងវិញឲ្យមើល ! យើងបានត្រៀមខ្លួនរួចហើយ ក្នុងការចាប់ផ្តើមនាំចេញឡើងវិញ ចាប់ពីថ្ងៃស្អែកទៅ។ អ្វីដែលអ្នកត្រូវធ្វើ គឺគ្រាន់តែចុចប៊ូតុងមួយតែប៉ុណ្ណោះ។
ក៏ប៉ុន្តែ គេមិនប្រគល់មកឲ្យយើង ហើយគេគឹតតែពីនិយាយច្រំដែល ថាយើងយកទំនិញថាមពល ប្រើជាអាវុធ។ តាមពិតទៅ ពួកលោកខាងលិច លែងដឹងថាខ្លួនត្រូវធ្វើអ្វីទៀតហើយ។ ពួកគេកាន់តែផុងខ្លួនជ្រៅ ទៅក្នុងភាពទ័លច្រក នៃវិធានការទណ្ឌកម្មរបស់ពួកគេ។ »
បន្ថែមពីនេះទៀត លោកពូទីន បានលើកឡើងទៀតថា លោកចង់ចរចា សើរើឡើងវិញ នូវកិច្ចព្រមព្រៀងជាមួយអ៊ុយក្រែន ទាក់ទិននឹងការដឹកជញ្ជូនទំនិញស្បៀងគ្រាប់ធុញ្ញជាតិ។ លោកពូទីនអះអាងថា ទំនិញស្បៀងអាហារ គ្រាប់ធុញ្ញជាតិ ដែលគេបានដឹកចេញពីកំពង់ផែអ៊ុយក្រែន ធាតុពិតគឺបានដឹកយកទៅប្រទេសអឺរ៉ុបភាគច្រើនបំផុត។ ប្រការនេះ គឺវានឹងជំរុញឲ្យមានវិបត្តិខ្វះស្បៀងអាហារ គ្រោះទុរ្ភឹក្សនៅតាមប្រទេសក្រីក្រ។ លោកពូទីនបន្ថែមថា ក្នុងចំណោមនាវាដឹកគ្រាប់ធុញ្ញជាតិទាំង៨៧គ្រឿង ដែលបានចេញពីកំពង់ផែអ៊ុយក្រែន គឺមានតែ២គ្រឿងទេ ដែលបានដឹកទៅជួយប្រទេសក្រីក្រនៅអាហ្វ្រិក តាមរយៈកម្មវិធីស្បៀងអាហារពិភពលោក។
អ្នកកាសែតបានជជីកសួរលោកពូទីនបន្ត ថាតើរុស្ស៊ីបានទទួលផលវិបាកអ្វីខ្លះ ក្រោយប្រតិបត្តិការយោធានៅអ៊ុយក្រែន រយៈពេលជាង៦ខែមកនេះ។ លោកពូទីន បានឆ្លើយថា រុស្ស៊ីមិនខាតទេ គឺមានតែចំណេញ ៖
សំឡេងលោកពូទីន ដែលអះអាងថា សង្គ្រាមអ៊ុយក្រែនធ្វើឲ្យរុស្ស៊ីចំណេញពង្រឹងអធិបតេយ្យជាតិ
« ខ្ញុំជឿជាក់ក្នុងចិត្តណាស់ ថាយើងមិនបានខាតបង់អ្វីនោះទេ ហើយយើងក៏នឹងនៅតែមិនខាតបង់អ្វីដែរ ទៅថ្ងៃមុខ។ មិនត្រឹមប៉ុណ្ណោះទេ ខ្ញុំអាចនិយាយបានថា យើងបានចំណេញរួចទៅហើយ គឺយើងចំណេញក្នុងការពង្រឹងអធិបតេយ្យភាពរបស់យើង។
គ្មាននរណាម្នាក់អាចមកធ្វើ ឲ្យរុស្ស៊ីនៅឯកោតែម្នាក់ឯងបានឡើយ មិនថាអ្នកណាក៏ដោយ មានគ្នាច្រើនយ៉ាងណាក៏ដោយ។ រឿងនេះខ្ញុំតែងតែនិយាយរួចមកហើយ។ គ្រាន់តែយើង យកផែនទីពិភពលោកមកមើល ក៏យើងដឹងទៅហើយ ថាយើងមានទំងន់ឥទ្ធិពលប្រកួតប្រជែងយ៉ាងងាយរួចទៅហើយ។ យើងនឹងបន្ត ពង្រីកសមត្ថភាពរបស់យើងនៅក្នុងវិស័យដឹកជញ្ជូន ពង្រីកបណ្ដាញគមនាគមន៍ ផ្លូវថ្នល់ ផ្លូវដែក និងកសាងបើកផ្លូវសមុទ្រ ព្រមទាំងបង្កើនសមត្ថភាពរបស់យើង ក្នុងវិស័យដឹកជញ្ជូនទំនិញ។ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ