ព្រះមហាក្សត្រិយ៍អង់គ្លេស អេលីហ្សាបិត ទី២ សោយទិវង្គត ក្នុងព្រះជន្មាយុ ៩៦ព្រះវស្សា
ព្រះមហាក្សត្រិយ៍ អេលីហ្សាបិត ទី២ (Elizabeth II) ដែលគ្រងរាជ្យបានយូរជាងគេបង្អស់ នៅក្នុងប្រវត្តិសាស្រ្តអង់គ្លេស បានសោយទិវង្គត នៅថ្ងៃព្រហស្បតិ៍ ទី៨ ខែកញ្ញា ឆ្នាំ២០២២ នៅក្នុងព្រះជន្មាយុ ៩៦ព្រះវស្សា។ ក្រោយការសោយទិវង្គត របស់ព្រះមហាក្សត្រិយ៍ អេលីហ្សាបិត ទី២ ព្រះអង្គម្ចាស់ ឆាលស៍ ដែលជាបុត្រាច្បង គឺជាអ្នកឡើងស្នងរាជ្យ ហើយបានក្លាយជាព្រះមហាក្សត្រ ឆាលស៍ ទី៣ (Charles III)។ នៅក្នុងរយៈពេល ៧០ឆ្នាំ នៃការគ្រងរាជសម្បត្តិ ដែលជារយៈពេលយូរជាងគេបំផុត នៅក្នុងប្រវត្តិសាស្ត្រអង់គ្លេស ព្រះមហាក្សត្រិយ៍ អេលីហ្សាបិត ទី២ គឺជាជន្ទល់ដ៏រឹងមាំមួយ នៃរបបរាជានិយមអង់គ្លេស ឆ្លងកាត់ទាំងស្ថិរភាព និងអស្ថិរភាព នៃនយោបាយអង់គ្លេសនិងពិភពលោក។ ជាជោគជ័យមួយដ៏គួរឲ្យកត់សម្គាល់ សម្រាប់ព្រះមហាក្សត្រិយ៍ ដែល កាលពីដំបូងឡើយ មិនមានអ្នកណានឹកស្មានថា អាចនឹងមានជោគវាសនាបានឡើងគ្រងរាជបល្ល័ង្ក។
ចុះផ្សាយនៅថ្ងៃ៖
ស្តាប់ - ០៣:៣៤
ព្រះមហាក្សត្រិយ៍ អេលីហ្សាបិត ទី២ ដែលមានឈ្មោះដើម Elizabeth Alexendra Mary កើតនៅឆ្នាំ១៩២៦ គឺជាបុត្រីច្បងរបស់ព្រះអង្គម្ចាស់ Albert ដែលត្រូវជាបុត្រាទីពីររបស់ព្រះមហាក្សត្រអង់គ្លេស (Georges V)។ ដោយសារតែស្ថិតនៅក្នុងត្រកូលនៃរាជបុត្រាទីពីរនេះហើយ ដែលគេមិនរំពឹងថា អេលីហ្សាបិត អាចនឹងមានជោគវាសនាបានឡើងគ្រងរាជ្យនោះទេ ដោយសិទ្ធិស្នងរាជ្យត្រូវបានទៅត្រកូលនៃរាជបុត្រច្បង គឺព្រះអង្គម្ចាស់ Edward ដែលបានឡើងគ្រងរាជ្យ នៅឆ្នាំ១៩៣៦។
ក៏ប៉ុន្តែ នៅខែធ្នូ ឆ្នាំ១៩៣៦ ក្រោយពីបានឡើងគ្រងរាជ្យមិនទាន់បានមួយឆ្នាំស្រួលបួលផង ព្រះមហាក្សត្រ Edward III ដែលមានរឿងអាស្រូវក្នុងគ្រួសារ ក៏ស្រាប់តែដាក់រាជ្យ ទើបព្រះអង្គម្ចាស់ Albert បានឡើងស្នងរាជ្យជំនួស ដោយយកព្រះរាជនាមថា Georges VI ហើយព្រះអង្គម្ចាស់ក្សត្រិយ៍អេលីហ្សាបិត ដែលនៅពេលនោះទើបមានអាយុបាន ១០ឆ្នាំ ហើយដែលនៅក្នុងគ្រួសារជិតស្និទ្ធគេតែងតែហៅថា “លីលីបិត” (Lilibet) ក៏បានក្លាយជារាជទាយាទជាផ្លូវការ។
ពីរឆ្នាំក្រោយសង្គ្រាមលោកលើកទី២ ព្រះអង្គម្ចាស់ក្សត្រិយ៍ អេលីហ្សាបិត បានរៀបអភិសេកជាមួយព្រះអង្គម្ចាស់ហ្វីលីព នៅឆ្នាំ១៩៤៧ ហើយមួយឆ្នាំក្រោយមក ប្រសូត្របានបុត្រាច្បង គឺព្រះអង្គម្ចាស់ ឆាលស៍ (Charles) និងបុត្រី គឺព្រះអង្គម្ចាស់ក្សត្រិយ៍ អាន (Anne) ពីរឆ្នាំក្រោយមកទៀត។
នៅដើមឆ្នាំ១៩៥២ ដោយសារតែព្រះមហាក្សត្រ Georges VI មានបញ្ហាសុខភាព ព្រះអង្គម្ចាស់ក្សត្រិយ៍ អេលីហ្សាបិត និងព្រះអង្គម្ចាស់ ហ្វីលីព បានធ្វើជាតំណាងព្រះមហាក្សត្រ ធ្វើដំណើរទៅបំពេញទស្សនកិច្ច នៅតាមបណ្តាដែនដី ដែលស្ថិតក្រោមការកាន់កាប់របស់ចក្រភពអង់គ្លេស។ នៅក្នុងអំឡុងទស្សនកិច្ចនោះហើយ ដែលព្រះមហាក្សត្រ Georges VI សោយទិវង្គត ហើយព្រះអង្គម្ចាស់ក្សត្រិយ៍ អេលីហ្សាបិត ដែលកំពុងស្ថិតនៅក្នុងប្រទេសកេនយ៉ា ក៏បានក្លាយជាព្រះមហាក្សត្រិយ៍ ក្នុងវ័យ ២៥ព្រះវស្សា ដោយយកព្រះរាជនាមថា អេលីហ្សាបិត ទី២។
ជាក្សត្រដែលគ្រងរាជ្យតែមិនកាន់អំណាច ទៅតាមគោលការណ៍នៃរបបរាជានិយមអាស្រ័យរដ្ឋធម្មនុញ្ញ ក៏ប៉ុន្តែ ព្រះមហាក្សត្រិយ៍ អេលីហ្សាបិត ទី២ គឺជាក្សត្រមួយរូបដ៏មានឥទ្ធិពលនយោបាយ និងប្រជាប្រិយភាព ទាំងប្រជាប្រិយភាព នៅក្នុងចំណោមប្រជារាស្ត្រអង់គ្លេស ក៏ដូចជា ប្រជាប្រិយភាពនៅលើឆាកអន្តរជាតិ។
គិតត្រឹមថ្ងៃសោយទីវង្គត ព្រះមហាក្សត្រិយ៍ អេលីហ្សាបិត ទី២ បានគ្រងរាជ្យសម្បត្តិ ក្នុងរយៈពេល ៧០ឆ្នាំ ៧ខែ និង២ថ្ងៃ ដែលជារយៈពេលមួយយូរបំផុតមិនធ្លាប់មាននៅក្នុងប្រវត្តិសាស្រ្តអង់គ្លេស ហើយជាស្តេចដែលបានគ្រងរាជ្យយូរជាងគេលំដាប់ទីពីរនៅក្នុងប្រវត្តិសាស្រ្តពិភពលោក បន្ទាប់ពីស្តេច Luis XIV របស់បារាំង ហើយយូរជាងព្រះមហាក្សត្រថៃ ភូមិបុលអាប់ឌុលយ៉ាដេត។
នៅក្នុងឋានៈជាព្រះមហាក្សត្រិយ៍របស់រាជាណាចក្រអង់គ្លេស ព្រះមហាក្សត្រិយ៍ អេលីហ្សាបិត ទី២ មិនត្រឹមតែជាប្រមុខរដ្ឋរបស់អង់គ្លេសតែមួយនោះទេ តែជាប្រមុខរដ្ឋរបស់ប្រទេសជាច្រើនផ្សេងទៀត ក្នុងនោះ ក៏មានដែរ ប្រទេសធំៗ ដូចជា កាណាដា អូស្រ្តាលី និងនូវែលសេឡង់ ជាដើម។ ហើយនៅក្នុងឋានៈជាប្រមុខរដ្ឋអង់គ្លេស ក្នុងរយៈពេលជាង ៧០ឆ្នាំកន្លងទៅនេះ ព្រះមហាក្សត្រិយ៍ អេលីហ្សាបិត ទី២ បានឆ្លងកាត់នាយករដ្ឋមន្រ្តីរហូតដល់ទៅ ១៥រូប ដោយរាប់ចាប់តាំងពី Winston Churchill នៅពេលដែលទ្រង់ទើបនឹងឡើងគ្រងរាជ្យ រហូតមកដល់ Liz Truss ដែលព្រះអង្គបានទទួលជួប និងចាត់តាំងជានាយករដ្ឋមន្រ្តី កាលពីថ្ងៃទី៧កញ្ញា ពោលគឺ តែមួយថ្ងៃប៉ុណ្ណោះ មុនពេលទ្រង់សោយទិវង្គត។ នេះគឺជានិមិត្តរូបដ៏សំខាន់មួយ នៃក្សត្រដែលបំពេញតួនាទី និងករណីយកិច្ចរហូតដល់ដង្ហើមចុងក្រោយ ស្របទៅតាមអ្វី ដែលព្រះអង្គធ្លាប់បានសន្យាជាសាធារណៈ កាលពីឆ្នាំ១៩៤៧ នៅក្នុងអំឡុងខួបគម្រប់ ២១ព្រះវស្សាថា នឹងចំណាយពេលពេញមួយជីវិតរបស់ទ្រង់ ទោះជាខ្លី ឬវែង ដើម្បីបម្រើប្រទេស និងប្រជារាស្រ្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ