ឱ្យលុយអ៊ុយក្រែនខ្ចី អឺរ៉ុបអាចប្រឈមនឹងហានិភ័យនយោបាយក្នុងស្រុក ?
ក្នុងជំនួបប្រជុំថ្នាក់រដ្ឋមន្ត្រីក្រសួងហិរញ្ញវត្ថុអឺរ៉ុប នៅទីក្រុងប្រាក ប្រទេសឆែក ដែលប្រព្រឹត្តទៅពីរថ្ងៃ ពីថ្ងៃសុក្រទី៩ដល់ថ្ងៃសៅរ៍ទី១១កញ្ញា សហភាពអឺរ៉ុបបានសម្រេចបើកទម្លាយកញ្ចប់ថវិកា ផ្តល់ជំនួយថ្មីតម្លៃ៥ពាន់លានអឺរ៉ូ ទៅឱ្យអ៊ុយក្រែន។ ជាប្រាក់កម្ចី ដែលមានទម្ងន់ផ្នែកហិរញ្ញវត្ថុផង និងផ្នែកនយោបាយផង សម្រាប់រដ្ឋាភិបាលរបស់សមាជិកអឺរ៉ុបជាច្រើនប្រទេស។ ហេតុអ្វី ?
ចុះផ្សាយនៅថ្ងៃ៖
ស្តាប់ - ០២:១៤
“អ៊ុយក្រែនត្រូវតែឈ្នះរុស្ស៊ីក្នុងសង្គ្រាមនេះ។ អ៊ុយក្រែនត្រូវតែទទួលបានសេរីភាព និងឯករាជ្យភាពពេញលេញវិញ បន្ទាប់ពីបានតស៊ូប្រយុទ្ធយ៉ាងអង់អាច។ សហភាពអឺរ៉ុប នឹងបន្តផ្តល់ការគាំទ្រនិងចូលរួមធ្វើយ៉ាងណាឱ្យអ៊ុយក្រែនបានសម្រេច សាមគ្គីភាពនិងសន្តិភាព”។ នេះជាប្រសាសន៍របស់លោកស្រីប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែន។
ហេតុដូច្នេះហើយបានជាសហភាពសម្រេចទម្លាយកញ្ចប់ថវិកាផ្តល់ជំនួយហិរញ្ញវត្ថុ ៥ពាន់លានអឺរ៉ូ ក្នុងទម្រង់ជាប្រាក់កម្ចី សម្រាប់ឱ្យអ៊ុយក្រែនយកទៅប្រើប្រាស់ប្រចាំថ្ងៃ ក្នុងវិស័យសេវាកម្មរដ្ឋ រដ្ឋបាល សាលារៀន មន្ទីរពេទ្យ ។ល។ និង។ល។ ទឹកប្រាក់នេះជាផ្នែកមួយនៃ ថវិកា ដែលសហភាពអឺរ៉ុបបានសម្រេចកាលពីខែឧសភាសម្រាប់អ៊ុយក្រែន។ មួយពាន់លានអឺរ៉ូ បានប្រគល់ឱ្យអ៊ុយក្រែនរួចហើយ។ ហើយសល់ប្រាក់បីពាន់លានអឺរ៉ូទៀត អឺរ៉ុបចង់សម្រេចបើកឱ្យនៅក្នុងជំនួបប្រជុំលើកក្រោយ។
ក្រោយឃើញសហរដ្ឋអាមេរិកសន្យាផ្តល់ជំនួយយោធាថ្មីបន្ថែមទៀតដល់អ៊ុយក្រែនចំនួន ២៨០០លានដុល្លារមក អឺរ៉ុបមិនចង់ស្ងៀមឈរអោបដៃទទេ និងចង់បង្ហាញថាសាមគ្គីភាពអន្តរជាតិមិនចុះថមថយឡើយ។ ប៉ុន្តែតើរដ្ឋាភិបាលនិងសហភាពអឺរ៉ុប អាចបន្តបញ្ចេញប្រាក់ ឱ្យអ៊ុយក្រែនបានរហូតដល់ពេលណា បើខ្លួនឯងក៏រុំរួតដោយវិបត្តិដែរនោះ ?
ជាក់ស្តែង នៅទីក្រុងប្រាក ប្រទេសសាធារណរដ្ឋឆែក ទីដែលរដ្ឋមន្ត្រីក្រសួងហិរញ្ញវត្ថុកំពុងជួបប្រជុំគ្នា មានពលរដ្ឋប្រមាណជាច្រើនម៉ឺននាក់ បាននាំគ្នាធ្វើបាតុកម្ម នៅថ្ងៃសៅរ៍ទី ១០កញ្ញានេះ ប្រឆាំងនឹងការឡើងថ្លៃឧស្ម័នហ្កាសផង ប្រឆាំងនឹងសហភាពអឺរ៉ុបនិងអង្គការអូតង់ផង។ បាតុករបានចោទប្រកាន់រដ្ឋាភិបាលឆែកថាគិតគូរអ៊ុយក្រែនខ្លាំងជាងគិតពីប្រទេសនិងពលរដ្ឋឯង។ ចុះថ្ងៃស្អែកដល់វេននរណា ?
គំនិតចង់រក្សាថវិកាសម្រាប់បម្រើអឺរ៉ុបខ្លួនឯងមុន និងសន្តិនិយម អាចនឹងរីកលូតលាស់ខ្លាំងក្នុងចំណោមប្រជាពលរដ្ឋអឺរ៉ុប នៅពេលរដូវត្រជាក់ធ្លាក់មកដល់ហើយពួកគេគ្មានមធ្យោបាយកម្តៅបំបាត់រងារ។ រោគសញ្ញានេះអាចនឹងលេចឡើងជាបន្តបន្ទាប់ ប្រសិនបើគណបក្សស្តាំអភិរក្សនិយមជ្រុលនៅស៊ុយអែត ជាប់ឆ្នោតសភា នៅថ្ងៃទី ១១កញ្ញាស្អែក និង នៅថ្ងៃទី ២៥កញ្ញាសម្រាប់អ៊ីតាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ