អឺរ៉ុបរឹតបន្តឹងអត្ថបទច្បាប់ ស្តីពីការនាំចូលទំនិញដែលពាក់ព័ន្ធនឹងការកាប់បំផ្លាញព្រៃឈើ
សភាអឺរ៉ុបបង្ហាញជំហរតឹងរ៉ឹងជាងគណៈកម្មការអឺរ៉ុប ដោយបានបោះឆ្នោតលើសេចក្តីព្រាងច្បាប់ស្តីពីការរឹតបន្តឹងការនាំចូលទំនិញទាំងឡាយណាដែលពាក់ព័ន្ធនឹងការកាប់បំផ្លាញព្រៃឈើ។ ជាមួយសំឡេងគាំទ្រ ៤៥៣ និងប្រឆាំង ចំនួន ៥៧សំឡេង សភាអឺរ៉ុបបានបង្កើនបញ្ជីសំណើរបស់គណៈកម្មការអឺរ៉ុប ដោយបានបន្ថែម មុខទំនិញថ្មី ដូចជា ពោត កៅស៊ូ ទៅក្នុងបញ្ជីមុខទំនិញ ដែលអាចពាក់ព័ន្ធនឹងការកាប់បំផ្លាញព្រៃឈើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ការប្រើប្រាស់ទំនិញ នាំចូលមកពីបរទេសបានធ្វើឲ្យអឺរ៉ុបជាអ្នកទទួលខុសត្រូវ ១៦%នៃការកាប់បំផ្លាញព្រៃឈើក្នុងពិភពលោក ពោលគឺស្ថិតនៅចំណាត់ថ្នាក់ទី ២បន្ទាប់ពីប្រទេសចិន។ ដូច្នេះ ដើម្បីកាត់បន្ថយកម្រិតចូលរួមរបស់ខ្លួន នៅក្នុងការបំផ្លាញព្រៃឈៃពិភពលោក គណៈកម្មការអឺរ៉ុបបានរៀបចំសំណើច្បាប់មួយ កាលពីពាក់កណ្តាលខែវិច្ឆិកា ឆ្នាំមុន ក្នុងគោលដៅ ហាមការនាំចូលទំនិញចំនួន ៦មុខ ដែលពាក់ព័ន្ធនឹងការកាប់បំផ្លាញព្រៃឈើ។ ទៅតាមសេចក្តីព្រាងរបស់គណៈកម្មការអឺរ៉ុប សណ្តែក ឈើ ដូងប្រេង កាកាវ និងកាហ្វេ ដែលគេដាំនៅលើដីចំការ ដែលបានមកពីការរាន កាប់បំផ្លាញព្រៃឈើ នៅក្រោយខែធ្នូឆ្នាំ ២០២០ នឹងត្រូវគេហាមមិនឲ្យនាំចូលទឹកដីអឺរ៉ុប។
នៅថ្ងៃអង្គារ នៅក្នុងការបោះឆ្នោត លើសំណើច្បាប់របស់គណៈកម្មការអឺរ៉ុប សភាអឺរ៉ុបនៅទីក្រុងStrasbourg ចង់ឲ្យគេចាត់វិធានការខ្លាំងមែនទែន ប្រឆាំងនឹងការកាប់បំផ្លាញព្រៃឈើនៅទឹកដីបរទេស ដោយបានសម្រេចបន្ថែមមុខទំនិញ មួយចំនួនទៀត ទៅក្នុងបញ្ជីខ្មៅរបស់គណៈកម្មការអឺរ៉ុប។ ទៅតាមសំណើរបស់សភាអឺរ៉ុប សាច់ជ្រូក ផលិតផលសាច់ចៀម សត្វសា្លប ពោត កៅស៊ូ ធ្យូងឈើ និងក្រដាសបោះពុម្ព ត្រូវហាមនាំចូលទឹកដីអឺរ៉ុប។ មួយវិញទៀត សភាអឺរ៉ុបចង់ឲ្យគេហាមនាំចូលទំនិញ ដែលពាក់ព័ន្ធនឹងការកាប់បំផ្លាញព្រៃឈើ នៅក្រោយ ខែ ធ្នូ ឆ្នាំ ២០១៩ ប៉ុន្តែ មិនមែននៅឆ្នាំ ២០២០ តាមសំណើរបស់គណៈកម្មការអឺរ៉ុប។
នៅក្នុងការអនុវត្តជាក់ស្តែង គឺក្រុមហ៊ុននាំចូលទំនិញ ដែលត្រូវទទួលខុសត្រូវ តាមដានមើលការអនុវត្តរបស់ម្ចាស់ផ្គត់ផ្គង់ទំនិញបរទេស ដោយពឹងផ្អែកលើប្រព័ន្ធដៅទីតាំងភូមិសាស្រ្ត និងរូបភាពផ្កាយរណប។ ក្រៅពីហាមចូលទំនិញ ដែលពាក់ព័ន្ធនឹងសកម្មភាពកាប់បំផ្លាញព្រៃឈើ សេចក្តីព្រាងច្បាប់របស់សភាអឺរ៉ុប ចង់រឹតបន្តឹងផងដែរស្ថាប័នហិរញ្ញវត្ថុដើម្បីធានាថា ស្ថាប័នទាំងនោះគ្មានសកម្មភាព ចូលរួម នៅក្នុងការកាប់បំផ្លាញព្រៃឈើនៅបរទេស។
នៅបន្ទាប់ពីការបោះឆ្នោតគាំទ្រនៅសភា អឺរ៉ុប នៅថ្ងៃអង្គារ សេចក្តីព្រាងច្បាប់ស្តីពីការប្រយុទ្ធប្រឆាំងនឹងការនាំចូលដែលពាក់ព័ន្ធនឹងការកាប់ព្រៃឈើ នឹងត្រូវយកទៅពិភាក្សាជាមួយប្រទេសសមាជិកនីមួយៗរបស់សហភាពអឺរ៉ុប មុននឹងត្រូវបោះឆ្នោត អនុម័តជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ