អឺរ៉ុបរៀបចំច្បាប់ហាមការនាំចូល នាំចេញ និងលក់ក្នុងទីផ្សារអឺរ៉ុបនូវផលិតផលដែលប្រើកម្លាំងពលកម្មដោយបង្ខំ
នៅថ្ងៃពុធ ទី១៤ កញ្ញា គណៈកម្មការអឺរ៉ុបបានបង្ហាញចេញនូវសេចក្តីព្រាងច្បាប់មួយស្តីពីការហាមមិនឲ្យមាននៅក្នុងទីផ្សារអឺរ៉ុបនូវផលិតផលដែលប្រើកម្លាំងពលកម្មដោយបង្ខំ។ សេចក្តីព្រាងច្បាប់របស់អឺរ៉ុបនេះបានសំដៅលើផលិតផលគ្រប់ប្រភេទដែលផលិតចេញពីការប្រើកម្លាំងពលកម្មដោយបង្ខំ ទោះជាការផលិតនោះបានធ្វើឡើងនៅទីកន្លែងណាក៏ដោយ។ ទោះបីជាអឺរ៉ុបមិនបានលើកឡើងចំប្រទេសណាមួយក៏ដោយក៏គេដឹងថា ចិនក៏ជាប្រទេសផ្ទាំងស៊ីបមួយដែរ។
ចុះផ្សាយនៅថ្ងៃ៖
ស្តាប់ - ០២:២៤
លោក Valdis Dombrovskis អនុប្រធានគណៈកម្មការអឺរ៉ុបបានបញ្ជាក់ដោយលំអិតថា សេចក្តីព្រាងច្បាប់របស់អឺរ៉ុបនឹងអនុវត្តលើគ្រប់ផលិតផលទាំងអស់ដែលផលិតចេញពីការប្រើកម្លាំងពលកម្មដោយបង្ខំ មិនថាផលិតផលនោះជាផលិតផលនាំចូល នាំចេញ ជាផលិតផលដែលផលិតលើទឹកដីអឺរ៉ុប ឬមួយក៏ផលិតនៅក្នុងប្រទេសណាមួយទេ។ វិធានការដូចគ្នានេះត្រូវបានរដ្ឋបាលអាមេរិកអនុវត្តតាំងពីខែធ្នូ ឆ្នាំ ២០២១ មកម្ល៉េះ។ តែអ្វីដែលខុសគ្នា រដ្ឋបាលក្រុងវ៉ាស៊ីនតោនសំដៅតែលើផលិតផលចិនផលិតនៅក្នុងខេត្តស៊ីនជាំងដែលរដ្ឋអំណាចចិនបានជាប់ចោទពីបទប្រើកម្លាំងពលកម្មរបស់ជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមដោយបង្ខំ។
មួយវិញទៀត វិធានការរបស់អាមេរិកក៏មិនសូវតឹងរឹងដែរ ប្រសិនបើរោងចក្រ សហគ្រាសមានភស្តុតាងគ្រប់គ្រាន់ដែលបញ្ជាក់ថា ផលិតផលរបស់ពួកគេមិនបានផលិតចេញពីការប្រើកម្លាំងពលកម្មលើជនជាតិភាគតិចអ៊ុយហ្គួរដោយបង្ខំនោះទេ។ សេចក្តីព្រាងច្បាប់របស់គណៈកម្មការអឺរ៉ុបមិនបានចង្អុលចំឈ្មោះប្រទេសណាមួយទេ។ តែចិនក៏ជាផ្ទាំងស៊ីបមួយដែរ ពិសេសផលិតផលដែលមកពីខេត្តស៊ីនជាំង។ តាមសេចក្តីព្រាងច្បាប់របស់គណៈកម្មការអឺរ៉ុប ប្រទេសសមាជិកអឺរ៉ុបនីមួយៗជាអ្នកទទួលបន្ទុកវាយតម្លៃលើផលិតផលដែលផលិតក្នុងស្រុក នាំចូល ឬនាំចេញដើម្បីចង់ដឹងថា តើជាផលិតផលផលិតចេញពីការប្រើកម្លាំងពលកម្មដោយបង្ខំឬអត់។
ចំណែកការវាយតម្លៃនេះទៀតអាចធ្វើឡើងដោយផ្អែកលើព័ត៌មានទទួលបានពីក្រុមអង្គការក្រៅរដ្ឋាភិបាល ឬពីប្រភពផ្សេង។ សមាជិកសភាអឺរ៉ុបជនជាតិអាល្លឺម៉ង់លោក Bernd Lange បានសាទរលើវិធានការរបស់អឺរ៉ុបដែលលោកចាត់ទុកជាវិធានការមួយដែលគ្មានលក្ខណៈរើសអើង និងស្របទៅនឹងច្បាប់របស់អង្គការពាណិជ្ជកម្មពិភពលោក។ « គឺជាការបោះមួយជំហានយ៉ាងសំខាន់នៅក្នុងការប្រយុទ្ធប្រឆាំងនឹងទាសភាពសម័យទំនើប » នេះជាប្រតិកម្មរបស់សមាជិកសភាអឺរ៉ុបជនជាតិបារាំងលោក Raphaël Gluckmann។ សូមបញ្ជាក់ថា បើយោងតាមអង្គការពលកម្មអន្តរជាតិ មានមនុស្សប្រមាណជា ២៧លាន ៦សែនក្នុងលោកត្រូវបានគេចាប់បង្ខំឲ្យធ្វើការងារ ក្នុងនោះ មាន ៣លាន ៣សែននាក់ជាកូនក្មេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ