លោកពូទីន គំរាមប្រើអាវុធនុយក្លេអ៊ែរ៖ ជាការសម្លុតលេង ឬជាការគំរាមមែន?
១ថ្ងៃបន្ទាប់ពីបានប្រកាស ថានឹងធ្វើប្រជាមតិភ្ជាប់តំបន់ដែលរុស្ស៊ីវាយដណ្តើមបាន មកក្នុងទឹកដីរុស្ស៊ី កាលពីថ្ងៃពុធម្សិលមិញនេះ លោកពូទីនបានប្រកាសថា នឹងកេណ្ឌកម្លាំងទ័ពបំរុងទូទាំងប្រទេស ចំនួន៣០ម៉ឺននាក់ ដើម្បីទៅប្រយុទ្ធនៅអ៊ុយក្រែន។ លោកពូទីនប្រកាសទៀតថា នឹងប្រើគ្រប់មធ្យោបាយទាំងអស់ដែលមាន នៅក្នុងគ្រឿងសព្វាវុធរុស្ស៊ី ដើម្បីការពាររុស្ស៊ីពីបំណងចង់បំផ្លាញរបស់ពួកលោកខាងលិច។ សម្ដីប្រកាសនេះ គឺមានន័យថា លោកពូទីន បានគំរាមថា រុស្ស៊ីអាចប្រើអាវុធនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានអំពាវនាវទៅក្រុមប្រទេសលោកខាងលិច ថាមិនត្រូវចាញ់ការសម្លុតនុយក្លេអ៊ែរ របស់ពូទីនឲ្យសោះ ព្រោះធាតុពិត ពូទីនមិនហ៊ានប្រើអាវុធនុយក្លេអ៊ែរទេ។
លោកអូឡាហ្វ ស្ហុល ប្រមុខរដ្ឋាភិបាលអាល្លឺម៉ង់ បានប្រតិកម្មថា លោកពូទីនកំពុងតែធ្វើឲ្យស្ថានការណ៍វិបត្តិ ដែលខ្លួនឯងបានបង្កើតឡើង កាន់តែផុងជ្រៅទៅៗ។ លោកអះអាងថា ពូទីនមិនអាចឈ្នះសង្គ្រាមនេះបានទេ។ ដូចគ្នាដែរ លោកប្រមុខការទូតអឺរ៉ុប បានលើកឡើងថា ការប្រកាសកេណ្ឌទ័ពបម្រុង ព្រមទាំងគំរាមប្រើអាវុធនុយក្លេអ៊ែរនេះ គឺជាសញ្ញា “បរាជ័យអស់សង្ឃឹម” របស់លោកពូទីនហើយ។
ដោយឡែក សេតវិមានអាមេរិកវិញ បានប្រតិកម្មថា អាមេរិកមិនបានចាត់ទុកសម្តីគំរាមរបស់លោកពូទីន ជាការលេងសើចទេ។ លោក John Kirby អ្នកនាំពាក្យក្រុមប្រឹក្សាសន្តិសុខជាតិអាមេរិក បានប្រាប់ទូរទស្សន៍ ABC ថា អាមេរិកបន្តតាមដានដោយប្រុងប្រយ័ត្ន ហើយអាចផ្លាស់ប្តូរជំហរយុទ្ធសាស្ត្រ ប្រសិនបើមានករណីចាំបាច់។
យ៉ាងណាក៏ដោយ យោងតាមការវិភាគរបស់លោក វរសេនីយ៍ឯក ព្យែរ ដឺហ្សុង អតីមន្ត្រីទ័ពបារាំងម្នាក់ គឺថាសម្តីគំរាមប្រើនុយក្លេអ៊ែររបស់លោកពូទីននេះ គឺវាគ្មានន័យអ្វីទាល់តែសោះ ព្រោះវាផ្ទុយពីយុទ្ធសាស្ត្រសម្លុតគ្នា ដោយប្រើអាវុធនុយក្លេអ៊ែរ។
សម្រង់ប្រសាសន៍លោក វរសេនីយ៍ឯក Pierre De Jong
“ជាបឋមគឺថា ភាគីរុស្ស៊ីតែងតែបានបញ្ចូលការសន្យា ចៀសវៀងមិនប្រើអាវុធនុយក្លេអ៊ែរ ទៅក្នុងទ្រឹស្តីយោធារបស់គេ សូម្បីតែនៅក្នុងទ្រឹស្តីកម្រិតទី១ក៏ដោយ ដែលមានអាវុធនុយក្លេអ៊ែរតាក់ទិក។ ហើយទី២ គឺគម្រោងធ្វើប្រជាមតិ ដែលរុស្ស៊ីបានប្រកាសកាលពីថ្ងៃម្សិលមិញ ដែលមានន័យថា រុស្ស៊ីនឹងភ្ជាប់ជាផ្លូវការ នូវដែនដីអ៊ុយក្រែនដែលខ្លួនវាយដណ្តើមបាន មកក្នុងដែនដីរបស់រុស្ស៊ី។
មានន័យថាចាប់ពីពេលនេះទៅ រុស្ស៊ីអាចវាយចូលដល់ដែនដីអ៊ុយក្រែន មិនថានៅដុនបាស នៅខែរសុន ឬនៅតំបន់ណាផ្សេងទៀត ហើយរុស្ស៊ីនឹងអាចប្រើអាវុធនុយក្លេអ៊ែរបានទាំងអស់។ នេះគឺជាចំណុចសំខាន់ ដែលគួរចាប់អារម្មណ៍ ហើយដែលលោកពូទីន បានយកវាមកដាក់លើតុ ដើម្បីសម្រេចចិត្តធ្វើ។
ដូច្នេះ តើយើងត្រូវមានប្រតិកម្មបែបណា ចំពោះអ្វីដែលលោកពូទីនប្រកាសនេះ? អ្វីដែលសំខាន់ គឺត្រូវតែធ្វើឲ្យពូទីន ឈប់ច្រលោតខែងរ៉ែងតទៅទៀត។ យើងឃើញហើយថា ពីមួយថ្ងៃទៅមួយថ្ងៃ ពូទីនកាន់តែក្តៅក្រហល់ក្រហាយខ្លាំងទៅៗ។ ជាកំហឹង គំរាមប្រើនុយក្លេអ៊ែរ ដែលគ្មានន័យទាល់តែសោះ ព្រោះថា បើរុស្ស៊ីប្រើនុយក្លេអ៊ែរ រុស្ស៊ីខ្លួនឯងក៏នឹងរងការវាយប្រហារ ដោយនុយក្លេអ៊ែរទៅវិញដែរ។ ដូច្នេះសម្រាប់កាលៈទេសៈពេលនេះ គឺការសន្យាមិនប្រើនុយក្លេអ៊ែរ មិនអាចធ្វើទៅបានទេ ព្រោះថាគេត្រូវប្រើនុយក្លេអ៊ែរដើម្បីសម្លុតនុយក្លេអ៊ែរ។”
គួរបញ្ជាក់ដែរថា ក្រោយលោកពូទីនប្រកាសកេណ្ឌទ័ពបម្រុង ព្រមទាំងសម្លុតប្រើអាវុធនុយក្លេអ៊ែរនេះ រដ្ឋាភិបាលចិនបានប្រកាសអំពាវនាវ ឲ្យភាគីជម្លោះ ត្រូវទម្លាក់អាវុធ ហើយងាកមកស្វែងរកការចរចា។ ក្រសួងការបរទេសចិនបានសង្កត់ធ្ងន់ ពីភាពចាំបាច់ នៅក្នុងការគោរពអធិបតេយ្យភាព បូរណភាពដែនដី របស់ប្រទេសនីមួយៗ ដែលត្រូវបានការពារដោយច្បាប់អន្តរជាតិ។ ការប្រកាសរបស់ចិននេះ ហាក់ជាសញ្ញាបង្ហាញថា ចិនកំពុងតែដកខ្លួនឆ្ងាយបន្តិច លែងគាំទ្ររុស្ស៊ី ខ្លាំងដូចពេលមុនៗ ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ