ក្រោយប្រកាសយកដីអ៊ុយក្រែនរួចរាល់ លោកពូទីនហៅឲ្យអ៊ុយក្រែន ត្រូវដាក់អាវុធនិងចូលតុចរចា
កាលពីថ្ងៃសុក្រទី៣០កញ្ញា លោកប្រធានាធិបតីពូទីន បានចុះហត្ថលេខា ប្រកាសជាឱឡាឫក ចាត់បញ្ចូលដែនដីទាំង៤របស់អ៊ុយក្រែន គឺតំបន់លីហ្កង់ស្ក៍ តំបន់ដូណេតស៍ តំបន់ហ្សាប៉ូរីចា និងតំបន់ឃឺសិន មកក្នុងទឹកដីរបស់សហព័ន្ធរុស្ស៊ី។ ក្នុងឱកាសនោះ លោកពូទីន ក៏បានប្រកាសហៅឲ្យអ៊ុយក្រែន ត្រូវតែទំលាក់អាវុធ ហើយងាកមកចូលតុចរចា។ តែយ៉ាងណា អ៊ុយក្រែន បានឆ្លើយតបថា ដរាបណាលោកពូទីននៅតែដឹកនាំរុស្ស៊ី អ៊ុយក្រែននឹងមិនចរចាជាដាច់ខាត។
ចុះផ្សាយនៅថ្ងៃ៖
ស្តាប់ - ០២:២៥
លោកពូទីន បានថ្លែងសុន្ទរកថា រយៈពេលជិតមួយម៉ោង នៅវិមានក្រឹមឡាំង ចំពោះមុខសមាជិករដ្ឋាភិបាល សមាជិកសភា និងក្រុមអ្នកមានអំណាចរុស្ស៊ី ព្រមទាំងតំណាងសាសនាផង។ ក្រោយចប់សុន្ទរកថា លោកបានចុះហត្ថលេខា លើឯកសារផ្លូវការ ដែលបញ្ចូល តំបន់លូហ្កង់ស្ក៍ តំបន់ដូណេតស៍ តំបន់ហ្សាប៉ូរីចា និងតំបន់ឃឺសិន មកក្នុងទឹកដីនៃសហព័ន្ធរុស្ស៊ី។
នៅពេលលោកពូទីន ចាប់ដៃជាមួយមេដឹកនាំនៃតំបន់ទាំង៤ ហើយបានស្រែកបន្ទរព្រមគ្នាថា “រុស្ស៊ី” អ្នកកាសែតនិយាយក្នុងទូរទស្សន៍ Rossiya 24 ដែលផ្សាយបន្តផ្ទាល់ផ្តិតយករូបភាពកម្មវិធីនេះ បាននិយាយថា រូបភាពនេះ គឺជារូបភាពចារក្នុងប្រវត្តិសាស្ត្រ របស់រុស្ស៊ី។
គួរបញ្ជាក់ថា នៅក្នុងខ្លឹមសារនៃសុន្ទរកថា លោកពូទីនបានលើកឡើងថា អ៊ុយក្រែនត្រូវតែឈប់ប្រយុទ្ធជាបន្ទាន់ ហើយត្រូវងាកមកចូលតុចរចា។ លោកពូទីន បាននិយាយយ៉ាងវែងអន្លាយ ចោទក្រុមប្រទេសលោកខាងលិច ដែលមានអាមេរិកជាមេដំបូល ថាជាអ្នកដែលចង់អនុវត្ត “ប្រព័ន្ធអាណានិគមសម័យថ្មី” មកលើរុស្ស៊ី ក្រោយដែលពេលសហភាពសូវៀតបានដួលរលំ។ លោកពូទីនអះអាងទៀតថា លោកគ្មានបំណងណាមួយ ចង់ធ្វើឲ្យសហភាពសូវៀត រស់ឡើងវិញម្តងទៀត ដូចដែលពួកលោកខាងលិចចោទនោះទេ ព្រោះសហភាពសូវៀត បានស្លាប់បាត់ទៅហើយ។
ក្រោយសុន្ទរកថារបស់លោកពូទីននេះ លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានថ្លែងសារតាមវីដេអូភ្លាមៗ ថា “ដរាបណា ពូទីននៅតែកាន់អំណាចនៅរុស្ស៊ី គឺអ៊ុយក្រែននឹងមិនចូលតុចរចា ជាមួយរុស្ស៊ីជាដាច់ខាត។ អ៊ុយក្រែននឹងបន្តប្រយុទ្ធ ដើម្បីប្រមូលទឹកដីរបស់ខ្លួន ដែលរុស្ស៊ីប្លន់ទៅមកវិញឲ្យបាន ហើយអ៊ុយក្រែនព្រមចរចា នៅពេលណារុស្ស៊ីមានប្រធានាធិបតីថ្មី។ លោកហ្សេឡេនស្គី បានប្រកាសបញ្ជាក់ថា អ៊ុយក្រែន នឹងអនុម័តបេក្ខភាពសុំចូលជាសមាជិករបស់អង្គការសម្ព័ន្ធមិត្តអូតង់។
សូមបញ្ជាក់ដែរថា ក្រោយការប្រកាសជាផ្លូវការ បញ្ចូលតំបន់ទាំង៤នៅខាងត្បូង និងខាងកើតអ៊ុយក្រែន ទៅក្នុងទឹកដីរុស្ស៊ីនេះ ប្រតិកម្មបានធ្លាក់ចេញជាបន្តបន្ទាប់ ពីសហគមន៍អន្តរជាតិ។ សហភាពអឺរ៉ុបបានអះអាងថា គេមិនទទួលស្គាល់ជាដាច់ខាត។ ដូចគ្នាដែរលោកប្រធានាធិបតី ចូ បៃដិន និងលោកស្រី លីហ្ស ត្រាស្ស បានអះអាងថា គ្មានថ្ងៃជាដាច់ខាត ដែលអាមេរិកនិងអង់គ្លេស ទទួលស្គាល់ដែនដីថ្មី ដែលរុស្ស៊ីបានប្លន់ពីអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ