សហភាពអឺរ៉ុបអនុម័តទណ្ឌកម្មកញ្ចប់ទី៨ ដើម្បីពិន័យរុស្ស៊ីដែលប្លន់ទឹកដីអ៊ុយក្រែន
ក្រុមប្រទេសសហភាពអឺរ៉ុប បានសម្រេចអនុម័តកាលពីរសៀលថ្ងៃទី៥កក្កដា នូវវិធានការទណ្ឌកម្មកញ្ចប់ទី៨ ដាក់ទៅលើរុស្ស៊ី។ កម្មវត្ថុចំបងនៃកញ្ចប់ទណ្ឌកម្មថ្មីនេះ គឺសំដៅវាយឲ្យចំវិស័យនាំចេញប្រេង របស់រុស្ស៊ី។ ជាទណ្ឌកម្មដែលអឺរ៉ុប ចង់ឆ្លើយតប ចំពោះការដែលរុស្ស៊ី បានកាត់យកដែនដីតំបន់ចំនួន៤របស់អ៊ុយក្រែន ប្រកាសយកទៅធ្វើជាទឹកដីរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
យោងតាមអ្នករាយការណ៍ព័ត៌មានវិទ្យុបារាំងRFI ប្រចាំនៅក្រុងព្រុចសែល គឺការចរចាគ្នារវាងក្រុមប្រទេសសមាជិកអឺរ៉ុប បានប្រព្រឹត្តិធ្វើទៅយ៉ាងលំបាក ទាក់ទិននឹងវិធានការ វាយបំបាក់ការនាំចេញប្រេងរបស់រុស្ស៊ី។ អឺរ៉ុបបានស្នើឲ្យកំណត់អត្រាតម្លៃអតិបរមា លើប្រេងដែលនាំចូល ដឹកមកតាមកាប៉ាល់។ តែប្រទេសស៊ីពរ៍ ម៉ាល់តិ៍ និងក្រិក បានជំទាស់ ដោយបានលើកហេតុផលថា វានឹងហុចប្រយោជន៍ឲ្យតួកគី ព្រោះតួកគីនឹងមិនជាប់បំរាមនេះទេ។
ក្នុងចំណោមទណ្ឌកម្មដែលអឺរ៉ុប ទើបតែសម្រេចដាក់ទៅលើរុស្ស៊ី គឺមានការហាមឃាត់ការនាំចេញ ផលិតផលធាតុផ្សំអេឡិចត្រូនិក គ្រឿងបំលាស់យន្តហោះ ព្រមទាំងសារធាតុគីមីមួយចំនួន។ ការហាមឃាត់ទាំងនេះ គឺសំដៅធ្វើឲ្យរុស្ស៊ី លែងមាន ឧបករណ៍សម្ភារៈយោធាបំពាក់ដោយបច្ចេកវិទ្យាទំនើបតទៅទៀត។ ដោយឡែក ទាក់ទិននឹងការហាមឃាត់ការនាំចូលពេជ្ររុស្ស៊ីវិញ ប្រទេសបែលហ្សិកបានប្រកែក មិនឲ្យកំណត់នៅក្នុងបញ្ជីទណ្ឌកម្មទេ។
ក្រៅពីនេះ មាននិតិបុគ្គល និងរូបវន្តបុគ្គលជាច្រើននាក់បន្ថែមទៀត ដែលជាប់ក្នុងបញ្ជីខ្មៅរបស់អឺរ៉ុប។ បុគ្គលទាំងនោះ សុទ្ធតែត្រូវគេចោទ ថាបានចូលរួមនៅក្នុងការរៀបចំការធ្វើប្រជាមតិ ដែលរុស្ស៊ីបានរៀបចំធ្វើ នៅតំបន់ទាំង៤របស់អ៊ុយក្រែន។ ប្រជាមតិដែលអឺរ៉ុបចាត់ទុកថាជាឆាកល្ខោន និងមិនអាចទទួលស្គាល់បានជាដាច់ខាត។
ដោយឡែកនៅចំពោះមុខអង្គសភាអឺរ៉ុប ឯក្រុងស្ត្រាសបួរឯណោះ កាលពីព្រឹកថ្ងៃពុធ លោកស្រីប្រធានគណកម្មការអឺរ៉ុប បានថ្លែងថា កងទ័ពអ៊ុយក្រែនកំពុងតែឈានទៅមានជ័យជំនះជាបន្តបន្ទាប់។ ដូច្នេះវាជាកាលៈទេសៈចាំបាច់ណាស់ ដែលអឺរ៉ុបត្រូវតែរក្សគោលជំហឲ្យមាំ បន្តជួយអ៊ុយក្រែន។
គួរបញ្ជាក់ថា នៅសភាអឺរ៉ុប ក្រុមសមាជិកសភាមកពីគ្រប់ក្រុមគ្រប់បក្សទាំងអស់ បានបង្ហាញជំហស្របគ្នា ថាត្រូវតែបន្តផ្តល់គ្រឿងសព្វាវុធទៅឲ្យអ៊ុយក្រែន ហើយត្រូវតែពង្រឹងទណ្ឌកម្មដាក់ពិន័យទៅលើរបបដឹកនាំរបស់លោកពូទីន។ លោក Bernard Guetta សមាជិកសភាអឺរ៉ុបម្នាក់ បានលើកឡើងថា លោកពូទីនកំពុងតែទ័លច្រកហើយ ជាមួយនឹងបរាជ័យយ៉ាងអាម៉ាស់នៅអ៊ុយក្រែន។ លោកអះអាងថា មន្ត្រីធំៗក្នុងជួរអ្នកមានអំណាចនៅរុស្ស៊ី បានចាប់ផ្តើមចេញមុខរិះគន់ និងឈប់គាំទ្រ សម្រែកស្រេកឃ្លានសង្គ្រាមរបស់លោកពូទីនតទៅទៀតហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ