ប្រមុខចារកិច្ចអង់គ្លេសថាត្រូវរកវិធីទប់ទល់នឹងកំណើនវិស័យបច្ចេកវិទ្យាចិន
វិស័យបច្ចេកវិទ្យាចិន មានកំណើននិងសន្ទុះខ្លាំងក្លា រហូតក្លាយជាបញ្ហា កាន់តែបន្ទាន់ឡើងៗ។ នេះបើតាមការអះអាងរបស់លោក Jeremy Fleming ប្រមុខចារកិច្ចអង់គ្លេសដែលជំរុញឱ្យក្រុមប្រទេសលោកខាងលិច ត្រូវតែរកវិធីទប់ទល់ ដើម្បីការពារតម្លៃនិងឥទ្ធិពលរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:១១
បច្ចេកវិទ្យា មិនមែនត្រឹមតែក្លាយជាវិស័យកំពុងពេញនិយម មានការប្រកួតប្រជែងគ្នាខ្លាំង និងមានកិច្ចសហប្រតិបត្តិការគ្នាទេ ប៉ុន្តែបច្ចេកវិទ្យាក៏បាននិងកំពុងក្លាយជាសមរភូមិសម្រាប់ត្រួតត្រានិងផ្សព្វផ្សាយឥទ្ធិពលទៀត។ នេះជាពាក្យទទូចរបស់លោកប្រមុខចារកិច្ចអង់គ្លេស ដោយពន្យល់ថា ចិនកំពុងស្វះស្វែងត្រួតត្រាក្នុងវិស័យបច្ចេកវិទ្យាថ្មីៗ ក្នុងផ្នែកផ្កាយរណបតាមរយៈកម្មវិធីចង្អុលផ្លូវដោយផ្កាយរណបបៃឌូ ឬក្នុងផ្នែករូបិយបណ្ណឌីជីថល តាមរយៈគម្រោងយ័នឌីជីថល ។ល។ និង។ល។
ក្នុងវិស័យបច្ចេកវិទ្យា សកម្មភាពនយោបាយរបស់រដ្ឋចិន គឺជាបញ្ហាកាន់តែបន្ទាន់ឡើងៗ ដែលយើងត្រូវតែគិតគូររកវិធីទប់ទល់ ព្រោះសម្រាប់មេដឹកនាំចិន បច្ចេកវិទ្យាជាមធ្យោបាយក្រសោបយកទីផ្សារមកគ្រប់គ្រង ផ្សាយឥទ្ធិពល លើប្រជាពលរដ្ឋចិនរបស់គេទេ។ ថ្វីបើសហគមចិន នៅអង់គ្លេសបានចូលរួមចំណែកកសាងប្រទេស និងមិនមែនជាបញ្ហាសម្រាប់ប្រទេសអង់គ្លេសក្តី ក៏សម្រាប់លោកប្រមុខចារកិច្ច ក្រុមបស្ចិមលោកត្រូវតែបញ្ចេញសកម្មភាព ដោយធ្វើវិនិយោគវិស័យបច្ចេកវិទ្យាសម្រាប់អនាគត។
នៅពេលចិនចាប់ពង្រីកឥទ្ធិពលនិងបច្ចេកវិទ្យាចិនផ្ទាល់ បន្តិចម្តងៗនៅលើពិភពលោក ជាពិសេសនៅតាមបណ្តាប្រទេសកំពុងអភិវឌ្ឍន៍ ប្រទេសលោកខាងលិចក៏ត្រូវតែមានសមត្ថភាពផ្តល់ដំណោះស្រាយផ្សេង ងាយស្រួល និងអាចទទួលយកបានដែរ។
សម្រាប់លោក Fleming ចិនកំពុងប្រើគ្រប់វិធីដើម្បីផ្តួលកុងសង់ស៊ុសអន្តរជាតិក្រោយសង្គ្រាម ស្តីពីសេដ្ឋកិច្ចនិងបច្ចេកវិទ្យា។ ក្នុងក្រសែភ្នែកមេដឹកនាំចិន រដ្ឋផ្សេងប្រទេសផ្សេង ជាគូប្រជែង ឬជាអតិថិជន ដែលត្រូវតែរងការគំរាម ត្រូវតែទិញយក ឬត្រូវបង្ខំឱ្យទិញ។
ប៉េកាំងបានបញ្ចេញប្រតិកម្មតបវិញភ្លាមថាទស្សនៈរបស់លោកប្រមុខចារកិច្ចអង់គ្លេស គ្មានមូលដ្ឋាន។ ចិនអភិវឌ្ឍវិស័យហិរញ្ញវត្ថុនិងបច្ចេកវិទ្យា ក្នុងបំណងធ្វើឱ្យជីវិតប្រជាជនចិនបានប្រសើរឡើង។ ចិនគ្មានប៉ង និងគំរាមកំហែងប្រទេសណាទេ៕ នេះបើតាមប្រសាសន៍របស់អ្នកនាំពាក្យក្រសួងការបរទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ