ការផ្ទុះអណ្តូងរ៉ែធ្យូងថ្មនៅតួកគីសម្លាប់មនុស្សយ៉ាងតិច៤០នាក់
ក្រុមអ្នកជួយសង្គ្រោះ កំពុងស្វែងរក កម្មកររ៉ែ ដែលបានបាត់ខ្លួននៅឯអណ្តូងរ៉ែធ្យូងថ្មនៅភាគខាងជើងប្រទេសតួកគី។ ការផ្ទុះអណ្តូងរ៉ែកាលពីថ្ងៃសុក្រនេះបានសម្លាប់មនុស្សយ៉ាងហោចណាស់ ៤០ នាក់។ នេះត្រូវបានគេចាត់ទុកជាឧបទ្ទវហេតុឧស្សាហកម្មដ៏អាក្រក់បំផុតមួយ របស់ប្រទេសក្នុងកំឡុងពេលប៉ុន្មានឆ្នាំកន្លងមកនេះ។ ជាសរុបកម្មករ ៥៨ នាក់ត្រូវបានជួយសង្គ្រោះពីអណ្តូងរ៉ែរួចមកហើយ តែនៅមាន មនុស្សជាច្រើននាក់ទៀតកំពុងនៅជាប់ក្រោមគំនរ ឬបាត់ខ្លួន។
ចុះផ្សាយនៅថ្ងៃ៖
ស្តាប់ - ០១:៣៥
រហូតមកដល់ពេលនេះ ក្រុមសង្គ្រោះបន្ទាន់បានធ្វើការ ឥតឈប់ឈរ ជីកថ្ម រាវរក អ្នកនៅរស់រានមានជីវិតបន្ថែមទៀត។ ក្រុមគ្រួសារ និងមិត្តភក្តិរបស់អ្នកបាត់ខ្លួនបានមកនៅ ក្បែរកន្លែងកើតហេតុផងដែរ ចាំស្តាប់ព័ត៌មានអំពីអ្នកជាទីស្រលាញ់របស់ពួកគេ ។
ម្សិលមិញ ល្ងាចរសៀល ពេលថ្ងៃជិតលិច ការផ្ទុះនេះត្រូវបានគេជឿថា កើតឡើងនៅក្នុងជម្រៅប្រហែល ៣០០ ម៉ែត្រ នៅក្នុងអណ្តូងរ៉ែមានដែល កម្មករប្រហែល ១១០នាក់ កំពុងធ្វើការ។ រដ្ឋមន្ត្រីក្រសួងមហាផ្ទៃ បាននិយាយថាពេលនោះមានកម្មករចំនួនប្រហែល ៤៩ នាក់ កំពុងធ្វើការនៅក្នុងតំបន់ គ្រោះថ្នាក់ ចន្លោះពី ៣០០ ទៅ ៣៥០ ម៉ែត្រក្រោមដី។
លោកប្រធានាធិបតីតួកគី បានសម្តែងការសោកស្តាយជាខ្លាំង និងសូមចូលរួមចែករំលែកទុក្ខជាមួយ ក្រុមគ្រួសារអ្នកស្លាប់។ លោកបានសន្យាថានឹងចុះទៅដល់ទីតាំងនៅក្នុងថ្ងៃសៅរ៍នេះ ទាមទារឲ្យមាន ការស៊ើបអង្កេតរកហេតុផល ដោយភាពហ្មត់ចត់។
យោងតាមទីភ្នាក់ងារគ្រប់គ្រងគ្រោះមហន្តរាយ របស់ប្រទេសតួកគី បានឱ្យដឹងថា ក្រុមអ្នកជួយសង្គ្រោះជាច្រើននាក់ ត្រូវបានបញ្ជូនទៅកាន់តំបន់នោះ រួមមាន ក្រុមមកពីខេត្តជិតខាងផងដែរ។ ឥលូវនេះក្រុមសង្គ្រោះចំនួន ៧០នាក់បានជីកដល់ចំនុច២៥០ម៉ែត្រក្រោមដីហើយ។
រដ្ឋមន្ត្រីក្រសួងថាមពល បាននិយាយនៅកន្លែងកើតហេតុកាលថា ប្រតិបត្តិការជួយសង្គ្រោះ កំពុងខិតជិតដល់ទីបញ្ចប់។ អ្នកជីករ៉ែ ២៨ នាក់បានរងរបួសធ្ងន់ធ្ងរដោយសារការបំផ្ទុះនេះ។
សហជីពកម្មកររុករករ៉ែ បានសន្មតថាការផ្ទុះនេះ បានកើតឡើងដោយសារឧស្ម័នមេតាន ប៉ុន្តែមន្ត្រីផ្សេងទៀតបាននិយាយថា យើងមិនអាចធ្វើការសន្និដ្ឋាន ដោយភាពច្បាស់លាស់ជុំវិញមូលហេតុនៃគ្រោះថ្នាក់នេះបាននៅឡើយទេ។
កន្លងមក ប្រទេសតួកគីបានធ្លាប់ជួបប្រទះ គ្រោះមហន្តរាយការផ្ទុះអណ្តូងរ៉ែក្នុងឆ្នាំ ២០១៤ ម្តងរួចមកហើយ ដែលធ្វើឲ្យមនុស្ស ៣០១ នាក់បានស្លាប់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ