កងទ័ពរុស្ស៊ីទទួលស្គាល់ “ស្ថានការណ៍លំបាកខ្លាំង” នៅក្រុងឃែរសុន ហើយប្រកាសជម្លៀសប្រជាជន
នៅថ្ងៃពុធទី១៩តុលា កងទ័ពរុស្ស៊ីបានទទួលស្គាល់ថា ស្ថានការណ៍ប្រយុទ្ធនៅក្រុងឃែរសុន កំពុងតែតានតឹង និងលំបាកខ្លាំងណាស់ ដោយសារតែកងទ័ពអ៊ុយក្រែន សំរុកវាយសង្គ្រប់ខ្លាំងមកលើ។ មេទ័ពរុស្ស៊ី ដែលទទួលបន្ទុកប្រតិបត្តិការយោធារុស្ស៊ីនៅអ៊ុយក្រែន បានប្រកាសតាមទូរទស្សន៍ ថាភាគីខ្លួនកំពុងតែជម្លៀសប្រជាជន ចេញពីតំបន់ក្រុងឃែរសុន ព្រោះតំបន់នេះអាចប្រឈមខ្លាំងនឹងការឡោមព័ទ្ធ បិទផ្លូវពីកងទ័ពអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៣៨
នៅតាមកញ្ចក់ទូរទស្សន៍រុស្ស៊ី Rossiya 24 មេបញ្ជាការទ័ពរុស្ស៊ី Sergueï Sourovikine ដែលទើបតែចូលកាន់មុខតំណែងទទួលបន្ទុកប្រតិបត្តិការនៅអ៊ុយក្រែនបាន១០ថ្ងៃនោះ បានប្រកាសថា ស្ថានការណ៍នៅក្រុងឃែរសុន ទីក្រុងធំភាគខាងត្បូងអ៊ុយក្រែន កំពុងតែតានតឹងលំបាកខ្លាំង។ លោកបញ្ជាក់ថា ទីក្រុងដែលកងទ័ពរុស្ស៊ីគ្រប់គ្រងបានតាំងតែពីខែមីនានេះ កំពុងតែរងការបាញ់ប្លោងគ្រាប់ ពីសំណាក់កងទ័ពអ៊ុយក្រែន យ៉ាងដំណំបំផុត។ ការបាញ់ប្លោង ដែលលោកអះអាងថា អ៊ុយក្រែនបានសំដៅកំទេច ហេដ្ឋារចនាសម្ព័ន្ធសង្គមកិច្ច សេដ្ឋកិច្ច និងឧស្សាហកម្ម ។
គឺដោយហេតុនេះ កងទ័ពរុស្ស៊ីនឹងចាប់ផ្តើមជម្លៀសប្រជាជន ឲ្យចេញពីតំបន់ទីក្រុងឃែរសុននេះ ព្រោះការវាយប្រហាររបស់អ៊ុយក្រែន នឹងធ្វើឲ្យប៉ះពាល់ដល់បណ្តាញចរន្តអគ្គិសនី ទឹកស្អាត និងការផ្គត់ផ្គង់ចំណីអាហារ។ ពោលគឺអាយុជីវិតប្រជាជន នឹងត្រូវគំរាមកំហែង ដោយការវាយប្រហាររបស់កងទ័ពអ៊ុយក្រែន។ ដោយមិនបញ្ជាក់ឲ្យបានច្បាស់ លោកមេទ័ពរុស្ស៊ី Sergueï Sourovikine បានប្រលយពាក្យថា កងទ័ពរុស្ស៊ីអាចនឹងសម្រេចចិត្ត “ធ្វើរឿងដ៏លំបាកមួយ” ប្រសិនបើគ្មានជម្រើស។
ដោយឡែក ប្រភពពីលោក Vladimir Saldo មេដឹកនាំតំបន់ឃែរសុន ដែលរុស្ស៊ីបានលើកបន្តុប បានបញ្ជាក់ឲ្យដឹងថា អាជ្ញាធរខ្លួនកំពុងបើកប្រតិបត្តិការជម្លៀសប្រជាជន ចេញពីជ្រោយខាងស្តាំ ទៅជ្រោយខាងឆ្វេងនៃទន្លេ Dniepr វិញ ដើម្បីបើកផ្លូវ ឲ្យកងទ័ពរុស្ស៊ីរៀបចំសមរភូមិប្រយុទ្ធការពារឲ្យរឹងមាំ។
គួរបញ្ជាក់ដែរថា ខណៈដែលមេទ័ពរុស្ស៊ី បានទទួលស្គាល់ស្ថានការណ៍លំបាកនៅឃែរសុន ក្រសួងការពារជាតិរុស្ស៊ីឯណោះ បានអះអាងថា ទោះយ៉ាងណា កងទ័ពរុស្ស៊ីមិនចុះចាញ់ជាដាច់ខាត ហើយបានជោគជ័យច្រើនណាស់ តាមរយៈការបាញ់ប្លោង វាយប្រហារ ទៅលើទីតាំងយុទ្ធសាស្ត្រមួយចំនួនធំ របស់អ៊ុយក្រែន។
យោងតាមលោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី គិតចាប់ពីថ្ងៃទី១០តុលាមក យ៉ាងហោចណាស់ ៣០%នៃស្ថានីយ៍អគ្គីសនីអ៊ុយក្រែន ត្រូវបានកម្ទេចដោយគ្រាប់មីស៊ីលរបស់រុស្ស៊ី ដែលប្រការនេះ បានធ្វើឲ្យអ៊ុយក្រែន កំពុងជួបបញ្ហាគ្មានចរន្តអគ្គិសនីប្រើប្រាស់ សឹងតែពេញផ្ទៃប្រទេស។ រដូវរងារកាន់តែជិតមកដល់ ស្ថានភាពកាន់តែលំបាក ដោយសារគ្មានចរន្តអគ្គិសនី គ្មានម៉ាស៊ីនកំដៅ និងគ្មានទឹកប្រើប្រាស់។
លោកហ្សេឡេនស្គី បានបរិហារថ្កោលទោសផងដែរ ចំពោះការវាយប្រហាររបស់រុស្ស៊ីមកលើអាគារផ្ទះសម្បែងប្រជាជនស៊ីវីល ដោយប្រើយានដ្រូនអត្តឃាតដែលរុស្ស៊ីទិញពីអ៊ីរ៉ង់។ ក្នុងរវាង២៤ម៉ោងចុងក្រោយនេះ អ៊ុយក្រែនអះអាងថា រុស្ស៊ីបានបញ្ជាយានដ្រូន Shahed-136 ផលិតដោយអ៊ីរ៉ង់ ចំនួន៤៣គ្រឿង ឲ្យមកបំផ្ទុះសម្លាប់ប្រជាជនស៊ីវីល ដែលក្នុងនោះចំនួន៣៨គ្រឿងត្រូវបានកងទ័ពអ៊ុយក្រែន ស្ទាក់កំទេចបានទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ