សហភាពអឺរ៉ុបចង់បញ្ជៀសការប្រឈមមុខជាអចិន្ត្រៃយ៍ជាមួយប្រទេសចិន
នៅថ្ងៃសុក្រ ទី២១ តុលា សមាជិកអឺរ៉ុបទាំង ២៧ប្រទេសបានជជែកគ្នាពីនយោបាយការបរទេសថ្មីដែលត្រូវប្រកាន់យកជាមួយប្រទេសចិន។ តាមការប្រកាសរបស់ប្រធានក្រុមប្រឹក្សាអឺរ៉ុបលោក Charles Michel ថ្នាក់ដឹកនាំអឺរ៉ុបចង់បានគំរូនយោបាយការបរទេសមួយខុសពីសហរដ្ឋអាមេរិក។ តាមលោក Charles Michel នយោបាយការបរទេសដែលអឺរ៉ុបចង់បានជាមួយចិនជានយោបាយម៉ឺងម៉ាត់ និងមិនប្រឈមមុខដាក់ចិនជាប់ជាប្រចាំ។
ចុះផ្សាយនៅថ្ងៃ៖
ស្តាប់ - ០១:៤២
ក្នុងរយៈពេល ៣ម៉ោង ថ្នាក់ដឹកនាំអឺរ៉ុបបានជជែកគ្នាលើប្រធានបទស្តីពីទំនាក់ទំនងជាមួយប្រទេសចិន។ ថ្លែងនៅក្នុងសន្និសីទកាសែត ប្រធានក្រុមប្រឹក្សាអឺរ៉ុបលោក Charles Michel បានបញ្ជាក់ច្បាស់ៗថា អ្វីដែលថ្នាក់ដឹកនាំអឺរ៉ុបចង់បាននៅក្នុងទំនាក់ទំនងជាមួយចិន គឺការបន្តប្រកាន់ជំហរម៉ឹងម៉ាត់ដើម្បីការពារគោលការណ៍របស់អឺរ៉ុប លទ្ធិប្រជាធិបតេយ្យ និងសេរីភាពជាមូលដ្ឋាន។ តាមលោក Charles Michel សហភាពអឺរ៉ុបចង់បញ្ជៀសការប្រឈមមុខជាប់ជាប្រចាំជាមួយចិន។ អ្វីដែលប្រធានក្រុមប្រឹក្សាអឺរ៉ុបចង់និយាយនៅត្រង់ចំណុចនេះ គឺជម្រើសនយោបាយការបរទេសថ្មីរបស់អឺរ៉ុបជាមួយចិនដែលខុសពីអាមេរិក។
តែលោក Charles Michel មិនភ្លេចគូសបញ្ជាក់ពីសារៈសំខាន់ដែលអឺរ៉ុបត្រូវធ្វើការអភិវឌ្ឃន៍វិស័យយុទ្ធសាស្រ្តរបស់ខ្លួនជាមួយដៃគូផ្សេងទៀតលើលោក ពោលមិនត្រូវផ្តោតតែជាមួយប្រទេសណាមួយផ្តាច់មុខទេ។ និយាយពីទំនាក់ទំនងសេដ្ឋកិច្ចរវាងអឺរ៉ុប និងចិនត្រូវបានប្រធានក្រុមប្រឹក្សាអឺរ៉ុបលោក Charles Michel អះអាងថា មិនត្រូវមានភាគីណាមួយកេងចំណេញលើភាគីណាមួយទេ។ ចំណែកនៅក្នុងប្រធានបទស្តីពីសុខភាព និងការប្រែប្រួលអាកាសធាតុត្រូវបានលោក Charles Michel បញ្ជាក់ថា អឺរ៉ុបមានឆន្ទៈពិតប្រាកដដើម្បីសហការជាមួយចិន។
ដោយឡែក ប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែនបានអំពាវនាវឲ្យអឺរ៉ុបប្រយ័ត្នប្រយែងពីការពឹងផ្អែកលើចិននៅក្នុងវិស័យខ្លះ ពិសេសបច្ចេកវិទ្យាសំខាន់ៗដូចជាសឺមីកុងឌុចទ័រ និងលេហៈមួយចំនួន ដូចយ៉ាងលោហៈកម្រ ឬលីចូម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ