វិបត្តិនយោបាយអង់គ្លេស៖ លោកចនសុន និងស៊ូណាក់ ជួបនិយាយគ្នាអំពីសំណើបេក្ខភាពនាយករដ្ឋមន្ត្រីថ្មី
អង់គ្លេសកំពុងតែជាប់គាំងនយោបាយ បន្ទាប់ពីលោកស្រី លីស ត្រាស្ស បានលាឈប់ពីតំណែងនាយករដ្ឋមន្ត្រី ក្រោយកាន់ការងារ បានត្រឹមតែជាង៤០ថ្ងៃ។ គណបក្សអភិរក្សនិយមអង់គ្លេស ត្រូវបោះឆ្នោតរើសបេក្ខជននាយករដ្ឋមន្ត្រីថ្មីមកកាន់មុខងារនេះ។ កាលពីល្ងាចថ្ងៃសៅរ៍ទី២២តុលា បេក្ខជន២រូប ដែលគេរំពឹងថានឹងប្រជែងគ្នានោះ គឺលោក បូរីស ចនសុន និងលោក រីឈី ស៊ូណាក់ បានជួបនិយាយគ្នា ដើម្បីស្វែងរកការស្រុះស្រួលឈានទៅស្នើបេក្ខជនឈរឈ្មោះតែមួយ ដើម្បីដោះស្រាយវិបត្តិនេះឲ្យឆាប់ចប់។
ចុះផ្សាយនៅថ្ងៃ៖
ស្តាប់ - ០២:៤៣
លោកបូរីស ចនសុន បានបង្ខើចវិស្សមកាល ដើម្បីត្រលប់មកទីក្រុងឡុងដ៍វិញជាបន្ទាន់ បន្ទាប់ពីលោកស្រី លីស ត្រាស្ស បានលាចុះចេញពីមុខតំណែង។ គណបក្សអភិរក្សនិយម ត្រូវតែរកមនុស្សថ្មីមកជំនួស ជាបន្ទាន់ ដើម្បីកុំឲ្យកិច្ចការដឹកនាំប្រទេសត្រូវជាប់គាំង ខណៈវិបត្តិសេដ្ឋកិច្ចនិងសង្គម កំពុងតែយាយីប្រទេសអង់គ្លេសខ្លាំងបំផុត នាអំឡុងពេលនេះ។
បេក្ខជនដែលគេដឹងថា អាចមកប្រជែងដណ្ដើមមុខតំណែងនាយករដ្ឋមន្ត្រី គឺមាន៣នាក់ គឺលោកបូរីស ចនសុនអតីតនាយករដ្ឋមន្ត្រី លោករីឈី ស៊ូណាក់ អតីតរដ្ឋមន្ត្រីក្រសួងហិរញ្ញវត្ថុ និងលោកស្រី ផេននី ម័រដូនត៍ អតីតរដ្ឋមន្ត្រីទំនាក់ទំនងសភា។ មតិសាធារណៈអង់គ្លេស កំពុងចាប់អារម្មណ៍ខ្លាំង ចំពោះការប្រជែងគ្នាចុងក្រោយ រវាងបេក្ខភាពរបស់លោក បូរីស ចនសុន និងលោក រីឈី ស៊ូណាក់។
កាលពីល្ងាចថ្ងៃសៅរ៍ លោក ចនសុន និងលោកស៊ូណាក់ បានជួបនិយាយគ្នាតទល់តែ២នាក់ ហើយបើតាមការអះអាងរបស់បណ្តាញព័ត៌មានអង់គ្លេស គឺអ្នកទាំងពីរ មានបំណងនិយាយរកចំណុចស្របគ្នា ដើម្បីដាក់ស្នើបេក្ខជនរួមតែម្នាក់។ ធ្វើបែបនេះ គឺដើម្បីបញ្ចៀស កុំឲ្យមានការឈ្លោះប្រកែកគ្នានៅក្នុងបក្ស និងក្នុងសភា ហើយដើម្បីពន្លឿនដោះស្រាយវិបត្តិឲ្យឆាប់ចប់។
គួរបញ្ជាក់ថា យោងតាមនីតិវិធី បេក្ខជនឈរឈ្មោះម្នាក់ៗ ត្រូវតែទទួលបានការចុះហត្ថលេខាគាំទ្រ ចំនួន១០០ ពីសំណាក់តំណាងរាស្ត្រជាមុនសិន ទើបអាចឈរឈ្មោះបាន។ យោងតាមគេហទំព័រ Guido Fawkes គឺលោក រីឈី ស៊ូណាក់ បានទទួលហត្ថលេខាគាំទ្រចំនួន១២៨ ខណៈលោក បូរីស ចនសុន បានចំនួន៧២ រីឯលោកស្រី ផេននី ម័រដូនត៍ បានត្រឹម២៥។ បេក្ខជននីមួយៗ ត្រូវបំពេញលក្ខខណ្ឌនេះ ឲ្យបានមុនថ្ងៃផុតថ្ងៃចន្ទ ទី២៤តុលា។ នីតិវិធីបន្តទៀត គឺសមាជិកសភាបក្សអភិរក្សនិយម ចំនួន៣៥៧នាក់ ត្រូវបោះឆ្នោតជ្រើសរើសបេក្ខជនណាមួយ។ ប្រសិនបើមានអ្នកឈ្នះដាច់ នោះបេក្ខជននោះនឹងចូលកាន់ការងារជានាយករដ្ឋមន្ត្រីភ្លាមៗតែម្តង នៅសប្តាហ៍ក្រោយនេះ។ តែប្រសិនបើនៅសល់បេក្ខជនចុងក្រោយ២នាក់ នោះសមាជិកបក្សអភិរក្សនិយម ទាំង១៧ម៉ឺននាក់ទូទាំងប្រទេស ត្រូវបោះឆ្នោតតាមបណ្តាញអ៊ីនធ័រនិត នៅរវាងថ្ងៃទី២៨តុលាខាងមុខ។
លោក James Duddridge សមាជិកសភានិងជាមនុស្សស្និទ្ធនឹងលោកបូរីសចន សុន បានអះអាងថាក្រុមលោកបានត្រៀមខ្លួនរួចហើយ ក្នុងការជំរុញឲ្យលោកចនសុន ត្រលប់មកដឹកនាំរដ្ឋាភិបាលវិញ។ តែយ៉ាងណា យោងតាមការស្ទាបស្ទង់មតិរបស់បណ្តាញព័ត៌មានអង់គ្លេស គឺលោកចនសុន បានបាត់ប្រជាប្រិយភាពខ្លាំងណាស់ បន្ទាប់ពីមានរឿងអាស្រូវជាបន្តបន្ទាប់។ ទន្ទឹមគ្នានេះ លោក Dominic Raab អតីតឧបនាយករដ្ឋមន្ត្រីបានលើកឡើងថា គឺលោករីឈី ស៊ូណាក់ ស័ក្តិសមនឹងធ្វើជានាយករដ្ឋមន្ត្រីបំផុតក្នុងពេលនេះ ដែលអង់គ្លេសមានវិបត្តិសេដ្ឋកិច្ច ព្រោះលោកមានសមត្ថភាពជំនាញផ្នែកសេដ្ឋកិច្ចនិងហិរញ្ញវត្ថុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ