លោករីស៊ី ស៊ូណាក់ សន្យាថានឹងកែតម្រូវកំហុសឆ្គងរបស់លោកស្រី លីស ត្រាស្ស និងស្តារស្ថិរភាពឡើងវិញ
ក្នុងវ័យ៤២ឆ្នាំ លោករីស៊ី ស៊ូណាក់ ត្រូវបានតែងតាំងជានាយករដ្ឋមន្ត្រីរបស់អង់គ្លេស កាលពីថ្ងៃអង្គារម្សិលមិញ បន្ទាប់ពីលោកស្រី លីស ត្រាស្ស បានលាចុះពីតំណែង។ ជាការចូលកាន់ការងារ ក្នុងកាលៈទេសៈដ៏លំបាកបំផុត សម្រាប់លោក រីស៊ី ស៊ូណាក់ ព្រោះប្រទេសអង់គ្លេស កំពុងធ្លាក់ជ្រៅក្នុងវិបត្តិសេដ្ឋកិច្ច និងនយោបាយ។
ចុះផ្សាយនៅថ្ងៃ៖
នៅមុខ 10 Downing Street ក្នុងសុន្ទរកថាទី១របស់លោកក្នុងនាមជានាយករដ្ឋមន្ត្រី លោករីស៊ី ស៊ូណាក់ បានថ្លែងថា លោកដឹងយ៉ាងច្បាស់ អំពីការងារលំបាកដែលកំពុងរងចាំលោកឲ្យដោះស្រាយ ដើម្បីស្រោចស្រង់ប្រទេសឲ្យងើបពីវិបត្តិសេដ្ឋកិច្ច និងនយោបាយ។ លោកនាយករដ្ឋមន្ត្រីអង់គ្លេសរូបនេះ អះអាងថាលោកនឹងមិនចុះញ៉មជាដាច់ខាត ហើយលោកប្តេជ្ញា ស្តារ និងកសាងទំនុកចិត្តរបស់ប្រជាពលរដ្ឋ ឡើងវិញឲ្យបាន។
ក្នុងសុន្ទរកថានេះ លោករីស៊ី ស៊ូណាក់ បានលើកឡើងថាលោកត្រូវបានសមាជិកបក្សរបស់លោក បោះឆ្នោតជ្រើសតាំងឲ្យមកដឹកនាំប្រទេស ដើម្បីកែតម្រូវ កំហុសឆ្គងរបស់លោកស្រី លីស ត្រាស្ស។
សម្រង់សុន្ទរកថាចូលកាន់អំណាច របស់លោក រីស៊ី ស៊ូណាក់
"ប្រទេសជាតិយើង កំពុងតែប្រឈមនឹងវិបត្តិសេដ្ឋកិច្ចយ៉ាងធ្ងន់ធ្ងរ។ ខ្ញុំសូមឆក់ឱកាសនេះ កោតសរសើរចំពោះលោកស្រី លីស ត្រាស្ស។ តាមពិតលោកស្រី មានគំនិតត្រឹមត្រូវណាស់ ដែលចង់ធ្វើឲ្យកំណើនសេដ្ឋកិច្ចបានប្រសើរឡើង ហើយខ្ញុំសូមសរសើរចំពោះការតាំងចិត្តរបស់គាត់ ក្នុងការធ្វើឲ្យមានការផ្លាស់ប្តូរ។ ក៏ប៉ុន្តែ គាត់បានធ្វើរឿងភ័ន្តច្រឡំខ្លះ។ ខ្ញុំបានទទួលសំឡេងឆ្នោត តែងតាំងខ្ញុំឲ្យដឹកនាំគណបក្ស ហើយនឹងឈានមកធ្វើជានាយករដ្ឋមន្ត្រី ដើម្បីកែតម្រូវ កំហុសឆ្គងទាំងអស់នេះ។
ខ្ញុំសូមសន្យាថា ខ្ញុំនិងយកបញ្ហាស្ថិរភាពសេដ្ឋកិច្ច ដាក់នៅចំកណ្តាលបេះដូង នៃសកម្មការងាររបស់រដ្ឋាភិបាលខ្ញុំ។ ខ្ញុំនឹងបង្រួបបង្រួមប្រទេសជាតិយើង។ រដ្ឋាភិបាលរបស់ខ្ញុំ នឹងប្រឹងប្រែងកសាងភាពសុចរិតស្មោះត្រង់ ពោរពេញដោយភាពជំនាញការងារច្បាស់លាស់ និងមានការទទួលខុសត្រូវ នៅគ្រប់លំដាប់ថ្នាក់ទាំងអស់។ ទំនុកចិត្តនឹងនិងត្រូវស្តារឡើងវិញ ហើយខ្ញុំនឹងទទួលបាននូវទំនុកចិត្ត ពីជនរួមជាតិយើងទាំងអស់គ្នា។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ