ប្រភពពីមន្ត្រីអាមេរិកអះអាងថា រុស្ស៊ីពិតជាបានជជែកគ្នា ពីជម្រើសប្រើអាវុធនុយក្លេអ៊ែរនៅអ៊ុយក្រែន
មេទ័ពធំៗរបស់រុស្ស៊ី បានជជែកគ្នាកាលពីពេលថ្មីៗនេះ ស្តីអំពីជម្រើស ប្រើអាវុធនុយក្លេអ៊ែរនៅអ៊ុយក្រែន។ នេះបើផ្អែកតាមការចុះផ្សាយ របស់កាសែត New York Times ដែលស្រង់ប្រភពពីមន្ត្រីអាមេរិក ដោយសុំមិនបញ្ចេញឈ្មោះ។ គួរបញ្ជាក់ថា បណ្តាប្រទេសមហាអំណាចលោកខាងលិច កំពុងតែសង្ស័យថា រុស្ស៊ីអាចនឹងប្រើអាវុធនុយក្លេអ៊ែរតាក់ទិកដោយខ្លួនឯង បន្ទាប់ពីបានប្រឌិតដំណឹងចោទថា គឺអ៊ុយក្រែន ដែលមានគម្រោងប្រើវាមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
ការសែត New York Times បានចុះផ្សាយនៅថ្ងៃពុធ ថាយោងតាមប្រភពពីមន្ត្រីអាមេរិក ដោយសុំមិនបញ្ចេញឈ្មោះ គឺមន្ត្រីមេទ័ពធំៗរបស់រុស្ស៊ី បានជួបប្រជុំគ្នា និយាយជជែកគ្នា ទាក់ទិននឹងលទ្ធភាពប្រើអាវុធនុយក្លេអ៊ែរតាក់ទិក។ ប្រភពដដែលអះអាងថា ក្នុងពេលប្រជុំនោះ គឺមិនមានវត្តមានរបស់លោកពូទីន ចូលរួមទេ ហើយគិតមកត្រឹមពេលនេះ នៅមិនទាន់មានសញ្ញាអ្វី បញ្ជាក់ថា រុស្ស៊ីកំពុងរៀបចំប្រើអាវុធនុយក្លេអ៊ែរទេ។
ភ្លាមៗក្រោយការចុះផ្សាយរបស់កាសែតអាមេរិកនេះ ក្រសួងការបរទេសរុស្ស៊ី បានចេញលិខិតប្រកាសមួយនៅរសៀលថ្ងៃពុធ ដោយអះអាងថា ទ្រឹស្តីនុយក្លេអ៊ែររបស់រុស្ស៊ី មិនប្រែប្រួលទេ គឺរុស្ស៊ីប្រើអាវុធនុយក្លេអ៊ែរ ជាជម្រើសចុងក្រោយ ហើយតែក្នុងករណីការពារខ្លួនតែប៉ុណ្ណោះ។ ក្រសួងការបរទេសរុស្ស៊ីបន្ថែមទៀតថា ប្រសិនបើក្រុមប្រទេសលោកខាងលិច នៅតែបន្តគាំទ្រអ៊ុយក្រែន ក្នុងការគំរាមរករឿង បំផ្លាញសន្តិសុខជាតិរុស្ស៊ី តាមរយៈការប្រើអាវុធនុយក្លេអ៊ែរ នោះផលវិបាកប្រាកដជាមហន្តរាយធ្ងន់ធ្ងរជាក់ជាមិនខាន។
គួររំលឹកថា លទ្ធភាពនៃការប្រើអាវុធនុយក្លេអ៊ែរ ពីសំណាក់រុស្ស៊ីនេះ កំពុងធ្វើឲ្យប្រទេសមហាអំណាចលោកខាងលិច ជាពិសេសបណ្តាប្រទេសអឺរ៉ុប មានការព្រួយបារម្ភជាខ្លាំង។ ភាគីរុស្ស៊ីបានលើក ជាច្រើនដងថាអ៊ុយក្រែនមានគម្រោងប្រើអាវុធដែលមានផ្ទុកសារធាតុវិទ្យុសកម្ម ដើម្បីចោទថារុស្ស៊ីជាអ្នកប្រើវា។ អ៊ុយក្រែន និងក្រុមប្រទេសលោកខាងលិច បានអះអាងថាវាជាការប្រឌិតទាំងស្រុងរបស់រុស្ស៊ី ដើម្បីបានលេសប្រើអាវុធនុយក្លេអ៊ែរដោយខ្លួនឯងតែប៉ុណ្ណោះ។ សេតវិមានអាមេរិក បានអះអាងកាលពីពាក់កណ្តាលខែតុលា ថាគេបានទទួលដំណឹងច្បាស់ការណ៍ ថារុស្ស៊ីបានប្រជុំជជែកគ្នា អំពីជម្រើសនេះពិតមែន។
នៅថ្ងៃពុធទី២វិច្ឆិកា លោក John Kirby អ្នកនាំពាក្យក្រុមប្រឹក្សាសន្តិសុខជាតិអាមេរិក បានលើកឡើងថា ការប្រកាសរបស់ភាគី ទាក់ទិននឹងលទ្ធភាពប្រើប្រាស់អាវុធនុយក្លេអ៊ែរតាក់ទិក គឺពិតជាគួរឲ្យបារម្ភខ្លាំងណាស់ មិនអាចលេងសើចបានទេ។ ដូចគ្នាដែរ អ្នកនាំពាក្យម្នាក់របស់សេតវិមានអាមេរិក បានអះអាងថា ពេលវេលាកាន់តែទៅមុខ អាមេរិកកាន់តែបារម្ភខ្លាំងឡើង ថារុស្ស៊ីកំពុងតែមានគម្រោង ប្រើអាវុធនុយក្លេអ៊ែរនៅអ៊ុយក្រែន។
ដោយឡែក នៅរសៀលថ្ងៃពុធ លោក ឌីមីទ្រ ប៉េឆកូវ អ្នកនាំពាក្យវិមានក្រឹមឡាំងវិញ បានច្រានចោលការព្រួយបារម្ភរបស់រដ្ឋាភិបាលប្រទេសលោកខាងលិច ក៏ដូចជាបណ្តាញព័ត៌មាននានា ដែលលើកឡើងថា រុស្ស៊ីចង់ប្រើអាវុធនុយក្លេអ៊ែរ។ ការបដិសេធ ដែលនៅតែមិនធ្វើឲ្យគេមានទំនុកចិត្ត ព្រោះថាកាលពីល្ងាចថ្ងៃអង្គារ គឺលោក ឌីមីទ្រី ម៉េដវេដេវ អតីប្រធានធិបតីរុស្ស៊ី និងជាមនុស្សសំខាន់ទី២បន្ទាប់ពីលោកពូទីន ដែលបានលើកឡើងដោយខ្លួនឯង ថារុស្ស៊ីអាចនឹងប្រើអាវុធនុយក្លេអ៊ែរ ព្រោះថាអ៊ុយក្រែនកំពុងតែគំរាមសន្តិសុខជាតិរុស្ស៊ី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ