ប្រជាជនអ៊ុយក្រែនយ៉ាងហោច ៤,៥លាននាក់ គ្មានចរន្តអគ្គិសនីប្រើប្រាស់ ដោយសារការវាយប្រហាររបស់រុស្ស៊ី
យ៉ាងហោចណាស់ ប្រជាជនអ៊ុយក្រែនចំនួន៤លាន ៥សែននាក់ ត្រូវគ្មានចរន្តអគ្គិសនីប្រើប្រាស់ នៅរវាងយប់ថ្ងៃព្រហស្បតិ៍ និងថ្ងៃសុក្រទី៤វិច្ឆិកា។ កងទ័ពរុស្ស៊ីបានបាញ់ប្លោងគ្រាប់ កំទេចហេដ្ឋារចនាសម្ព័ន្ធ ផលិតចរន្តអគ្គិសនីរបស់អ៊ុយក្រែន ជាច្រើនទីតាំង។ លោកវ្លូឌីមៀរ ហ្សេឡេនស្គី ប្រធានាធិបតីអ៊ុយក្រែន បានថ្កោលទោសថា រុស្ស៊ីកំពុងតែធ្វើ “អំពើភេរវកម្មថាមពល” មកលើប្រជាជនអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០១
នៅក្នុងសារវីដេអូប្រចាំថ្ងៃ លោកវ្លូឌីមៀរ ហ្សេឡេនស្គី ប្រធានាធិបតីអ៊ុយក្រែន បានលើកឡើងថា ក្នុងរវាងយប់ថ្ងៃព្រហស្បតិ៍ ឈានចូលថ្ងៃសុក្រ ទី៤វិច្ឆិកា យ៉ាងហោចណាស់ប្រជាជនអ៊ុយក្រែន ចំនួន៤,៥លាននាក់ ដែលត្រូវគ្មានចរន្តអគ្គិសនីប្រើប្រាស់ នៅតំបន់ទីក្រុងកៀវ និងនៅតំបន់ប្រមាណ១០ទៀត ទូទាំងប្រទេស។ បណ្តាញខ្សែភ្លើង ព្រមទាំងស្ថានីយ៍ផលិតចរន្តអគ្គិសនីអ៊ុយក្រែនជាច្រើនទីតាំង ត្រូវបានកំទេចដោយការបាញ់ប្លោងរបស់រុស្ស៊ី។
លោកហ្សេឡេនស្គី បានបន្តថា ពួករុស្ស៊ី មិនអាចយកឈ្នះអ៊ុយក្រែនបានទេនៅសមរភូមិ។ ម្លោះហើយ បានជាពួករុស្ស៊ីកំពុងតែព្យាយាម បំបាក់ទឹកចិត្ត និងភាពអត់ធ្មត់របស់ប្រជាជនអ៊ុយក្រែន តាមរយៈការបំភ័យបំន្លាច បណ្ដាច់ចរន្តអគ្គិសនី។ នេះគឺជាអំពើ “ភេរវកម្មថាមពល”។
ដោយឡែក ទាក់ទិននឹងការចោទរបស់រុស្ស៊ី ដែលថាអ៊ុយក្រែនកំពុងត្រៀមប្រើគ្រាប់បែកកាចសាហាវ មានផ្ទុកសារធាតុវិទ្យុសកម្មនោះ ទីភ្នាក់ងារថាមពលនុយក្លេអ៊ែរអន្តរជាតិ ទើបតែបានចេញសេចក្តីសន្និដ្ឋានមួយ ថាពុំមានសកម្មភាពណាមួយ ដែលបញ្ជាក់ថាអ៊ុយក្រែន កំពុងត្រៀមធ្វើសកម្មភាពនុយក្លេអ៊ែរ ដោយលួចលាក់នោះឡើយ។
លោកហ្សេឡេនស្គី បានថ្លែងអបអរចំណោះសេចក្តីសន្និដ្ឋាន របស់ទីភ្នាក់ងារថាមពលនុយក្លេអ៊ែរអន្តរជាតិ ដែលបានផ្តល់យុត្តិធម៌មកឲ្យអ៊ុយក្រែន ចំពោះការចោទបែបប្រឌិតស្រស់ៗរបស់រុស្ស៊ី។ លោកហ្សេឡេនស្គី បានចោទបកទៅវិញថា គឺប្រហែលជារុស្ស៊ីខ្លួនឯងទេ ដែលគ្រោងប្រើគ្រាប់បែកប្រភេទនេះ ហើយទំលាក់កំហុសថាមកពីអ៊ុយក្រែនជាអ្នកប្រើវាមុន។
ទន្ទឹមគ្នានេះដែរ លោកប្រធានាធិបតីអ៊ុយក្រែន បានលើកឡើងអំពីករណី កងទ័ពរុស្ស៊ីកេណ្ឌប្រជាពលរដ្ឋអ៊ុយក្រែនទាំងបង្ខំ យកទៅខាងដែនដីដែលខ្លួនកាន់កាប់ នៅតំបន់ក្រុងឃែរសុន តំបន់ហ្សាប៉ូរីចា និងតំបន់ដុនបាសជាដើម។ បន្ថែមពីនេះ កងទ័ពរុស្ស៊ីកំពុងតែធ្វើសកម្មភាព ប្លន់ប្រមូលយកទ្រព្យសម្បត្តិ សម្ភារៈតាមផ្ទះ របស់ប្រជាពលរដ្ឋនៅតំបន់ទាំងនោះថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ