អ៊ីរ៉ង់ សារភាពទទួលស្គាល់ជាលើកទី១ថាបានលក់យន្តហោះ ដ្រូន ឲ្យរុស្ស៊ី
នៅថ្ងៃសៅរ៍ទី៥វិច្ឆិកា អ៊ីរ៉ង់ ប្រកាសទទួលស្គាល់ជាលើកដំបូងបំផុត ថាបានផ្គត់ផ្គង់យន្តហោះ ដ្រូន ទៅឲ្យរុស្ស៊ី។ ការទទួលស្គាល់ជាលើកទី១នេះ គឺធ្វើឡើងដោយក្រសួងការបរទេសអ៊ីរ៉ង់ តាមរយៈការចុះផ្សាយនៅក្នុងកាសែតផ្លូវការរបស់រដ្ឋអំណាចអ៊ីរ៉ង់។ នេះជាព័ត៌មានដ៏គួរឲ្យភ្ញាក់ផ្អើល។ ភ្ញាក់ផ្អើលពីព្រោះថានាពេលកន្លងមក អ៊ីរ៉ង់ ធ្លាប់តែប្រកែកដាច់ខាត និងបដិសេធទាត់ចោលរាល់ការចោទប្រកាន់ទាំងឡាយរបស់ភាគី អ៊ុយក្រែន និងក្រុមប្រទេសបច្ចិមលោក។
ចុះផ្សាយនៅថ្ងៃ៖
ស្តាប់ - ០២:០៦
ទោះបីជាទទួលស្គាល់ថាបានផ្តល់យន្តហោះដ្រូនឲ្យរុស្ស៊ីក៏មែនពិត ក៏ប៉ុន្តែ អ៊ីរ៉ង់ បានអះអាងថា ការផ្តល់យន្តហោះដ្រូនឲ្យរុស្ស៊ី គឺធ្វើឡើងតាំងតែពីមុនពេលផ្ទុះសង្គ្រាមលើអ៊ុយក្រែន នាចុងខែកុម្ភៈ ហើយការផ្តល់ឲ្យរុស្ស៊ីពេលនោះ គឺឋិតក្នុងចំនួនតិចតួចតែប៉ុណ្ណោះ។ នេះបើតាមការបញ្ជាក់របស់រដ្ឋមន្ត្រីក្រសួងការបរទេសអ៊ីរ៉ង់ Hossein Amir-Abdollahian នៅក្នុងទីភ្នាក់ងារព័ត៌មានអ៊ីរ៉ង់ Irna ។
ផ្ទុយពីការលើកឡើងថា មានចំនួនតិចតួច រដ្ឋបាលទីក្រុងកៀវ អះអាងទៅវិញថា បានបាញ់កម្ទេចយន្តហោះដ្រូនអ៊ីរ៉ង់ មកទល់នៅថ្ងៃនេះ ចំនួន ប្រមាណជា ៤០០គ្រឿងទៅហើយ និងថា រុស្ស៊ី បានបញ្ជាទិញ ដ្រូននេះ ពីអ៊ីរ៉ង់ ប្រមាណជា ២ ពាន់គ្រឿងឯណោះ។
ទោះជាយ៉ាងនេះក៏ដោយចុះ នៅក្នុងព័ត៌មានផ្សាយដោយទីភ្នាក់ងារព័ត៌មានអ៊ីរ៉ង់ ពីថ្ងៃសៅរ៍ គឺប្រមុខការទូត អ៊ីរ៉ង់ បានយល់ព្រមថាត្រៀមខ្លួនដើម្បីពិនិត្យភស្តុតាងរបស់ អ៊ុយក្រែន ដែលចោទប្រកាន់ថាជាយន្តហោះដ្រូនរបស់អ៊ីរ៉ង់។ ក៏ប៉ុន្តែ អ៊ីរ៉ង់ ក៏បានច្រានចោលចំពោះការចោទប្រកាន់ថាខ្លួនបានផ្តល់មីស៊ីលឲ្យរុស្ស៊ី ដែលបង្កជម្លោះប្រឆាំងនឹងពលរដ្ឋអ៊ុយក្រែន។ អ៊ីរ៉ង់ ចាត់ទុកព័ត៌មាននេះថាខុសទាំងស្រុង។
សំណុំរឿងផ្តល់គ្រឿងសព្វាវុធនិងដ្រូនឲ្យរុស្ស៊ីដើម្បីបញ្ឆេះសង្គ្រាមលើទឹកដីអ៊ុយក្រែន គឺបង្កភាពតានតឹងខ្លាំងរវាង អ៊ុយក្រែន និង អ៊ីរ៉ង់។ ចាប់ពីខែកញ្ញាមក រដ្ឋបាលទីក្រុងកៀវរបស់ អ៊ុយក្រែន បានសម្រេចកាត់បន្ថយចំណងទាក់ទងផ្លូវទូតជាមួយរដ្ឋបាលតេអេរ៉ង់ របស់អ៊ីរ៉ង់។
ក្នុងសំណុំរឿងសង្គ្រាមនៅអ៊ុយក្រែនដដែល សហរដ្ឋអាមេរិក អង់គ្លេស ប្រទេសទាំង២៧នៃសហភាពអឺរ៉ុប បានដាក់ទណ្ឌកម្មជាបន្តបន្ទាប់ទាំងផ្លូវនយោបាយនិងសេដ្ឋកិច្ច លើអ៊ីរ៉ង់។ ប៉ុន្មានសប្តាហ៍នេះ អង់គ្លេសនិងសហភាពអឺរ៉ុប បានដាក់ទណ្ឌកម្មប្រឆាំងនឹងមេបញ្ជាយោធាអ៊ីរ៉ង់ ៣នាក់ និងក្រុមហ៊ុនអ៊ីរ៉ង់១ ដែលផលិតអាវុធ លក់ឲ្យ រុស្ស៊ី។ រុស្ស៊ី ដែលបានប្រើគ្រឿងច្បាំងនោះ ទៅវាយប្រហារលើទឹកដីអ៊ុយក្រែន ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ