លោកម៉ាក្រុង៖ បារាំងនឹងពង្រឹងតួនាទី ក្នុងនាមជាមហាអំណាចនុយក្លេអ៊ែរ ដើម្បីការពារសន្តិសុខអឺរ៉ុប
លោកអេម៉ានុយអែល ម៉ាក្រុង ប្រធានាធិបតីបារាំង បានប្រកាសកាលពីថ្ងៃម្សិលមិញ នូវកម្មវត្ថុយុទ្ធសាស្ត្ររបស់បារាំង នៅក្នុងបរិបទដែលពិភពលោកយើងបច្ចុប្បន្ន កំពុងតែពោរពេញដោយបញ្ហាប្រឈមអសន្តិសុខ។ សង្គ្រាមនៅអ៊ុយក្រែន បង្កឡើងដោយរុស្ស៊ី គឺជាសញ្ញាបញ្ជាក់អំពីដំណាក់កាលផ្លាស់ប្តូរដ៏គ្រោះថ្នាក់បំផុត ទាក់ទិននឹងសន្តិសុខសកលលោក។ ប្រឈមនឹងបញ្ហានេះ លោកម៉ាក្រុង បានអះអាងថា បារាំងគឺជាមហាអំណាចនុយក្លេអ៊ែរ ហើយបារាំងនឹងយកបង្អែកនេះ ដើម្បីពង្រឹងសន្តិសុខរបស់អឺរ៉ុបទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
លោកអេម៉ានុយអែល ម៉ាក្រុង បានធ្វើបទបង្ហាញអំពី កម្មវត្ថុយុទ្ធសាស្ត្ររបស់បារាំង (RNS) ក្នុងឱកាសដែលលោកបានទៅទស្សនកិច្ច លើនាវាផ្ទុកឧត្ថម្ភាគចក្រ Amphibie Dixmude នៅកំពង់ផែក្រុងទូឡុង ខាងត្បូងប្រទេសបារាំង កាលពីថ្ងៃពុធទី៩វិច្ឆិកា។
នៅក្នុងសុន្ទរកថា លោកម៉ាក្រុង បានឡើកឡើងថា អ្វីដែលកំពុងតែកើតឡើងនៅអ៊ុយក្រែន គឺវាមិនមែនគ្រាន់តែជាទំនោរស្តែងចេញនៃវិបត្តិសន្តិសុខពិភពលោកប៉ុណ្ណោះទេ តែវាគឺជាដំណើរប្រែប្រួលយ៉ាងលឿនរហ័ស និងគ្រោះថ្នាក់បំផុត។ លោកបន្តថា សង្គ្រាមនៅអ៊ុយក្រែន បានស្តែងឲ្យឃើញ អំពីស្ថានភាពនៃពិភពលោកយើង នាពេលបច្ចុប្បន្ន ដែលគោលការច្បាប់អន្តរជាតិ ត្រូវចុះទន់ខ្សោយ មិនត្រូវគេគោរព ដោយសារមហិច្ឆិតាលោភលន់។ ស្ថានភាពនេះ វាគឺជាដំណាក់កាលមួយ ដ៏គ្រោះថ្នាក់ ព្រោះតុល្យភាពដែលពិភពលោកយើង ធ្លាប់បានពឹងផ្អែកកន្លងមកនេះ ត្រូវរង្គោះរង្គើបាក់បែក។
នៅក្នុងបរិបទនេះ លោកម៉ាក្រុង បានបញ្ជាក់ថា បារាំងមានចេតនា ឈរលើជំហរមួយរឹងមាំ ក្នុងនាមបារាំង ជាមហាអំណាចនុយក្លេអ៊ែរម្នាក់ដែរ។ ជាជំហរដែលបារាំង ចង់ឲ្យគេគោរព ព្រោះអាវុធនុយក្លេអ៊ែរគឺជាបង្អែកស្វ័យភាពយុទ្ធសាស្ត្រ មិនថាសម្រាប់បារាំង និងសម្រាប់សហភាពអឺរ៉ុបទាំងមូល។ ទន្ទឹមគ្នានេះដែរ បារាំង នឹងនៅតែជាប្រទេសសមាជិកម្នាក់ ជាទីទុកចិត្ត និងមានទំងន់ជាក់ស្តែង ក្នុងសម្ព័ន្ធភាព អឺរ៉ុបអាត្លង់ទិក។
តាមរយៈសុន្ទរកថានេះ លោកប្រធានាធិបតីបារាំង បានប្រកាសអំពី យុទ្ធសាស្ត្រអាវុធនុយក្លេអ៊ែររបស់បារាំង ដើម្បីការពារសន្តិសុខរបស់អឺរ៉ុបទាំងមូល ដោយលោកបានសង្កត់ធ្ងន់ថា ផលប្រយោជន៍ជាអាយុជីវិតរបស់បារាំង គឺវាមានវិសាលភាពសម្រាប់អឺរ៉ុបទាំងមូលតែម្តង។
គួរបញ្ជាក់ថា ជាមួយនឹងវិបត្តិសង្គ្រាមនៅអ៊ុយក្រែន លោកម៉ាក្រុង បានព្យាយាមអូសទាញក្រុមប្រទេសសមាជិកសហភាពអឺរ៉ុប ឲ្យរួមគ្នាបង្កើតប្រព័ន្ធការពារសន្តិសុខរួម ដើម្បីប្រឈមនឹងការគំរាមរបស់រុស្ស៊ី។ ប្រព័ន្ធការពារសន្តិសុខរួម ដែលត្រូវតែធ្វើឡើង តាមរយៈការរៀបចំផលិត និងប្រើប្រាស់គ្រឿងសព្វាវុធទំនើបដូចគ្នា។ តែយ៉ាងណា គំនិតនេះ ហាក់ប្រឈមនឹងការទើសទាល់ខ្លះ ពីសំណាក់អាល្លឺម៉ង់ និងប្រទេសអឺរ៉ុបខាងកើតខ្លះ ដែលផ្តល់ទំនុកចិត្តខ្លាំង តែប្រព័ន្ធការពាររបស់អូតង់និងសហរដ្ឋអាមេរិក។ យ៉ាងណាក៏ដោយ លោកម៉ាក្រុង អះអាងថា អូតង់នៅតែជាក្របខណ្ឌសន្តិសុខរួមមួយដ៏ចាំបាច់ តែអឺរ៉ុបត្រូវតែមានយុទ្ធសាស្ត្របន្ថែមដើម្បីការពារខ្លួន ខណៈសហរដ្ឋអាមេរិកងាកទៅគិតតែខាងអាស៊ី កាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ