អឺរ៉ុបព្យាករណ៍ថាសេដ្ឋកិច្ចខ្លួននឹងដើរថយក្រោយ នៅរវាងចុងឆ្នាំនេះ និងដើមឆ្នាំក្រោយ
ចាប់ពីត្រីមាសទី៤ចុងឆ្នាំនេះ រហូតដល់ដើមឆ្នាំក្រោយ សេដ្ឋកិច្ចអឺរ៉ុបនឹងដើរថយក្រោយ។ នេះបើផ្អែកតាមការព្យាករណ៍របស់អ្នកជំនាញ នៅសហភាពអឺរ៉ុប។ សង្គ្រាមនៅអ៊ុយក្រែន បានបណ្តាលឲ្យទំនិញឡើងថ្លៃគ្រប់មុខ បូកផ្សំជាមួយនឹងអតិផរណា ព្រមទាំងវិបត្តិថាមពលថែមទៀតនោះ នឹងមកអូសសេដ្ឋកិច្ចរបស់សហភាពអឺរ៉ុប មិនឲ្យដើរទៅមុខ។
ចុះផ្សាយនៅថ្ងៃ៖
ស្តាប់ - ០២:១២
លោក Paolo Gentiloni ស្នងការអឺរ៉ុបទទួលបន្ទុកសេដ្ឋកិច្ច បានប្រាប់អ្នកកាសែត នៅក្រុងព្រុចសែលថា រវាងប៉ុន្មានខែទៅខាងមុខនេះ សេដ្ឋកិច្ចអឺរ៉ុបនឹងត្រូវពើបប្រទះនឹងការលំបាកច្រើនណាស់។ សេដ្ឋកិច្ចនឹងដើរថយក្រោយ ក្នុងរវាងត្រីមាសទី៤ចុងឆ្នាំ និងត្រីមាសទី១ដើមឆ្នាំក្រោយ មិនថានៅក្នុងតំបន់ចាយប្រាក់អឺរ៉ូ និងបណ្តាប្រទេសសមាជិកអឺរ៉ុបផ្សេងទៀត។
ជាផលវិបាក ការព្យាករណ៍ទាក់ទិននឹងចំណូលដុលក្នុងស្រុកសរុប សម្រាប់ឆ្នាំ២០២២នេះ នឹងត្រូវពិនិត្យទាញទម្លាក់តួលេខ មកនៅត្រឹមតែ ប្រមាណ០.៣% តែប៉ុណ្ណោះ ខណៈដែលការរំពឹងទុកពីមុន មានប្រមាណ ១.៤%។ តែយ៉ាងណា អ្នកជំនាញសេដ្ឋកិច្ចអឺរ៉ុបរូបនេះ អះអាងថា នៅរវាងចុងត្រីមាសទី២ឆ្នាំក្រោយ កំណើនសេដ្ឋកិច្ចអឺរ៉ុប អាចនឹងងើបមុខឡើងវិញ។
គួរបញ្ជាក់ថា យោងតាលិខិតប្រកាសមួយ របស់គណៈកម្មាការអឺរ៉ុប ក្នុងចំណោមតំបន់ទាំងអស់ទូទាំងពិភពលោក គឺសេដ្ឋកិច្ចអឺរ៉ុបរងគ្រោះខ្លាំងជាងគេ ដោយសារវិបត្តិសង្គ្រាមនៅអ៊ុយក្រែន។ មូលហេតុគឺដោយសារអឺរ៉ុប មានទីតាំងភូមិសាស្ត្រកៀកនឹងអ៊ុយក្រែន ហើយមួយទៀតនោះ គឺសេដ្ឋកិច្ចអឺរ៉ុបរំពឹងខ្លាំងទៅលើឧស្ម័ននាំចូលពីរុស្ស៊ី។
ថ្វីបើឆ្នាំ២០២១កន្លងមក សេដ្ឋកិច្ចបានស្ទុះងើបយ៉ាងគាប់ចិត្ត ក្រោយឆ្លងកាត់វិបត្តិកូវីដ១៩ តែពេលនេះ សង្គ្រាមនៅអ៊ុយក្រែនកំពុងរុញសង្កត់ឲ្យមានភាពលំបាក។ កម្រិតអតិផរណាឡើងកាន់តែខ្ពស់ ធ្វើឲ្យទំនិញគ្រប់មុខឡើងថ្លៃ។ រីឯតម្លៃផលិត តម្លៃវត្ថុធាតុដើម និងការចំណាយលើការដឹកជញ្ជូនត្រូវកើនឡើងដោយចៀសមិនរួច។ យោងតាមការព្យាករណ៍របស់គណៈកម្មការអឺរ៉ុប ឆ្នាំ២០២២ កម្រិតអតិផរណាមានជាមធ្យម ៨.៥% ដែលជាកម្រិតខ្ពស់បំផុតមិនធ្លាប់មាន។ ហើយនៅឆ្នាំ២០២៣ កម្រិតអតិផរណាក្នុងតំបន់ចាយប្រាក់អឺរ៉ូ មានខ្ទង់ ៦.១%។
ជាងនេះទៀត លោក Paolo Gentiloni បានអះអាងថា វានៅមានភាពមិនប្រាកដប្រជាច្រើនណាស់ ដែលមានន័យថាស្ថានភាពអាចអាក្រក់ជាងការស្មាន។ វិបត្តិសេដ្ឋកិច្ចដើរថយក្រោយ នេះ អាចនឹងធ្វើឲ្យឧស្សាហកម្មអឺរ៉ុប ត្រូវចុះទន់ខ្សោយ ប្រសិនបើគ្មានវិធានការទប់ឲ្យទាន់ពេលវេលាទេនោះ។ បញ្ហាខ្វះថាមពលប្រើប្រាស់ គឺជាក្តីបារម្ភដ៏ធំបំផុត សម្រាប់វិស័យឧស្សាហកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ