លោកហ្សេឡេនស្គី ធ្វើដំណើរទៅក្រុងឃែរសុន អបអរជ័យជំនះរបស់កងទ័ពអ៊ុយក្រែន
ទីក្រុងនិងតំបន់ឃែរសុន ត្រូវបានកងទ័ពអ៊ុយក្រែន ចូលទៅគ្រប់គ្រងវិញហើយ បន្ទាប់ពីកងទ័ពរុស្ស៊ី បានសម្រេចដកថយចេញទាំងស្រុង កាលពី៣ថ្ងៃមុននេះ។ ដើម្បីអបអរជ័យជំនះ និងការតស៊ូរបស់កងទ័ពអ៊ុយក្រែន លោកប្រធានាធិបតីហ្សេឡេនស្គី បានធ្វើដំណើរទៅដល់ទីក្រុងឃែរសុន កាលពីព្រឹកថ្ងៃចន្ទទី១៤វិច្ឆិកាម្សិលមិញ។ ដំណើរទៅដល់ដែលពោរពេញដោយនិម្មិតរូប ដែលលោកហ្សេឡេនស្គី បានសន្យាតស៊ូប្រយុទ្ធដើម្បីដណ្តើមយកទឹកដីអ៊ុយក្រែនត្រលប់មកវិញឲ្យបាន។ ដោយឡែកភាគីរុស្ស៊ីវិញ បានអះអាងថាទោះកងទ័ពរុស្ស៊ីដកចេញពីឃែរសុន តែឃែរសុន នៅតែជាដែនដីរបស់រុស្ស៊ីដដែល។
ចុះផ្សាយនៅថ្ងៃ៖
ស្តាប់ - ០២:១៣
ដៃស្តាំទប់លើដើមទ្រូង លោកហ្សេឡេនស្គី បានបន្លឺសំឡេងច្រៀងចំរៀងជាតិអ៊ុយក្រែន ជាមួយនឹងក្រុមប្រជាជន និងកងទ័ព នៅចំពោះមុខទង់ជាតិអ៊ុយក្រែន ដែលត្រូវគេបង្ហូតឡើង បក់រវិចលើអាគាររដ្ឋបាលតំបន់ឃែរសុន។ ស្ថិតក្នុងឯកសណ្ឋានទាហាន លោកហ្សេឡេនស្គី បានធ្វើដំណើរតាមផ្លូវក្នុងក្រុងឃែរសុន ជាមួយនឹងសំឡេងស្រែកអបអរពីប្រជាពលរដ្ឋ ដែលមកឈរតាមសងខាងផ្លូវ ស្រែកថា “ជ័យោអ៊ុយក្រែន”។
នៅក្នុងវីដេអូផ្សាយផ្ទាល់ ដែលគេចែកចាយតាមបណ្តាញសង្គម នៅទីក្រុងឃែរសុន លោកហ្សេឡេនស្គីបានថ្លែងសុន្ទរកថា ដោយបានលើកឡើងថា អ៊ុយក្រែនគ្មានថ្ងៃស្លាប់ជាច់ខាត។ ទោះលំបាកខ្លាំងកម្រិតណា តែលោកប្តេជ្ញាថានឹងតស៊ូមួយជំហានម្តងៗ ឈានទៅរំដោះទឹកដីមកវិញឲ្យបាន។ តែយ៉ាងណា លោកហ្សេឡេនស្គី បានទទួលស្គាល់ថា សង្គ្រាមនេះនឹងបន្តរ៉ាំរ៉ៃយូរ ហើយជ័យជំនះមិនអាចបានដោយងាយៗនោះឡើយ។
សូមបញ្ជាក់ថា កងទ័ពរុស្ស៊ីបានសម្រេចដកចេញទាំងស្រុង ពីទីក្រុងនិងតំបន់ឃែរសុន កាលពី៣ថ្ងៃមុន បន្ទាប់ពីបានគ្រប់គ្រងតំបន់នេះ ប្រមាណជា៨ខែ។ តំបន់ឃែរសុននេះ គឺជាដែនដីមួយក្នុងចំណោមដែនដីទាំង៤ ដែលរុស្ស៊ីបានប្រកាសកាត់ភ្ជាប់ចូលមកក្នុងទឹកដីរុស្ស៊ី។ ទាក់ទិននឹងការធ្វើដំណើររបស់លោកហ្សេឡេនស្គី ទៅឃែរសុននេះ អ្នកកាសែតបានសួរទៅកាន់លោក Dimity Peskov អ្នកនាំពាក្យវិមានក្រេមឡាំង តែត្រូវបានអ្នកនាំពាក្យរូបនេះបដិសេធ មិនប្រតិកម្មអ្វីទាំងអស់។ លោក Dimity Peskov គ្រាន់តែបានឆ្លើយថា តំបន់ឃែរសុនគឺជាដែនដីរបស់រុស្ស៊ី។
គួរកត់សំគាល់ថា ការដកទ័ពថយចេញពីតំបន់ឃែរសុននេះ គឺត្រូវបានគេមើលឃើញថា ជាបរាជ័យមួយដ៏អាម៉ាស របស់លោកពូទីន ដែលបានប្រកាសកេណ្ឌទ័ពបម្រុង ប្រមាណ៣សែននាក់ ដើម្បីបន្តឈ្លានពានអ៊ុយក្រែន។ យ៉ាងណាក៏ដោយ លោក Jen Stoltenberg អគ្គលេខាធិការអូតង់ បានលើកឡើងនៅថ្ងៃចន្ទនេះថា គេមិនត្រូវត្រេកអរលឿនរហ័សពេក ហើយមើលស្រាលរុស្ស៊ីនោះទេ។ លោកអគ្គលេខាធិការអូតង់ បានព្រមានទុកជាមុនថា រដូវត្រជាក់ខាងមុខនេះ គឺជាស្ថានភាពមួយដ៏លំបាកលំបិនបំផុតសម្រាប់អ៊ុយក្រែន ព្រោះផែនការរបស់លោកពូទីន គឺចង់ធ្វើឲ្យប្រជាជនអ៊ុយក្រែន ស្លាប់ដោយសារតែសីតុណ្ហភាពត្រជាក់ និងគ្មានចរន្តអគ្គីសនីប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ