សង្គ្រាមអ៊ុយក្រែន៖ អ.ស.ប. អះអាងថាមានករណីធ្វើទារុណកម្ម ទៅលើឈ្លើយសិកទាំងសងខាង
ខណៈដែលសង្គ្រាមនៅអ៊ុយក្រែនកាន់តែក្តៅគគុក ជាមួយនឹងការបាញ់ប្លោងមីស៊ីលរាប់សិបគ្រាប់ពីសំណាក់រុស្ស៊ី ទៅលើអ៊ុយក្រែនកាលពីថ្ងៃម្សិលមិញនេះ អង្គការសហប្រជាជាតិបានចេញរបាយការណ៍មួយ ស្តីពីករណីធ្វើទារុណកម្មធ្ងន់ធ្ងរ ធ្វើទៅលើឈ្លើយសិកទាំងសងខាង មិនថាខាងរុស្ស៊ី ឬខាងអ៊ុយក្រែន។ ឈ្លើយសិកទទួលរងនូវទារុណកម្មវាយដំ ឆក់ខ្សែភ្លើង ការបំពានផ្លូវភេទ ការមាក់ងាយគម្រាមសំលាប់ជាដើម។ ទោះជាករណីទារុណកម្មមានទាំងសងខាង តែរបាយការណ៍នេះលើកឡើងថា ទំហំនៃការធ្វើទារុណកម្ម មានតិចជាងនៅខាងភាគីអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៥០
លោកស្រី Mathilda Bogner មន្ត្រីអង្គការសហប្រជាជាតិ ទទួលបន្ទុកបេសកកម្មតាមដានការគោរពសិទ្ធិមនុស្សនៅអ៊ុយក្រែន បានបញ្ជាក់ឲ្យដឹងថា ក្រុមការងារលោកស្រីបានជួបនិយាយផ្ទាល់ ជាមួយអតីតឈ្លើយសិកចំនួន ១៥៩នាក់ ក្នុងនោះប្រុស១៣៩ ស្រី២០នាក់ ដែលធ្លាប់ត្រូវបានកងទ័ពរុស្ស៊ីចាប់ខ្លួន។ ចំណែកខាងអ៊ុយក្រែនវិញ ក្រុមការងារស៊ើបអង្កេតបានជួបនិយាយដោយផ្ទាល់ ជាមួយឈ្លើយសិករុស្ស៊ី ដែលកងទ័ពអ៊ុយក្រែនចាប់ខ្លួន ចំនួន១៧៥នាក់ សុទ្ធតែភេទប្រុស។
លោកស្រីអះអាងថា បេសកកម្មការងារនេះ បានទទួលការសហការទាំងស្រុងពីខាងភាគីអ៊ុយក្រែន ដែលបាន អនុញ្ញាតឲ្យក្រុមងារ បានធ្វើដំណើរទៅដល់ទីតាំងឃុំឃាំងឈ្លើយសិករុស្ស៊ី នៅតាមតំបន់ដែលស្ថិតក្រោមការកាន់កាប់របស់កងទ័ពអ៊ុយក្រែន។ ដោយឡែក ក្រុមការងារមិនអាចទៅដល់ទីតាំងបង្ឃាំងឈ្លើយសិក នៅខាងតំបន់ដែលរុស្ស៊ីគ្រប់គ្រងទេ ដោយសារភាគីរុស្ស៊ីបដិសេធ។ ក្រុមការងារ បានជួបត្រឹមតែសាក្សីដែលជាអតីតឈ្លើយសិកដែលរុស្ស៊ីចាប់ខ្លួន ហើយត្រូវបានរំដោះមកវិញបាន ក្រោយកងទ័ពអ៊ុយក្រែនវាយឈ្នះ។
យោងតាមរបាយការណ៍ មនុស្សដែលធ្លាប់ត្រូវបានកងទ័ពរុស្ស៊ីចាប់បង្ឃាំងជាឈ្លើយសិក បានអះអាងថាខ្លួនបានរងនូវការធ្វើទារុណកម្មជាប្រចាំ ក្រោមរូមភាពច្រើនទំរង់ ដែលមានដូចជាការវាយដំ ទាត់ធាក់ ការឆក់ខ្សែភ្លើង ការសម្រាតសម្លៀកបំពាក់ ការបំពានផ្លូវភេទ និងគំរាមសំឡុតផ្សេងៗទៀត។ អ្នកទោសត្រូវកងទ័ពរុស្ស៊ី យកបងស្អិតចង់ដៃ និងបិទភ្នែក យ៉ាងតឹងណែន រហូតមានស្លាកស្នាមខៀវ ហើយត្រូវគេបញ្ជូនញាត់បញ្ចូលក្នុងរថយន្តយ៉ាងណែនចង្អៀតគលើគ្នា។ លោកស្រី Mathilda Bogner លើកឡើងថា ជារួម ករណីធ្វើទារុណកម្មធ្ងន់ធ្ងរ ធ្វើដោយកងទ័ពរុស្ស៊ី គឺមានលក្ខណៈជាប្រព័ន្ធ ហើយឈ្លើយសិកដែលជាកូនទាហានតូចតាច ទទួលរងទារុណកម្មស្រាលជាងទាហានដែលមានឋានៈធំ ឬមានតួនាទីចាំបាច់ក្នុងការប្រយុទ្ធ។
ដោយឡែក នៅខាងភាគីអ៊ុយក្រែនវិញ របាយការណ៍បានលើកឡើងថា ឈ្លើយសិករុស្ស៊ី ក៏បានទទួលរងការធ្វើទណ្ឌកម្មពីកងទ័ពអ៊ុយក្រែនដែរ។ ជាងនេះទៀត យោងតាមសាក្សីគួរឲ្យទុកចិត្ត គឺមានករណីសម្លាប់ ចំណាប់ខ្មាំងរុស្ស៊ី ពីសំណាក់កងទ័ពអ៊ុយក្រែន។ តែយ៉ាងណា ករណីទារុណកម្ម មានភាគច្រើនតែក្នុងកំឡុងពេល ដែលចំណាប់ខ្មាំងរុស្ស៊ី ត្រូវទាហានអ៊ុយក្រែនចាប់ខ្លួន និងក្នុងពេលសួរចម្លើយ ប៉ុន្មានថ្ងៃដំបូងប៉ុណ្ណោះ។
គួរបញ្ជាក់ដែរថា ភាគីរដ្ឋាភិបាលអ៊ុយក្រែន បានអះអាងថាខ្លួននឹងបើកការស៊ើបអង្កេតស៊ីជំរៅ ទាក់ទិននឹងករណីសម្លាប់ឈ្លើយសិករុស្ស៊ី បង្កឡើងដោយកងទាហានអ៊ុយក្រែន។ លោកស្រី Mathilda Bogner បានរំលឹកថា ការធ្វើទារុណកម្មលើឈ្លើយសិក ចំណាប់ខ្មាំង ទោះក្នុងរូបភាពណាក៏ដោយ គឺត្រូវបានហាមឃាត់ដោយច្បាប់អន្តរជាតិ ហើយបើទោះបីជា ស្ថិតនៅក្នុងអំឡុងពេលមានសង្គ្រាមប្រដាប់អាវុធក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ