ប្រជាជនអ៊ុយក្រែនជាង១០លាននាក់ គ្មានភ្លើងអគ្គិសនីប្រើប្រាស់ ខណៈព្រឹលទឹកកកចាប់ផ្តើមធ្លាក់
ប្រជាជនអ៊ុយក្រែន កំពុងរស់នៅក្នុងស្ថានភាពលំបាកលំបិន ដោយសារតែគ្មានអគ្គិសនីប្រើប្រាស់។ ការវាយប្រហារបាញ់ប្លោងគ្រាប់របស់រុស្ស៊ី បានបន្តកម្ទេចបណ្តាញផលិត និងផ្គត់ផ្គង់ចរន្តអគ្គិសនីអ៊ុយក្រែន ធ្វើឲ្យប្រជាជនជាង១០លាននាក់ រស់នៅក្នុងភាពងងឹងសូន្យសុង និងគ្មានម៉ាស៊ីនកំដៅ។ សីតុណ្ហភាពបានចាប់ផ្តើមចុះត្រជាក់ ជាមួយនឹងព្រឹលទឹកកក បានចាប់ផ្តើមធ្លាក់ ដែលធ្វើឲ្យប្រជាជនអ៊ុយក្រែន ព្រួយបារម្ភកាន់តែខ្លាំង។ នៅរវាងប៉ុន្មានសប្តាហ៍ខាងមុខនេះ សីតុណ្ហភាពអាចនឹងចុះត្រជាក់ ដល់ -១០°c ។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងសារវីដេអូប្រចាំថ្ងៃ កាលពីយប់ថ្ងៃព្រហស្បតិ៍ ទី១៧វិច្ឆិកា លោកវ្លូឌីមៀរ ហ្សេឡេនស្គី បានថ្លែងថា ក្នុងអំឡុងពេលនេះ ប្រជាជនអ៊ុយក្រែនជាង១០នាក់ នៅទូទាំងប្រទេស ដែលគ្មានចរន្តអគ្គិសនីប្រើប្រាស់។ លោកហ្សេឡេនស្គី បានថ្កោលទោសរុស្ស៊ី ដែលលោកហៅថា ជាចោរភេរវកម្ម បានវាយប្រហារមកលើហេដ្ឋារចនាសម្ព័ន្ធស៊ីវីលរបស់អ៊ុយក្រែន ដែលមានដូចជារោងចក្រផលិតចរន្តអគ្គិសនី បណ្តាញខ្សែភ្លើង និងបណ្តាញផ្គត់ផ្គង់ទឹកស្អាតជាដើម។ លោកបានចាត់ទុកថា រុស្ស៊ីកំពុងតែធ្វើសង្គ្រាមសម្លាប់ប្រជាជនអ៊ុយក្រែន តាមរយៈការផ្តាច់ចរន្តអគ្គិសនី ឲ្យប្រជាជនអ៊ុយក្រែនស្លាប់ដោយសីតុណ្ហភាពត្រជាក់ ដោយសារតែគ្មានម៉ាស៊ីនកំដៅប្រើប្រាស់។
ដោយឡែក លោកឌីមីត្រ ប៉េឆកូវ អ្នកនាំពាក្យវិមានក្រេមឡាំង បានឆ្លើយតបមកវិញថា ប្រជាជនអ៊ុយក្រែនលំបាកវេទនា គឺដោយសារតែរដ្ឋាភិបាលអ៊ុយក្រែនខ្លួនឯង នៅតែរឹងរូស មិនព្រមចរចាជាមួយរុស្ស៊ី។
គួររំលឹកថា គិតចាប់ពីខែតុលាមក កងទ័ពរុស្ស៊ីបានសំរុកវាយប្រហារ បាញ់ប្លោងគ្រាប់មីស៊ីល ទៅលើហេដ្ឋារចនាសម្ព័ន្ធស៊ីវីលចាំបាច់ជាច្រើនរបស់អ៊ុយក្រែន ដែលភាគច្រើនគឺជារោងចក្រផលិតចរន្តអគ្គិសនី បណ្តាញខ្សែភ្លើង និងបណ្តាញផ្គត់ផ្គង់ទឹកស្អាតជាដើម។ ការវាយប្រហារ ដែលមានទំរង់ជាការសងសិក ខណៈដែលកងទ័ពរុស្ស៊ីបានដកថយចេញពីតំបន់ឃែរសុន និងបរាជ័យនៅតាមតំបន់ផ្សេងៗទៀត។ កាលពីថ្ងៃព្រហស្បតិ៍ កងទ័ពអ៊ុយក្រែន បានស្ទាក់កំទេចបានមីស៊ីល២គ្រាប់របស់រុស្ស៊ី ព្រមទាំងយានដ្រូនអត្តឃាតដែលរុស្ស៊ីទិញពីអ៊ីរ៉ង់ជាច្រើនគ្រឿងទៀត។
សូមបញ្ជាក់ថា ដោយសារតែហេដ្ឋារចនាសម្ព័ន្ធថាមពល ត្រូវខូចខាតខ្ទេចខ្ទី ទីក្រុងធំៗជាច្រើនរបស់អ៊ុយក្រែន និងជាពិសេសរដ្ឋធានីកៀវ ត្រូវរស់នៅក្នុងភាពងងឹងសូន្យសុង គ្មានម៉ាស៊ីនកំដៅប្រើប្រាស់ទប់ទល់នឹងសីតុណ្ហភាពត្រជាក់។ លោកOlekseiï Kouleba អភិបាលរដ្ឋធានីកៀវ បានលើលឡើងនៅថ្ងៃព្រហស្បតិ៍ថា ប្រជាជនអ៊ុយក្រែនកំពុងតស៊ូប្រឹងរស់ ក្នុងលក្ខខណ្ឌយ៉ាងលំបាក ខណៈព្រឹលទឹកកកចាប់ផ្តើមធ្លាក់ហើយ។ នៅសប្តាហ៍ខាងមុខនេះ សីតុណ្ហភាពនឹងធ្លាក់ចុះដល់-១០°c។
ក្រុមហ៊ុនផ្គត់ផ្គង់អគ្គិសនីរដ្ឋអ៊ុយក្រែន Ukrenergo បានប្រកាសថាបណ្តាញអគ្គិសនីត្រូវកាត់ផ្តាច់ច្រើនថ្ងៃទៀត ដោយសារតែស្ថានការណ៍ខូចខាតធ្ងន់ធ្ងរខ្លាំង។ ដូចគ្នាដែរ តំណាងក្រុមហ៊ុនអគ្គិសនីឯកជនអ៊ុយក្រែន DTEK បានលើកឡើងថា ទំហំនៃការខូចខាតខ្ទេចខ្ទីនៃប្រព័ន្ធថាមពលអគ្គិសនីអ៊ុយក្រែន គឺធ្ងន់ធ្ងរសម្បើមណាស់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ