ទីភ្នាក់ងារអវកាសអឺរ៉ុបជំរុញឲ្យប្រទេសសមាជិកបង្កើនថវិកាដើម្បីអាចប្រកួតប្រជែងជាមួយមហាអំណាចផ្សេង
ប្រទេសសមាជិកទីភ្នាក់ងារអវកាសអឺរ៉ុប ហៅកាត់ថា “អេសា” (ESA) ជួបប្រជុំគ្នានៅថ្ងៃអង្គារ និងថ្ងៃពុធនេះ ដើម្បីពិភាក្សា និងអនុម័តកញ្ចប់ថវិកាថ្មី ដោយនៅក្នុងនោះ ថ្នាក់ដឹកនាំអេសាបានអំពាវនាវសុំឲ្យប្រទេសសមាជិកទាំង ២២ប្រទេស បង្កើនថវិកា ដើម្បីឲ្យអឺរ៉ុបអាចបន្តឈរជើងក្នុងវិស័យអវកាស ប្រកួតប្រជែងជាមួយនឹងប្រទេសផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ទីភ្នាក់ងារអវកាសអឺរ៉ុប “អេសា” ស្នើសុំដោយទទូចឲ្យប្រទេសសមាជិកបង្កើនកញ្ចប់ថវិកាឲ្យបានដល់ ១៨ពាន់៥រយលានអឺរ៉ូ សម្រាប់ចំណាយក្នុងវិស័យអវកាស នៅក្នុងរយៈពេល ៣ឆ្នាំខាងមុខ ពោលគឺ កើនឡើងរហូតដល់ទៅជាង ១ភាគ៤ បើធៀបនឹងកញ្ចប់ថវិកាក្នុងរយៈពេល ៣ឆ្នាំកន្លងទៅ។
កញ្ចប់ថវិកានេះនឹងត្រូវយកទៅចំណាយ ដោយផ្តោតជាអាទិភាពលើវិស័យចំនួន៣។ ទីមួយ គឺបេសកកម្មតាមសង្កេតមើលអាកាសធាតុលើភពផែនដី ជាពិសេស តាមដានមើលអំពីផលប៉ះពាល់ដោយការឡើងកម្តៅផែនដី។ ទីពីរ មធ្យោបាយដឹកជញ្ជូនអវកាស ជាពិសេស គម្រោងរ៉ុកកែតអវកាសថ្មី ធុន Ariane 6 ដែលគេគ្រោងនឹងដាក់ឲ្យដំណើរការនៅឆ្នាំក្រោយ។ ទីបី បេសកកម្មបញ្ជូនយានអវកាស ទាំងបេសកកម្មគ្មានមនុស្សបើក និងទាំងបេសកកម្មដែលមានដឹកអវកាសយានិក ដើម្បីសិក្សាស្រាវជ្រាវនៅក្នុងទីអវកាស។
គោលដៅចម្បងបំផុតរបស់អឺរ៉ុប គឺធ្វើយ៉ាងណាកាត់បន្ថយគម្លាតជាមួយប្រទេសមហាអំណាចអវកាសផ្សេងទៀត ជាពិសេស សហរដ្ឋអាមេរិក និងចិន ដែលសុទ្ធតែបានចំណាយលុយយ៉ាងច្រើនសន្ធឹកសន្ធាប់ក្នុងវិស័យអវកាស នៅក្នុងរយៈពេលប៉ុន្មានឆ្នាំកន្លងទៅនេះ ក៏ដូចជាប្រទេសចំណូលថ្មី ក្នុងវិស័យអវកាស ជាពិសេស ប្រទេសឥណ្ឌា។
នៅអឺរ៉ុប គេសង្កេតឃើញថា បើទោះបីជាមានទីភ្នាក់ងារអវកាសរួមគ្នា គឺ អេសា ក៏ប៉ុន្តែ នៅតែមានការប្រកួតប្រជែងគ្នា រវាងប្រទេសសមាជិកគ្នាឯង នៅក្នុងវិស័យមួយចំនួន ជាពិសេស គឺការប្រជែងគ្នាក្នុងរយៈពេលប៉ុន្មានឆ្នាំចុងក្រោយនេះ នៅក្នុងវិស័យរ៉ុកកែតអវកាស ដោយនៅក្នុងនោះ គេសង្កេតឃើញថា បារាំងជាអ្នកចេញមុខជំរុញការអភិវឌ្ឍរ៉ុកកែតធុន Ariane អ៊ីតាលីការពារកម្មវិធីរ៉ុកែតធុន Vega ចំណែកអាល្លឺម៉ង់កំពុងតែព្យាយាមជំរុញក្រុមហ៊ុនចំណូលថ្មី ដែលអភិវឌ្ឍបច្ចេកវិទ្យារ៉ុកកែតអវកាសធុនតូចៗ តែចំណាយលុយតិច។
ថ្លែងនៅចំពោះមុខអ្នកសារព័ត៌មាន នៅមុនពេលបើកកិច្ចប្រជុំថ្នាក់រដ្ឋមន្រ្តី នៅថ្ងៃអង្គារនេះ រដ្ឋមន្រ្តីក្រសួងសេដ្ឋកិច្ចបារាំងបានអំពាវនាវដល់គ្រប់ប្រទេសសមាជិកទីភ្នាក់ងារអវកាសអឺរ៉ុបទាំងអស់ឲ្យបញ្ឈប់ការប្រកួតប្រជែងរវាងគ្នាឯង ហើយងាកមករួបរួមគ្នាជាធ្លុងមួយ ដាក់ចេញនូវគោលនយោបាយអវកាសតែមួយក្នុងក្របខណ្ឌអឺរ៉ុប ដើម្បីឲ្យអឺរ៉ុបអាចឈរជើងប្រកួតប្រជែងជាមួយនឹងប្រទេសមហាអំណាចអវកាសផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ