អាជ្ញាធរអង់គ្លេសបញ្ជាឲ្យឈប់ប្រើកាម៉េរ៉ាសុវត្ថិភាពរបស់ក្រុមហ៊ុនចិន នៅតាមទីតាំងសំខាន់ៗ
រដ្ឋាភិបាលអង់គ្លេសបានចេញបញ្ជា ប្រាប់ទៅក្រសួងទាំងអស់របស់ខ្លួន ថាត្រូវឈប់ដាក់កាម៉េរ៉ាសុវត្ថិភាព ផលិតដោយក្រុមហ៊ុនចិន នៅតាមទីតាំងសំខាន់ៗ។ នេះគឺជាការសម្រេច ដែលត្រូវបានធ្វើឡើង ក្នុងបរិបទដែលរដ្ឋាភិបាលអង់គ្លេស កំពុងចាត់វិធានការខ្លាំងក្លា ចំពោះក្រុមហ៊ុនចិនមួយចំនួន ដែលមានពាក់ព័ន្ធនឹងប្រព័ន្ធស៊ើបការណ៍សំងាត់របស់រដ្ឋាភិបាលចិន ហើយដែលអាចជាការគំរាមមកលើសន្តិសុខជាតិអង់គ្លេស។
ចុះផ្សាយនៅថ្ងៃ៖
ស្តាប់ - ០២:២៥
ផ្អែកតាមអង្គការការពារសិទ្ធិសេរីភាពសាធារណៈ Big Brother Watch គឺស្ថាប័នរដ្ឋរបស់អង់គ្លេសភាគច្រើន ប្រើប្រាស់កាម៉េរ៉ាសុវត្ថិភាពរបស់ក្រុមហ៊ុនចិន២ គឺ Hikivision និង Dahua។ កាលពីខែកក្កដាកន្លងទៅ សមាជិកសភាអង់គ្លេសចំនួន៦៧នាក់ បានទាមទារឲ្យរដ្ឋាភិបាលអង់គ្លេស ត្រូវតែហាមឃាត់ ការលក់ចែកចាយ និងការប្រើប្រាស់សម្ភារៈបច្ចេកវិទ្យាតាមដានសុវត្ថិភាព ដែលផលិតដោយក្រុមហ៊ុនរបស់ចិនទាំង២នេះ ដែលត្រូវជាប់សង្ស័យថា បានចូលរួមក្នុងសកម្មភាពរំលោភសិទ្ធិមនុស្ស នៅខេត្តស៊ីមជាំង។
នៅចំពោះមុខអង្គសភា លោកOliver Dowden រដ្ឋមន្ត្រីក្រសួងបច្ចេកវិទ្យាអង់គ្លេស បានឆ្លើយតបថា រដ្ឋាភិបាលមិនអាចទៅហាមឃាត់ក្រុមហ៊ុនចិនទាំងនេះ ដោយងាយងាយ និងគ្មានហេតុផលនោះទេ។ តែយ៉ាងណា រដ្ឋាភិបាលនឹងចេញវិធានការ ទប់ស្កាត់ កាត់បន្ថយ កុំឲ្យស្ថាប័នរដ្ឋរបស់អង់គ្លេស ប្រើប្រាស់កាម៉េរ៉ាសុវត្ថិភាពផលិតដោយក្រុមហ៊ុនចិន ហើយដែលអាចពាក់ព័ន្ធជាមួយនឹងកាតព្វកិច្ចបែងចែកទិន្នន័យទៅឲ្យអាជ្ញាធរចារកិច្ចចិន។
តំណាងរដ្ឋាភិបាលអង់គ្លេសរូបនេះ បានបន្ថែមថា ចាប់ពីពេលនេះទៅ កាម៉េរ៉ាសុវត្ថិភាពប្រភេទទាំងនេះ មិនអាចត្រូវ តផ្ជាប់ ជាមួយបណ្តាញរួមបានទេ។ លោករដ្ឋមន្ត្រីអះអាងថា យោងតាមការស៊ើបអង្កេត គឺកាម៉េរ៉ាសុវត្ថិភាព ផលិតនៅចិនទាំងនេះ អាចជាការគំរាមទៅលើសន្តិសុខជាតិរបស់អង់គ្លេស ព្រោះវាអាចតភ្ជាប់ចូលជ្រៀតទៅក្នុងបណ្តាញបច្ចេកវិទ្យារួម ហើយដែលត្រូវតែមានវិធានការសន្តិសុខបន្ថែម ឲ្យបានតឹងតែងបំផុត។ នៅក្នុងន័យនេះ ក្រសួងទាំងអស់ បានទទួលបានបញ្ជាហើយ ថាត្រូវដូរកាម៉េរ៉ាថ្មី និងត្រូវឈប់ដាក់កាម៉េរ៉ាចិនទៅថ្ងៃខាងមុខទៀត នៅពេលណាដែលវាជាផលិតផល របស់ក្រុមហ៊ុនចិន ដែលស្ថិតនៅក្រោមបង្គាប់ច្បាប់សន្តិសុខជាតិរបស់ចិន។
ឆ្លើយតបទៅនឹងការលើកឡើង របស់លោករដ្ឋមន្ត្រីអង់គ្លេស អ្នកនាំពាក្យ Hikivision បានប្រតិកម្មថា ការសន្និដ្ឋានរបស់អាជ្ញាធរអង់គ្លេស ដែលថាក្រុមហ៊ុន Hikivision ជាការគំរាមដល់សន្តិសុខជាតិអង់គ្លេស គឺជាការភ័ន្តច្រឡំទាំងស្រុង។ អ្នកនាំពាក្យរូបនេះ អះអាងថា ជានិច្ចជាកាល ក្រុមហ៊ុនខ្លួនតែងតែបានបង្ហាញនូវតម្លាភាពពេញលេញ ទាក់ទិននឹងប្រតិបត្តិការជំនួញនៅលើទឹកដីអង់គ្លេស។ អ្នកនាំពាក្យ Hikivision បានបន្ថែមថា ក្រុមហ៊ុនបានទាក់ទងទៅតំណាងរដ្ឋាភិបាលអង់គ្លេសហើយ ដើម្បីបំភ្លឺចំពោះការយល់ច្រឡំ និងការវិនិច្ឆ័យខុសទាំងអម្បាលម៉ាណ ស្តីពីសកម្មភាពធ្វើជំនួញរបស់ក្រុមហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ