អ៊ុយក្រែន ៖ ទឹកកកចាប់ផ្តើមធ្លាក់ ប្រជាជនប្រឈមនឹងកង្វះចរន្តអគ្គីសនីផង ការវាយប្រហារផង
នៅថ្ងៃអាទិត្យទី ២៧វិច្ឆិកានេះ សីតុណ្ហភាពបានធ្លាក់ក្រោមសូន្យទាំងយប់ទាំងថ្ងៃ ព្រមទាំងមានព្រិលធ្លាក់យ៉ាងច្រើនទៀត នៅក្រុងកៀវ។ នេះបើតាមការព្យាករឧតុនិយម។ អាកាសធាតុបែបនេះបានធ្វើឱ្យលក្ខខណ្ឌរស់នៅរបស់ប្រជាពលរដ្ឋអ៊ុយក្រែនដែលខ្វះចរន្តអគ្គីសនីសម្រាប់បំភ្លឺនិងកម្តៅផ្ទះស្រាប់ កាន់តែលំបាកមួយកំរិតបន្ថែមទៀត។ ជាមួយស្ថានភាពនេះ ប្រតិបត្តិការនៅលើសមរភូមិប្រយុទ្ធក៏កាន់តែស្មុគស្មាញខ្លាំងដែរ។
ចុះផ្សាយនៅថ្ងៃ៖
ស្តាប់ - ០១:៣៦
លក្ខខណ្ឌអាកាសធាតុអាក្រក់ ភ្លៀងខ្យល់ភក់ត្រជាក់ បានពន្យឺតប្រតិបត្តិការយោធាតាំងពីប៉ុន្មានថ្ងៃមកហើយ។ នេះបើតាមវិទ្យាស្ថានសិក្សាសង្គ្រាមអាមេរិក Think Tank។ ក្រសួងការពារជាតិអង់គ្លេសបានលម្អិតថា ការប្រយុទ្ធនៅតែបន្តមាននៅតំបន់ដុនបាស និងក្រុងដូណែតស្ក៍ តែពុំមានការជឿនលឿនទៅមុខអ្វីគួរឱ្យកត់សម្គាល់ទេ។
សម្រាប់ក្រុមអ្នកជំនាញអាមេរិក នៅពេលមេឃត្រជាក់ខ្លាំង ដីចាប់កក ប្រតិបត្តិការនឹងចាប់បង្កើនល្បឿនហើយ។ ក្នុងពេលរង់ចាំ អាជ្ញាធរអ៊ុយក្រែន ដែលព្រួយបារម្ភនឹងការវាយប្រហោរផ្លោងគ្រាប់ពីសំណាក់រុស្ស៊ី បានអំពាវនាវឱ្យប្រជាពលរដ្ឋត្រៀមបំរុងទុកនូវ ទឹកនិងស្បៀងអាហារក្រៀមៗ ឱ្យបានគ្រប់គ្រាន់។
លើផ្នែកថាមពលវិញ អ៊ុយក្រែនកំពុងរួសរាន់ស្តាររចនាសម្ព័ន្ធទឹកភ្លើង ព្រោះរដូវរងារកាន់ចាប់ផ្តើមមែនហើយ។ សម្រាប់ពេលនេះ ក្រុមហ៊ុនអគ្គីសនីជាតិបានជូនដំណឹងថាអាចផលិតចរន្តអគ្គីសនីបានត្រឹមតែបីភាគបួននៃសេចក្តីត្រូវការប៉ុណ្ណោះ។ ដូច្នេះការកាត់និងផ្តាច់ភ្លើងត្រូវតែកើតមាននៅទូទាំងប្រទេស។ ប្រធានាធិបតីអ៊ុយក្រែន លោក ហ្សេឡេនស្គី បានចេញវិធានការ កំរិតការប្រើប្រាស់ភ្លើងក្នុង ១៤តំបន់ នៃប្រទេសដែលមានសរុប២៧តំបន់ ដោយពន្យល់ថា បើប្រើភ្លើងកាន់ច្រើននៅពេលល្ងាច ការដាច់ភ្លើងកាន់តែញយ។ ស្ថានភាពនៅក្រុងកៀវ បានប្រសើរឡើងបន្តិច ប៉ុន្តែក្នុងមួយថ្ងៃអ្នកក្រុងអាចមានភ្លើងអគ្គីសនីប្រើប្រាស់តែបួនម៉ោងប៉ុណ្ណោះក្នុងមួយថ្ងៃៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ