នាយករដ្ឋមន្រ្តីហ៊ុន សែន ប្រកាសគាំទ្រកិច្ចខិតខំប្រឹងប្រែងរបស់លោកម៉ាក្រុងក្នុងសំណុំរឿងអ៊ុយក្រែន
លោកនាយករដ្ឋមន្រ្តីហ៊ុន សែន ដែលចូលរួមក្នុងសន្និសីទអន្តរជាតិ ស្តីពីអ៊ុយក្រែន នៅក្នុងទីក្រុងប៉ារីស នៅថ្ងៃអង្គារ ១៣ធ្នូនេះ បានគូសបញ្ជាក់ អំពីជំហររបស់កម្ពុជា ដែលប្រឆាំងនឹងការណ៍ដែលប្រទេសមួយរំលោភបំពានទៅលើបូរណភាពទឹកដីរបស់ប្រទេសមួយទៀត ហើយបានប្រកាសគាំទ្រកិច្ចខិតខំប្រឹងប្រែងរបស់លោកប្រធានាធិបតីបារាំង អេម៉ានុយអែល ម៉ាក្រុង ក្នុងការស្វែងរកដំណោះស្រាយបញ្ចប់សង្គ្រាម តាមរយៈការចរចា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសុន្ទរកថា ក្នុងសន្និសីទអន្តរជាតិស្តីពីអ៊ុយក្រែននេះ លោកនាយករដ្ឋមន្រ្តី ហ៊ុន សែន បានប្រៀបធៀប រវាងអ្វីដែលគេរៀបចំធ្វើឡើងនៅប៉ារីសនៅថ្ងៃអង្គារនេះ ទៅនឹងសន្និសីទទីក្រុងប៉ារីស កាលពីជាង៣០ឆ្នាំមុន ដែលឈានទៅដល់ការចុះកិច្ចព្រមព្រៀងបញ្ចប់សង្គ្រាមរ៉ាំរ៉ៃនៅក្នុងប្រទេសកម្ពុជា។
សម្រាប់លោកនាយករដ្ឋមន្រ្តី ហ៊ុន សែន គេមិនអាចបញ្ចប់សង្គ្រាម ដោយធ្វើសង្គ្រាមបានទេ គឺចាំបាច់ត្រូវតែរកដំណោះស្រាយតាមរយៈការចរចាតាមផ្លូវនយោបាយ។ នៅក្នុងន័យនេះ លោកនាយករដ្ឋមន្រ្តីកម្ពុជាបានបង្ហាញនូវការគាំទ្រយ៉ាងមុតមាំ ចំពោះកិច្ចខិតខំប្រឹងប្រែងរបស់បារាំង និងជាពិសេស កិច្ចខិតខំប្រឹងប្រែងរបស់លោកប្រធានាធិបតីអេម៉ានុយអែល ម៉ាក្រុង ដែលយកការចរចា ជាអាទិភាពខ្ពស់ ដើម្បីស្វែងរកដំណោះស្រាយបញ្ចប់សង្គ្រាមអ៊ុយក្រែន ដោយឈរលើស្មារតីយកចិត្តទុកដាក់ អំពីក្តីកង្វល់ខាងផ្នែកសន្តិសុខ របស់គ្រប់ភាគី នៅក្នុងជម្លោះ។
ការប្រកាសគាំទ្រចំពោះលោកម៉ាក្រុង ពីសំណាក់ប្រទេសកម្ពុជា ដែលជាប្រធានផ្លាស់វេនរបស់អាស៊ានផងនោះ ត្រូវបានធ្វើឡើង នៅក្នុងពេលដែលប្រទេសមួយចំនួន នៅក្នុងសហភាពអឺរ៉ុបជាមួយបារាំង ជាពិសេស បណ្តាប្រទេសនៅអឺរ៉ុបខាងកើត តែងតែបានរិះគន់លោកម៉ាក្រុងថា មានជំហរទន់ជ្រាយចំពោះលោកពូទីន។ ជាអាទិ៍ លោកម៉ាក្រុងត្រូវទទួលរងនូវការរិះគន់ កាលពីសប្តាហ៍កន្លងទៅ ពីសំណាក់ប៉ូឡូញ និងប្រទេសនៅក្នុងតំបន់សមុទ្របាល់ទិក ក្រោយពីលោកប្រធានាធិបតីបារាំងបានលើកឡើងថា នៅក្នុងការដោះស្រាយជម្លោះអ៊ុយក្រែន គេត្រូវគិតគូរផងដែរ អំពីការធានាសន្តិសុខចំពោះរុស្ស៊ី នៅក្រោយសង្គ្រាម។
គួរបញ្ជាក់ថា នៅក្នុងទីក្រុងប៉ារីស ក្រៅពីចូលរួមក្នុងសន្និសីទអន្តរជាតិស្តីពីអ៊ុយក្រែន លោកនាយករដ្ឋមន្រ្តីហ៊ុន សែន ក៏ជួបជាលក្ខណៈទ្វេភាគីផងដែរជាមួយលោកអេម៉ានុយអែល ម៉ាក្រុង នៅឯវិមានអេលីសេ។ ជំនួប ដែលទទួលនូវការរិះគន់ ពីសំណាក់លោកសម រង្ស៊ី ដោយតាមរយៈលិខិតចំហ ទៅកាន់លោកអេម៉ានុយអែល ម៉ាក្រុង លោក សម រង្ស៊ី បានលើកឡើងថា ការណ៍ដែលលោកម៉ាក្រុងទទួលជួបលោកនាយករដ្ឋមន្រ្តី ហ៊ុន សែន នៅពេលនេះ គឺជាកាយវិការមួយ ដែលផ្តល់កិត្តិយស ចំពោះលោកនាយករដ្ឋមន្រ្តី ហ៊ុន សែន ហើយថា វាគឺជាកំហុសឆ្គងខាងសីលធម៌មួយ ប្រសិនបើគេមើលទៅលើស្ថានភាពរំលោភសិទ្ធិមនុស្ស នៅក្នុងប្រទេសកម្ពុជាបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ