បណ្តាញព័ត៌មានអាមេរិកអះអាងថា អាមេរិកត្រៀមយល់ព្រមផ្តល់មីស៊ីលPatriot ឲ្យអ៊ុយក្រែន
រដ្ឋាភិបាលសហរដ្ឋអាមេរិក បានត្រៀមរួចហើយ ក្នុងការឆ្លើយយល់ព្រមផ្តល់ឲ្យអ៊ុយក្រែន នូវប្រព័ន្ធបាញ់មីស៊ីល និងគ្រាប់មីស៊ីល Patriot ដ៏មានប្រសិទ្ធិភាពរបស់ខ្លួន។ នេះបើផ្អែកតាមការចុះផ្សាយ របស់បណ្តាញព័ត៌មានអាមេរិក ដោយស្រង់ប្រភពពីមន្ត្រីរដ្ឋាភិបាល ដែលសុំមិនបញ្ចេញឈ្មោះ។
ចុះផ្សាយនៅថ្ងៃ៖
ស្តាប់ - ០២:២៣
អស់រយៈពេលជាច្រើនសប្តាហ៍មកហើយ ដែលលោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានទទូចស្នើសុំប្រព័ន្ធបាញ់មីស៊ីលទំនើបៗ ពីក្រុមប្រទេសលោកខាងលិច ដើម្បីយកទៅទប់ទល់ជាមួយនឹងការឈ្លានពានរបស់កងទ័ពរុស្ស៊ី។ អ៊ុយក្រែនកំពុងតែរងនូវការវាយប្រហារ សឹងតែគ្មានលោះថ្ងៃ ពីសំណាក់រុស្ស៊ី ទៅលើហេដ្ឋារចនាសម្ព័ន្ធ ផលិតនិងចែកចាយថាមពលអគ្គិសនី។
យោងតាមការចុះផ្សាយរបស់បណ្តាញព័ត៌មានCNN គឺភាគីអាមេរិកទំនងជាកំពុងតែត្រៀមខ្លួន ប្រគល់ប្រព័ន្ធនិងគ្រាប់មីស៊ីល Patriot ទៅឲ្យអ៊ុយក្រែន។ កិច្ចព្រមព្រៀងចុងក្រោយ អាននឹងត្រូវបានគេប្រកាសជាផ្លូវការ នៅចុងសប្តាហ៍នេះ នៅពេលលោករដ្ឋមន្ត្រីការពារជាតិអាមេរិក Lloyd Austin ពិនិត្យរួចរាល់ ហើយបញ្ជូនទៅកាន់សេតវិមាន ដើម្បីសម្រេច។
សូមបញ្ជាក់ថា មីស៊ីល Patriot របស់អាមេរិក គឺជាប្រភេទមីស៊ីលចំងាយឆ្ងាយ ដែលធ្លាប់ត្រូវបានគេទទួលស្គាល់ប្រសិទ្ធភាពខ្ពស់ កាលពីក្នុងអំឡុងពេលសង្គ្រាមឈូងសមុទ្រ និងសង្គ្រាមនៅអ៊ីរ៉ាក់។ ប្រព័ន្ធមីស៊ីលនេះ អាចត្រូវដាក់បញ្ឈរនៅលើរថយន្តកាមីញ៉ុង ដែលមានបំពាក់ដោយ ប្រព័ន្ធរ៉ាដា អាចចាប់រលកសញ្ញាដោយស្វ័យប្រវត្ត ដឹងថាមានយន្តហោះ មានយានដ្រូន ឬក៏មីស៊ីលហោះកាត់ នៅក្នុងបរិវេណ១០០គីឡូម៉ែត្រជុំវិញ។ គេជឿថា បើអ៊ុយក្រែន មានមីស៊ីលដ៏ទំនើបនេះ គឺអាចជួយបានច្រើន ដើម្បីយកឈ្នះកងទ័ពរុស្ស៊ី។
យ៉ាងណាក៏ដោយ មានចំណុចមិនទាន់ច្បាស់ប្រាកដជាច្រើន ដែលទំនងជាធ្វើឲ្យសហរដ្ឋអាមេរិក នៅតែស្ទាក់ស្ទើ មិនទាន់សម្រេចច្បាស់ ក្នុងការប្រគល់ប្រព័ន្ធមីស៊ីល Patriot ទៅឲ្យអ៊ុយក្រែន។ ប្រព័ន្ធមីស៊ីលនេះ ជាអាវុធដ៏ទំនើបនិងសំខាន់របស់កងទ័ពអាមេរិក ហើយដែលអាចមានន័យថា បើអាមេរិគឲ្យទៅអ៊ុយក្រែន គឺអាមេរិកនឹងចូលរួមលូកដៃកាន់តែខ្លាំង តទល់ជាមួយនឹងរុស្ស៊ី នៅក្នុងសង្គ្រាមនៅអ៊ុយក្រែន។
បន្ថែមពីនេះ ប្រព័ន្ធមីស៊ីល Patriot មានលក្ខណៈស្មុគស្មាញខ្លាំង ដែលតម្រូវឲ្យមានការបង្វឹកកងទ័ពអ៊ុយក្រែន ឲ្យចេះប្រើប្រាស់វា ដែលអាចត្រូវចំណាយពេលយូរ។ ជាងនេះទៀត កងទ័ពអាមេរិកមានប្រព័ន្ធមីស៊ីលនេះ មិនច្រើនប៉ុន្មាននោះទេ ព្រោះវាមានតម្លៃថ្លៃ។ ជាងនេះទៀត ប្រព័ន្ធមីស៊ីលPatriot នេះ គឺជាធាតុចាំបាច់មួយរួចទៅហើយ នៅក្នុងប្រព័ន្ធការពារយុទ្ធសាស្ត្ររបស់អង្គការអូតង់ នៅព្រំដែនខាងកើត ដែលបែរមុខទៅកាន់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ