បារាំង៖មានស្លាប់ ១០នាក់ក្នុងនោះមានក្មេង ៥នាក់នៅក្នុងហេតុការណ៍ឆេះអគារនៅខេត្តលីយ៉ុង
នៅក្នុងប្រទេសបារាំង ហេតុការណ៍ឆាបឆេះអគារលំនៅដ្ឋាននៅខេត្តលីយ៉ុងបានបណ្តាលឲ្យស្លាប់មនុស្សចំនួន ១០នាក់ ក្នុងនោះមានកូនក្មេងចំនួន ៥នាក់ និងមានអ្នករបួសចំនួន ១៤នាក់។ ក្នុងចំណោមអ្នករបួសទាំង ១៤នាក់ មាន ៤នាក់កំពុងស្ថិតក្នុងការសង្រ្គោះបន្ទាន់។ ឧប្បត្តិវហេតុនេះបានកើតមាននៅយប់ថ្ងៃព្រហស្បតិ៍ ទី១៥ឆ្លងចូលថ្ងៃសុក្រ ទី១៦ ធ្នូ។ ប៉ូលិសបានបញ្ជាក់ថា ភ្លើងត្រូវបានពន្លត់ តែគេនៅមិនទាន់បានដឹងពីមូលហេតុនៃការឆាបឆេះនោះនៅឡើយទេ។
ចុះផ្សាយនៅថ្ងៃ៖
ស្តាប់ - ០១:៤២
គឺនៅវេលាម៉ោង ៣ភ្លឺរំលងអធ្រាត្រថ្ងៃព្រហស្បតិ៍ ទី១៥ឆ្លងចូលថ្ងៃសុក្រ ទី១៦ ធ្នូដែលភ្លើងបានផ្តើមឆាបឆេះទៅលើអគារលំនៅដ្ឋានមួយដែលមានកម្ពស់ ៧ជាន់។ ប្រភពអណ្តាតភ្លើងបានចេញពីជាន់ដី រួចឆ្លងឆាបឆេះយ៉ាងសន្ធោសន្ធៅរាលដាលនៅជាន់ខាងលើៗដែលបានធ្វើឲ្យអ្នករស់នៅក្នុងអគារនោះជាប់គាំងមិនអាចចាកចេញបាន។ យោងតាមប៉ូលិស មានក្រុមអ្នកពន្លត់អគ្គីភ័យជិត ១៧០នាក់បានចេញអន្តរាគមន៍ពន្លត់ភ្លើងដោយបានធ្វើឲ្យគ្នីគ្នាគេចំនួន ២នាក់រងរបួសស្រាល។ តែអគ្គីភ័យដ៏សាហាវមួយនេះបានផ្តាច់ជីវិតមនុស្សចំនួន ១០នាក់ ក្នុងនោះមានក្មេងចំនួន ៥នាក់ និងបណ្តាលឲ្យរបួសចំនួន ១៤នាក់ ក្នុងនោះមាន ៤នាក់កំពុងស្ថិតក្នុងការសង្រ្គោះបន្ទាន់។
« ជារឿងរន្ធត់ តុល្យការមានភាពធ្ងន់ធ្ងរណាស់។ ខ្ញុំបាននិយាយជាមួយលោកប្រធានាធិបតី » នេះជាសម្តីរបស់រដ្ឋមន្រ្តីក្រសួងមហាផ្ទៃលោក Gérald Darmanin ដែលបានថ្លែងនៅមុនលោកទៅដល់ទីកន្លែងកើតហេតុនាព្រឹកថ្ងៃសុក្រ ទី១៦ ធ្នូនេះ។ ចំណែកអយ្យការខេត្តលីយ៉ូងបានប្រកាសបើកការស៊ើបអង្កេតមួយដើម្បីស្វែងរកមូលហេតុពិតនៃការឆាបឆេះនេះ។ តើប្រភពនៃការឆាបឆេះនេះបានកើតចេញពីទង្វើរបស់មនុស្ស ឬមួយមកពីមានផ្ទុះខ្សែភ្លើង?។ មានតែការស៊ើបអង្កេតទេទើបគេអាចឆ្លើយនឹងសំណួរនេះបាន។ តែប៉ូលិសបានបញ្ជាក់រួចហើយ គ្មានសមត្ថកម្មណាមួយត្រូវបានទាត់ចោលនៅក្នុងការស៊ើបអង្កេតទេ។
គួរបញ្ជាក់ថា អគារដែលរងការឆាបឆេះស្ថិតក្នុងស្រុក Vaulx-en-Velin នៃប៉ែកឦសានខេត្តលីយ៉ុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ