សម្តេចប៉ាប ថ្លែងសារជូនពរទៅកាន់ពិភពលោក ដោយឧទ្ទិសពរពិសេសជូនដល់អ៊ុយក្រែន
ជាប្រពៃណីក្នុងថ្ងៃបុណ្យណូអែល សម្តេចប៉ាប ហ្វ្រង់ស័រ តែងថ្លែងសារជូនពរទៅកាន់ពិភពលោកទាំងមូល ពីបុរីវ៉ាទីកង់ ដែលមានគ្រិស្តនិកជនជាច្រើនពាន់នាក់មកជួបជុំ។ សារណូអែលឆ្នាំនេះ សម្តេចប៉ាបបានឧទ្ទិសពរជាពិសេសដល់អ៊ុយក្រែន។ ហើយក្នុងពិធីសូត្រឆ្លងចូលថ្ងៃទី ២៥ធ្នូ សម្តេចប៉ាបបានបរិហារអ្នកដែលចង់លេបប្រទេសជិតខាង។
ចុះផ្សាយនៅថ្ងៃ៖
ស្តាប់ - ០១:៤២
ជាមួយនឹងការឧទ្ទិសពរសូមសន្តិភាព សម្តេចប៉ាបដែលចង់រក្សាកិច្ចចរចាជាមួយមូស្គូ ធ្លាប់បានរងការរិះគន់ថាគ្មានជំហរច្បាស់លាស់ប្រឆាំងប្រធានាធិបតីរុស្ស៊ី វ្លាដេមៀ ពូទីន។ ក្នុងពិធីសូត្រធម៌ឆ្លងបុណ្យណូអែល នៅពេលយប់ និងនៅចំពោះមុខគ្រិស្តសាសនិកជនជាង៧ពាន់នាក់ សម្តេចប៉ាបបានបន់ព្រះឱ្យជួយដល់កុមារដែលរស់ក្នុងសង្គ្រាម ក្នុងភាពក្រីក្រ និងភាពអយុត្តិធម៌ ព្រមទាំងបានសម្តែងការសោកស្តាយ នឹងភាពស្រេកឃ្លានអំណាច រហូតជំរុញឱ្យមនុស្សខ្លះ ហ៊ានលេបត្របាក់ប្រទេសជិតខាង ដោយចង់សំដៅលើសង្គ្រាមនៅអ៊ុយក្រែន និងជម្លោះប្រដាប់អាវុធផ្សេងៗទៀត។
នៅក្នុងសារជូនពរថ្ងៃណូអែល ដែលផ្សាយបន្តផ្ទាល់ទៅកាន់ពិភពលោកទាំងមូល សម្តេចប៉ាបហ្វ្រង់ស័រ បានលើកឡើងច្រើន ជាថ្មីទៀត អំពីជម្លោះនៅអ៊ុយក្រែន ដែលប្រារព្វជាលើកទីមួយបុណ្យណូអែលក្រោមស្នូរសំឡេងវាយប្រហារឈ្លានពានរបស់រុស្ស៊ី។ សម្តេចប៉ាប បានបរិហារសង្គ្រាមឆ្កួតលីលា និងបានអំពាវនាវបិទបញ្ចប់ស្នូរអាវុធ។ បើតាមសង្ឃដីការបស់សម្តេចប៉ាប គ្រប់សង្គ្រាមសុទ្ធតែបង្កឱ្យភាពអត់ឃ្លាន ហេតុដូច្នេះហើយបានជាសម្តេចសូមទទូចឱ្យពិភពលោក កុំយកអាហារមកធ្វើអាវុធ តែត្រូវប្តេជ្ញាធ្វើគ្រប់យ៉ាង យកចំណីអាហារមកធ្វើឧបករណ៍សាងសន្តិភាព។
សូមបញ្ជាក់ថាក្នុងខណៈដែលពលរដ្ឋកាន់សាសនាគ្រិស្តកំពុងប្រារព្វពិធីបុណ្យកំណើតព្រះយេស៊ូ សង្ឃកាតូលិកប៉ូឡូញបានធ្វើដំណើរទៅអ៊ុយក្រែន ដើម្បីប្រារព្ធពិធីបុណ្យជាមួយពលរដ្ឋអ៊ុយក្រែនជួបសង្គ្រាម។ ចំណែកពលរដ្ឋអ៊ុយក្រែន ដែលមានទម្លាប់ប្រារព្ធពិធីនៅថ្ងៃទី ៧មករា ភាគច្រើនបានងាកមកប្រារព្វនៅថ្ងៃទី ២៥ធ្នូវិញ ដើម្បីដកខ្លួនឱ្យកាន់តែឆ្ងាយពី រុស្ស៊ី ដែលមានប្រពៃណីសាសនាកាតូលិកនិកាយអ័កតូដុកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ