បារាំង៖ បុរសជនជាតិអ៊ីរ៉ង់ម្នាក់ សម្លាប់ខ្លួនដើម្បីពញ្ញាក់មតិមហាជន អំពីទុក្ខលំបាករបស់ប្រជាជនអ៊ីរ៉ង់
បុរសជនជាតិអ៊ីរ៉ង់ម្នាក់ ឈ្មោះ Mohammad Moradi អាយុ៣៨ឆ្នាំ បានសម្រេចចិត្តសម្លាប់ខ្លួន ដោយលោតពីលើស្ពាន នៅទីក្រុងលីយ៉ុង ប្រទេសបារាំង កាលពីថ្ងៃអង្គារទី២៧ធ្នូ ដើម្បីដាស់ពញ្ញាក់ស្មារតីពិភពលោកទាំងមូល ឲ្យដឹងអំពីទុក្ខលំបាក របស់ប្រជាជនអ៊ីរ៉ង់។ មុននឹងសម្លាប់ខ្លួន បុរសជនជាតិអ៊ីរ៉ង់នេះ បានថតវីដេអូមួយ ផ្សាយតាមបណ្ដាញសង្គម ដែលក្នុងវីដេអូនេះ លោកបានលើកឡើងថា លោកមិនអាចទ្រាំរស់ យកសុខតែម្នាក់ឯងនោះឡើយ ខណៈដែលយុវជនក៏ដូចជាប្រជាជនអ៊ីរ៉ង់នៅក្នុងស្រុកឯណោះ ត្រូវសមត្ថកិច្ចបង្ក្រាប វាយដំ បាញ់សម្លាប់ជារៀងរាល់ថ្ងៃ។
ចុះផ្សាយនៅថ្ងៃ៖
“នៅពេលដែលអ្នកបានមើលវីដេអូនេះ គឺខ្ញុំបានស្លាប់ចាកលោកនេះទៅហើយ។ ខ្ញុំបានសម្រេចចិត្តសម្លាប់ខ្លួន ដើម្បីផ្ញើសារ ប្រាប់ទៅពិភពលោកទាំងមូលថា ប្រជាជនអ៊ីរ៉ង់មានទុក្ខលំបាកខ្លាំងណាស់ ក្នុងពេលបច្ចុប្បន្ននេះ ដោយសារតែរបបដឹកនាំផ្តាច់ការដ៏កាចសាហាវ” ។ នេះគឺសំដីថ្លែងក្នុងវីដេអូ ដែលលោក Mohammad Moradi បានថតទុក នៅមុនពេលលោតចូលទន្លេRhône ពីលើស្ពានមួយនៅទីក្រុងលីយ៉ុង។ សាកសពលោក ត្រូវបានក្រុមសង្គ្រោះស្រង់យកបាន កាលពីល្ងាចថ្ងៃទី២៧ធ្នូ។
ក្នុងវីដេអូ ដែលផ្សាយលើទំព័រ Instagram របស់លោក លោកបានលើកឡើងថា យើងត្រូវតែធ្វើអ្វីម្យ៉ាង ព្រោះសមត្ថកិច្ចអ៊ីរ៉ង់ វាយប្រហារ សម្លាប់យុវជនអ៊ីរ៉ង់ជារៀងរាល់ថ្ងៃ។ តាមរយៈការសម្លាប់ខ្លួននេះ លោកសូមអំពាវនាវ ឲ្យពិភពលោកចូលរួមគាំទ្រ ដល់ចលនាបាតុកម្មដ៏ក្លាហានរបស់យុវជនអ៊ីរ៉ង់ ដើម្បីប្រឆាំងនឹងរបបផ្តាច់ការអ៊ីស្លាម។
សូមបញ្ជាក់ថា លោក Mohammad Moradi ជាជនអ៊ីរ៉ង់ អាយុ៣៨ឆ្នាំ បានមករស់នៅលើទឹកដីបារាំង ៣ឆ្នាំមកហើយ ជាមួយប្រពន្ធនឹងកូន។ មានការងារជាអ្នកបម្រើក្នុងភោជនីយដ្ឋានមួយ លោកក៏គឺជានិស្សិតថ្នាក់បរិញ្ញាប័ត្រប្រវត្តិសាស្ត្រក្នុងសកលវិទ្យាល័យមួយនៅទីក្រុងលីយ៉ុង។
គួរកត់សំគាល់ថា សហគមន៍ជនជាតិអ៊ីរ៉ង់ ដែលរស់នៅប្រទេសបារាំង បានសម្តែងនូវក្តីតក់ស្លុត លាយឡំនឹងការកោតសរសើរបំផុត ចំពោះការតាំងចិត្តដ៏ក្លាហាន ហ៊ានពលីជីវិតរបស់លោក Mohammad Moradi។ ក្រោយដំណឹងធ្វើអត្តឃាតនេះ មនុស្សម្នាបានមកជួបជុំគ្នា ដាក់បាច់ផ្កា និងអុជទៀន នៅលើស្ពាន Gallieni ទីដែលលោក Mohammad Moradi បានលោតទឹកសម្លាប់ខ្លួន។
លោក Thomothé Amini តំណាងសហគមន៍អ៊ីរ៉ង់ម្នាក់បានថ្លែងថា កន្លងមកបណ្តាញព័ត៌មានមិនសូវជាបានខ្វល់ខ្វាយ ផ្សព្វផ្សាយអំពីចលនាបាតុកម្មរបស់ប្រជាជនអ៊ីរ៉ង់ទេ ដោយផ្តោតការយកចិត្តទុកដាក់តែទៅលើសង្រ្គាមនៅអ៊ុយក្រែន។ ស្ត្រីអ៊ីរ៉ង់ម្នាក់ទៀត ឈ្មោះ Lili Mohadjer បានលើកឡើងថា ខ្លួនសង្ឃឹមថា ទង្វើដ៏ក្លាហានរបស់លោក Mohammad Moradi នឹងអាចជួយជំរុញឲ្យបណ្តាញព័ត៌មាន ក៏ដូចជាជារដ្ឋាភិបាលគ្រប់ប្រទេសទាំងអស់ ចូលរួមឈឺឆ្អាល គាំទ្រ ចំពោះចលនាបដិវត្ត ដែលប្រជាជនអ៊ីរ៉ង់កំពុងតែធ្វើនាពេលនេះ ដើម្បីផ្តួលរំលំរបបផ្តាច់ការអ៊ីស្លាមអ៊ីរ៉ង់។
សូមបញ្ជាក់ថា ប្រមាណជាង៣ខែនៃចលនាបាតុកម្មនៅអ៊ីរ៉ង់ គឺមានបាតុករចំនួនយ៉ាងហោច ៤៧៦នាក់ ត្រូវបានសមត្ថកិច្ចអ៊ីរ៉ង់សម្លាប់។ ចលនាបាតុកម្ម ដែលនៅតែមានសន្ទុះខ្លាំងក្លាទូទាំងប្រទេស រហូតមកទល់ពេលនេះ បើទោះបីរបបផ្តាច់ការអ៊ីរ៉ង់ បានកាត់ទោសប្រហារជីវិតបាតករជាច្រើននាក់ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ