សពអតីតសម្តេចសង្ឃកាតូលិក បឺណ័រ ទី១៦ បញ្ជុះនៅថ្ងៃទី៥មករា
អតីតសម្តេចសង្ឃកាតូលិក បឺណ័រ ទី១៦ សុគត នៅថ្ងៃសៅរ៍ ទី៣១ធ្នូ ក្នុងព្រះជន្មានុ ៩៥ឆ្នាំ នៅបុរីវ៉ាទីកង់។ សពរបស់ទ្រង់ នឹងត្រូវបញ្ចុះ នៅថ្ងៃទី ៥ ខែមករា ឆ្នាំ២០២៣។ មេដឹកនាំពិភពលោក ពួកបស្ចិមប្រទេស រួមទាំងប្រមុខរដ្ឋរុស្ស៊ី លោក ពូទីន បានចូលរួមផ្សាយសាររំលែកទុក្ខ និងចាត់ទុកថា សម្តេច បឺណ័រ ជាអ្នកការពារគុណតម្លៃនិងទ្រស្តីគ្រិស្តសាសនាដ៏ចម្បងមួយព្រះអង្គ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
អតីតសម្តេចសង្ឃកាតូលិក បឺណ័រ ទី១៦ មានព្រះនាមដើមថា Joseph Ratzinger។ តាមបញ្ជីសំបុត្រកំណើត ទ្រង់ប្រសូត្រនៅអាល្លឺម៉ង់ នៅឆ្នាំ១៩២៧។ ទ្រង់បានកាន់កិច្ចការបង្រៀនទ្រឹស្តីសាសនាគ្រិស្គ នៅក្រុងម៉ូនិច ចំនួន ២៥ ឆ្នាំ មុននឹងទៅធ្វើជាមន្ត្រី ជាន់ខ្ពស់ ខាងសាសនាគ្រិស្គ នៅក្រុងរ៉ូម ២៥ឆ្នាំទៀត រហូតជាប់ឆ្នោតក្លាយជាសម្តេចប៉ាប ជំនាន់ទី២៦៥ និងដែលបានកាន់តំណែងសម្តេចសង្ឈកាតូលិក ពីឆ្នាំ២០០៥ ដល់២០១៣។
ជាធម្មតា សម្តេចប៉ាបនីមួយៗកាន់អំណាច រហូតដល់សុគតតែម្តង។ ខុសប្លែកតែ សម្តេចប៉ាប បឺណ័រ។ ក្នុងប្រវត្តិសាស្ត្រ៦០០ឆ្នាំចុងក្រោយនេះ ទ្រង់ជាសម្តេចសង្ឃកាតូលិកទី១ ដែលបានប្រកាសដាក់រាជ្យ ឬលាចុះពីតំណែង នៅថ្ងៃទី១១ កុម្ភៈ ២០១៣។ បីឆ្នាំក្រោយមក ព្រះអង្គមានព្រះបន្ទូលនៅក្នុងសៀវភៅមួយ ផ្សាយឆ្នាំ២០១៦ ដោយបញ្ជាក់ថា ការលាឈប់នេះ ព្រោះតែកម្លាំងកាយចុះខ្សោយខ្លាំង និងពុំមែនព្រោះតែគេចព្រះភក្ត្រពីរឿងអាស្រូវឡើយ។
ក្នុងរជ្ជកាលរបស់ទ្រង់ គឺមានមន្ត្រីថ្នាក់ក្រោមចាត់ចែងហិរញ្ញវត្ថុមិនបានត្រឹមត្រូវ និងមានរឿងអាស្រូវផ្លូវភេទខ្លះផង។ សម្តេចសង្ឃកាតូលិកអង្គនេះ ក៏ត្រូវរងពាក្យទិតៀនរិះគន់ដែរថាធ្លាប់បានគាំទ្រអ៊ីត្លែរអាល្លឺម៉ង់ផ្តាច់ការ តែក្រោយមក ទំនងជាទ្រង់កែប្រែជំហរវិញ។
ស្តេចប៉ាបអង្គនេះបែរខ្នងដាក់ជនកាន់សាសនាអ៊ីស្លាម ដែលទ្រង់យល់ថាជាក្រុមមនុស្សហិង្សា។ រាជឱង្ការនិងស្តេចឈ្វេងយល់របស់ទ្រង់ គឺ ប្លែក ចម្លែក ពេលខ្លះ គួរឲ្យភ្ញាក់ផ្អើល។ ជាក់ស្តែង ទ្រង់យល់ថា ការរួមភេទដោយប្រើស្រោមអនាម័យទប់ទល់នឹងជំងឺអេសដ៍ គឺនាំឲ្យបង្កបញ្ហាធ្ងន់ធ្ងរទៅវិញ។ តាមពិតទៅ ការប្រើសោម គឺការពារមេរោគអេសដ៍មែន តែប្រឆាំងនឹងការផ្តល់កំណើត ដែលផ្ទុះពីច្បាប់សាសនា។
ក្នុងនាមប្រមុខសាសនាកាតូលិក និងជាអ្នកអភិរក្សនិយមដ៏តឹងតែង ទ្រង់ប្រកាន់ជំហរប្រឆាំងនឹងការរំលូតកូន ប្រឆាំងនឹងការស្រឡាញ់ភេទដូចគ្នា ហើយនិងមិនយល់ស្របចំពោះអត្តឃាត និងការជួយឲ្យស្លាប់។
បុរីវ៉ាទីកង់ ផ្សាយឲ្យដឹងថា ចាប់ពីដើមសប្តាហ៍ថ្ងៃច័ន្ទទៅ សាកសពរបស់អតីតសម្តេចប៉ាប នឹងត្រូវដាក់តម្កល់ឲ្យបរិស័ទគ្រិស្គសាសនាចូលថ្វាយបង្គំគោរព មុននឹងត្រូវបញ្ចុះនៅថ្ងៃព្រហស្បតិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ