នាយករដ្ឋមន្រ្តីស៊ុយអែតចង់បំពាក់ម៉ាស៊ីនប្រតិករបារាំងសម្រាប់វិស័យនុយក្លេអ៊ែរស៊ីវិល
នាយករដ្ឋមន្រ្តីស៊ុយអែតលោកអ៊ូហ្វ គ្រីស្ទ័រសុនបានបំពេញទស្សនកិច្ចក្នុងប្រទេសបារាំងនាថ្ងៃអង្គារ ទី៣ មករា។ នេះជាទស្សនកិច្ចលើកទី១ នៅក្នុងទឹកអឺរ៉ុបតាំងពីលោកគ្រីស្ទ័រសុនឡើងកាន់តំណែងប្រធានប្តូរវេនសហភាពអឺរ៉ុបក្នុងថ្ងៃទី១ មករា ឆ្នាំ ២០២៣ សម្រាប់រយៈពេល ៦ខែ។ លោកគ្រីស្ទ័រសុនបានទទួលជួបដោយប្រធានាធិបតីបារាំងលោកម៉ាក្រុងនៅក្នុវវិមានអេលីហ្សេ និងដែលនាឱកាសនោះ លោកគ្រីស្ទ័រសុន និងលោកម៉ាក្រុងបានជជែកគ្នាលើប្រធានបទជាច្រើន ក្នុងនោះក៏មានការពង្រឹងកិច្ចសហប្រតិបត្តិទ្វេភាគីបារាំង ស៊ុយអែតដែរ។
ចុះផ្សាយនៅថ្ងៃ៖
ស្តាប់ - ០១:៥៦
កិច្ចសហប្រតិបត្តិ និងភាពជាដៃគូជាមួយបារាំងដែលនាយករដ្ឋមន្រ្តីស៊ុយអែតលោកអ៊ូហ្វ គ្រីស្ទ័រសុនចង់បានខ្លាំងជាងគេ គឺវិស័យថាមនុយក្លេអ៊ែរស៊ីវិល។ នៅក្នុងន័យនេះ លោកគ្រីស្ទ័រសុនបានថ្លែងនៅក្នុងសន្និសីទកាសែតរួមជាមួយប្រធានាធិបតីបារាំងលោកម៉ាក្រុងថា រដ្ឋាភិបាលថ្មីស៊ុយអែតត្រូវការសាងសង់មជ្ឈមណ្ឌលនុយក្លេអ៊ែរថ្មីទៀតជាមួយនឹងការទិញបន្ថែមនូវម៉ាស៊ីនប្រតិករចំនួនពីរគ្រឿង ហើយស៊ុយអែតកំពុងចាប់អារម្មណ៍ខ្លាំងលើបច្ចេកវិទ្យានុយក្លេអ៊ែររបស់បារាំង។ គួរបញ្ជាក់ថាសព្វថ្ងៃនេះ ស៊ុយអែតមានម៉ាស៊ីនប្រតិករចំនួន ៦គ្រឿងកំពុងដំណើរការនៅក្នុងមជ្ឈមណ្ឌលនុយក្លេអ៊ែរចំនួន ៣កន្លែងខុសគ្នា។ ចំណែកម៉ាស៊ីនប្រតិករជាច្រើនផ្សេងទៀតត្រូវបានបញ្ឈប់តាំងពីឆ្នាំ ១៩៩៩ មកម្ល៉េះ។
ក្រៅពីវិស័យថាមពលនុយក្លេអ៊ែរ នាយករដ្ឋមន្ត្រីស៊ុយអែតក៏បានបង្ហាញឆន្ទៈចង់ពង្រឹងកិច្ចសហប្រតិបត្តិការជាមួយបារាំងនៅក្នុងវិស័យការពារ និងវិស័យអវកាស។ ទាក់ទងនឹងសង្រ្គាមរុស្ស៊ីឈ្លានពានអ៊ុយក្រែនដែលបានអូសបន្លាយជិត ១ឆ្នាំ លោកគ្រីស្ទ័រសុន និងលោកម៉ាក្រុងបានបញ្ជាក់ជាថ្មីពីការប្តេជ្ញាចិត្តរបស់សហភាពអឺរ៉ុបក្នុងការបន្តគាំទ្រអ៊ុយក្រែន។ សម្រាប់លោកម៉ាក្រុង ពលរដ្ឋអ៊ុយក្រែនត្រូវការការគាំទ្ររបស់សហភាពអឺរ៉ុបជាងពេលណាៗទាំងអស់ និងថា ជ័យជំនះរបស់អ៊ុយក្រែនជាអត្ថិភាពសម្រាប់អឺរ៉ុប និងពិភពលោកទាំងមូល។
ដោយឡែក ប្រធានាធិបតីបារាំងមិនភ្លេចនិយាយជាថ្មីពីឆន្ទៈរបស់លោកដែលចង់ឃើញប្រទេសស៊ុយអែត និងប្រទេសហ្វាំងឡង់ក្លាយជាសមាជិកពេញសិទ្ធិរបស់អង្គការអូតង់នាពេលឆាប់ៗដែលអាចធ្វើទៅបាន។ ត្រង់ចំណុចនេះ លោកម៉ាក្រុងបានប្រាប់លោកគ្រីស្ទ័រសុនពីសាមគ្គីភាព និងការគាំទ្ររបស់បារាំង។ គួរបញ្ជាក់ថា ការសុំចូលជាសមាជិកអូតង់របស់ស៊ុយអែត និងហ្វាំងឡង់កំពុងរារាំងដោយប្រទេសតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ