ពលរដ្ឋរុស្ស៊ីកាន់ទុក្ខ និងសម្តែងក្តីក្រេវក្រោធ ចំពោះការស្លាប់ទាហានរុស្ស៊ីរាប់សិបនាក់នៅអ៊ុយក្រែន
ថ្ងៃអង្គារ ទី៣មករា ប្រជាជនរុស្ស៊ីបានជួបជុំគ្នាដើម្បីដាក់ផ្ការំលឹកវិញ្ញាណក្ខន្ធ អមដោយសំនៀងបន់ស្រន់ ដើម្បីផ្តល់កិត្តិយសដល់យោធាខ្លួន ដែលបានស្លាប់នៅតំបន់ខាងកើតអ៊ុយក្រែន ក្រោមការវាយប្រហារនៃកងទ័ពអ៊ុយក្រែន។ ក្តីរន្ធត់នេះ បានបញ្ឆេះជា រលកទិតៀន ទល់នឹងកងទ័ពជាតិរុស្ស៊ីតែម្តង ថាមានការធ្វេសប្រហែស។ យោងតាមតួលេខចុងក្រោយ ទទួលស្គាល់ដោយក្រសួងការពារជាតិរុស្ស៊ី គឺមានទាហានរុស្ស៊ីថ្មីថ្មោងទើបតែត្រូវបានកេណ្ឌទៅ ចំនួនយ៉ាងហោច ៨៩នាក់ បានស្លាប់ដោយការបាញ់ប្លោងមីស៊ីលរបស់អ៊ុយក្រែន ចំពីលើបន្ទាយនៅជាយក្រុង Makiyivka។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
ហេតុការណ៍ខុសពីទម្លាប់នៅរុស្ស៊ី ព្រោះរដ្ឋអំណាចមិនសូវបញ្ចេញឲ្យដឹងទេ នូវចំនួនយោធាខ្លួន ស្លាប់បាត់បង់ជីវិត នៅអ៊ុយក្រែន។ ដោយមានសេចក្តីអនុញ្ញាតពីអាជ្ញាធរ អ្នកស្រុកប្រមាណ ២០០នាក់ បានជួបជុំគ្នា នៅក្រុង Samara ភាគកណ្តាលប្រទេស ដែលទាហានខ្លះស្លាប់ទៅនោះ មានដើមកំណើត ពីទីក្រុងនេះឯង ។
អ្នកស្រុកនាំគ្នាដាក់ផ្កា បាច់ផ្កា កម្រងផ្កា នៅពីមុខ បូជនីយដ្ឋានមានអគ្គីឆេះជាប់មិនចេះរលត់ទេ នៅលើទីលានមួយដ៏សំខាន់របស់ក្រុង មុននឹងឱនលំទោនកាយសំដែងការគោរព ឫខ្វែងលើដើមទ្រូង នូវសញ្ញាជាឈើឆ្កាង តាមគ្រិស្តសាសនាអ័រថូដុក្ស។ នេះបើតាមបទយកការណ៍ អ្នកឆ្លើយឆ្លង AFP។
បព្វជិតអ័រថូដុក្ស បានសូត្រធម៌ បន្ទាប់មកទាហានមួយក្រុម បានបាញ់គ្រាប់កាំភ្លើងទៅលើអាកាស សំដែងគារវកិច្ច។ តាមប្រព័ន្ធផ្សព្វផ្សាយនៅផ្ទាល់កន្លែង ការជួបជុំបែបនេះ ក៏បានប្រព្រឹត្តទៅ នៅតាមក្រុងឯទៀតនៃតំបន់ បែបយ៉ាង នៅក្រុង Toliatti និង Syzrian ។
កាលពីថ្ងៃចន្ទ ទី២មករា ក្រសួងការពារជាតិរុស្ស៊ី បានថ្លែងទទួលស្គាល់ដោយកម្រ ជាផ្លូវការថា ទាហានខ្លួនចំនួន៦៣នាក់ ត្រូវបានផ្ចាញ់ស្លាប់ទៅ ដោយការវាយប្រហារពីខាងកងទ័ពអ៊ុយក្រែន ក្នុងយប់ឆ្លងចូលឆ្នាំថ្មី។ ករណីនេះវាយប្រហារនេះ បានកើតឡើងទៅលើអគារបន្ទាយស្នាក់នៅ ក្នុងក្រុង Makiyivka ក្រុងដែលកាន់កាប់ដោយរុស្ស៊ី នៅតំបន់ Donetsk ភ្ជាប់យកទៅហើយដោយម៉ូស្គូ។ ចំណែក ក្រុងគៀវ អះអាងថា ចំនួនយោធារុស្ស៊ីស្លាប់នោះ គឺ ច្រើនជាងនេះឆ្ងាយ។
ការបាត់បង់នេះ ជាការបាត់បង់សែនធ្ងន់ រងទទួលដោយម៉ូស្គូ តែក្នុងមួយលើក គិតតាំងពីខែកុម្ភៈមក ពេលដែលរុស្ស៊បានចាប់ផ្តើម វាយលុកចូលអ៊ុយក្រែន ទាល់តែបង្កើតឡើងជាបរិយាកាសរន្ធត់ ម៉្លោះហើយបានជាពួកជាតិនិយមរុស្ស៊ី ទោះបីគាំទ្រដល់ប្រតិបត្តិការវាយលុកនោះក្តី ក៏នាំគ្នាជម្រុះ ការទិទៀនគ្មានប្រណី។
បរិយាកាសរំជួលចិត្ត បណ្តាលមកពីការបាត់បង់នេះ គឺជាព្រនង់ថ្មីសំពងលើវិមានក្រេមឡាំង ក្រោយពីមានការវាយបកវិញ ពីខាងកងទ័ពក្រុងគៀវ កាលពីខៃកញ្ញា។ ការទិទៀននេះ កាន់តែឡើងកំដៅទៅទៀត ក្រោយពីដឹងថា ពួកទាហានស្លាប់ទៅនោះ គឺជាទាហានថ្មីថ្មោង ទើបត្រូវបានកងទ័ពកេណ្ឌយកទៅ ប៉ុន្មានខែមុនសោះ។
ទោះបីកន្លងផុត ៣ថ្ងៃទៅហើយក្តី ក៏ប្រធានាធិបតីរុស្ស៊ី លោក វ៉្លាឌីមៀរ ពូទីន នៅតែមិនទាន់បញ្ចេញ ប្រតិកម្មអ្វីណា ចំពោះ ការវាយប្រហារពីខាងកងទ័ពក្រុងគៀវ លើក្រុង Makiivka ។ ដំណឹងស្តីពីការវាយប្រហារនេះ ត្រូវបានប្រកាសនៅចំសប្តាហ៍បុណ្យណូអ៊ែលអ័រថូដុក្ស ដែលតាមប្រពៃណី ជាបុណ្យរីករាយណាស់ សម្រាប់ពលរដ្ឋរុស្ស៊ី ដែលរមែងជួបជុំគ្នាក្នុងរង្វង់គ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ