ការសិក្សា៖ ផ្ទាំងទឹកកកពាក់កណ្តាលនៅក្នុងពិភពលោកនឹងរលាយអស់ នៅចុងសតវត្សរ៍
នៅរដូវត្រជាក់ សីតុណ្ហភាពកើនឡើងខុសប្រក្រតី ដល់២៥អង្សានៅតាមតំបន់ខ្លះរបស់ប្រទេសបារាំង។ ស្ថានីយ៍ជិះស្គីរាប់រយកន្លែងនៅទឹកដីអឺរ៉ុបត្រូវបិទទ្វារ ដោយសារតែគ្មានទឹកកក។ ទឡ្ហីករណ៍មួយទៀតនៃការប្រែប្រួលអាកាសធាតុ ត្រូវបានទស្សនាវដ្តី ដ៏ល្បីល្បាញ Scienceចុះផ្សាយកាលពីថ្ងៃព្រហស្បតិ៍ ដែលនៅក្នុងនោះ អ្នកវិទ្យាសាស្រ្តបានព្រមានថា ផ្ទាំងទឹកកកពាក់កណ្តាលនៅក្នុងពិភពលោកនឹងរលាយអស់គ្មានសល់ នៅចុងសតវត្សរ៍ ទី២១នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
ការសិក្សាថ្មីរបស់អ្នកវិទ្យាសាស្រ្តផ្តោតសំខាន់ទៅលើអនាគតផ្ទាំងទឹកកកជាង ២សែន (២១៥០០០) នៅក្នុងពិភពលោក ដែលត្រូវប្រឈមនឹងការរលាយបាត់មុខ ដោយសារការឡើងកំដៅផែនដី ការប្រែប្រួលអាកាសធាតុ។
លក្ខណៈពិសេសនៃការសិក្សាស្រាវជ្រាវខាងលើ គឺការលម្អិតពីផលប៉ះពាល់ក្នុងកម្រិតផ្សេងៗគ្នា អាស្រ័យទៅលើការឡើងកំដៅផែនដី។ ឧទាហរណ៍ ក្នុងករណីផែនដីឡើងកំដៅ១,៥អង្សា តាមការកំណត់ចែងនៅក្នុងកិច្ចព្រមព្រៀងប៉ារីសស្តីពីអាកាសធាតុឆ្នាំ ២០១៥ នោះ ពាក់កណ្តាលនៃផ្ទាំងទឹកកកក្នុងពិភពលោកនឹងត្រូវរលាយអស់ទាំងស្រុងគ្មានសល់ ពីពេលនេះ ដល់ចុងសតវត្សរ៍ (ឆ្នាំ ២១០០)។ តាមការសិក្សារបស់អ្នកវិទ្យាសាស្រ្ត ផែនដីឡើងកំដៅ១,៥អង្សា នឹងគំរាមកំហែងកូនភ្នំទឹកកកតូចៗមុនគេ។ ជាក់ស្តែង ភ្នំទឹកកកAlpes និងតំបន់ទឹកកក នៅអឺរ៉ុបកណ្តាល នៅភាគខាងលិចអាមេរិក នៅនូវែលសេឡង់ ជាដើមនឹងរលាយអស់ទាំងស្រុង គ្មានថ្ងៃវិលត្រលប់។
នៅក្នុងការសិក្សាចុះផ្សាយកាលពីថ្ងៃព្រហស្បតិ៍ អ្នកវិទ្យាសាស្រ្តបានព្យាករផងដែរពីសេណារីយ៉ូដ៏អាក្រក់នៅក្នុងករណីដែលផែនដីឡើងកំដៅ៤អង្សាបន្ថែមទៀត។ នៅពេលនោះតំបន់ទឹកកកក្រាស់ឃ្មឹកនៅប៉ូលខាងជើងដូចជា Alaska នឹងរលាយបាត់ទឹកកកអស់៨៣%។
ផែនដីឡើងកំដៅ ១,៥អង្សា ការរលាយភ្នំទឹកកកនឹងចូលរួមធ្វើឲ្យកំពស់ទឹកសមុទ្រកើនឡើង៩សង់ទីម៉ែត្រ។ ជាមួយការឡើងកំដៅ៤អង្សារ ផ្ទាំងទឹកកករលាយនឹងធ្វើឲ្យកំពស់ទឹកសមុទ្រកើនឡើង១៥សង់ទីម៉ែត្របន្ថែមទៀត។
សម្រាប់ Regine Hoke សាស្រ្តាចារ្យនៅសកលវិទ្យាល័យ អូស្លូ ប្រទេសស៊ុយអែត ដែលចូលរួមនិពន្ធនៅក្នុងការសិក្សាខាងលើ កំពស់ទឹកសមុទ្រកើនឡើងគឺជាក្តីបារម្ភខ្លាំង ព្រោះ វាអាចទៅបង្កជាគ្រោះទឹកជំនន់ បង្កការខូចខាតធ្ងន់ធ្ងរ នៅរាល់ពេលមានខ្យល់ព្យុះ។
ការរលាយភ្នំទឹកកកមិនត្រឹមបណ្តាលឲ្យកំពស់ទឹកសមុទ្រកើនឡើង ដែលអាចគំរាមកំហែងជីវិតមនុស្សនៅតាមទីក្រុងជាប់សមុទ្រ ប៉ុន្តែវាគំរាមកំហែងផងដែរប្រភពទឹកនៅក្នុងពិភពលោក។ គួរបញ្ជាក់ថា ផ្ទាំងទឹកកកដែលប្រឈមនឹងការលាយអស់នៅចុងសតវត្សរ៍ ជាអាងប្រភពទឹកប្រើប្រាស់របស់ប្រជាជនជាង២ពាន់លាននាក់ នៅរដូវក្តៅ។
ទោះប្រឈមនឹងការរលាយផ្ទាំងទឹកកក ប៉ុន្តែ អ្នកវិទ្យាសាស្រ្តមិនអស់សង្ឃឹម។ អ្នកនិពន្ធការស្រាវជ្រាវខាងលើនៅតែជឿជាក់ថា គេអាចស្រោចស្រង់ស្ថានការណ៍បានខ្លះ នៅពេលមនុស្សជាតិ ជាពិសេសអ្នកនយោបាយបង្កើនសកម្មភាពកាត់បន្ថយការបញ្ចេញឧស្ម័នផ្ទះកញ្ចក់ដែលជាប្រភពនៃការឡើងកំដៅផែនដី ដែលជាដើមហេតុនៃការរលាយផ្ទាំងទឹកកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ