ផ្អើលស្ថានីយ៍រថភ្លើងខាងជើងក្រុងបារីស ដោយជនដៃដល់ប្រើអាវុធមុតស្រួច ចាក់របួសមនុស្ស៦នាក់
នៅទីក្រុងប៉ារីស មានហេតុការណ៍ចាក់មនុស្សឲ្យរបួសមួយ បានកើតឡើង នៅព្រឹកថ្ងៃពុធនេះ នៅឯស្ថានីយ៍រថភ្លើងខាងជើង ដែលជាស្ថានីយ៍មានអ្នកដំណើរច្រើនជាងគេបង្អស់ទូទាំងអឺរ៉ុប។ យោងតាមសមត្ថកិច្ចបារាំង ជនដៃដល់បានប្រើអាវុធមុខស្រួច ចាក់អ្នកដំណើរឲ្យរបួសយ៉ាងហោច៦នាក់ មុននឹងត្រូវបាននរគបាលបង្ក្រាបចាប់ខ្លួនបាននៅនឹងកន្លែង។ គិតត្រឹមពេលនេះ គេមិនទាន់ដឹងអំពីមូលហេតុពិតប្រាកដ ដែលរុញច្រានជនដៃដល់ ឲ្យធ្វើអំពើនេះទេ។
ចុះផ្សាយនៅថ្ងៃ៖
ស្តាប់ - ០២:២៦
ហេតុការណ៍បានកើតឡើងនៅវេលាម៉ោង ប្រមាណ៦និង៤៥នាទី ព្រឹកថ្ងៃពុធ ទី១១មករា ជាពេលដែលអ្នកដំណើរចាប់ផ្តើមកកកុញ នៅស្ថានីយ៍រថភ្លើង Gare du Nord ខាងជើងក្រុងប៉ារីស។ យោងតាមប្រភពពីនគរបាលបារាំង ជនដៃដល់ ភេទប្រុស បានប្រើឧបករណ៍មុតស្រួច ចាក់មនុស្សឲ្យរបួស ចំនួនយ៉ាងហោច៦នាក់ ដែលក្នុងនោះមាន១នាក់ បានរងរបួសធ្ងន់ធ្ងរ។ គិតត្រឹមវេលាថ្ងៃត្រង់ សមត្ថកិច្ចបារាំងបានបើកការស៊ើបអង្កេតព្រហ្មទណ្ឌ ប៉ុនប៉ងមនុស្សឃាត ដោយសមត្ថកិច្ចអះអាងថា ពុំមានធាតុផ្សំបញ្ជាក់ថា ការវាយប្រហារនេះ មានលក្ខណៈជាអំពើភេរវកម្មទេ។
ម៉ោងប្រមាណ៩ព្រឹក លោក Gérald Darmanin រដ្ឋមន្ត្រីក្រសួងមហាផ្ទៃបារាំង បានទៅដល់កន្លែងកើតហេតុ។ យោងតាមលោករដ្ឋមន្ត្រី គឺជនដៃដល់ ត្រូវបានព័ទ្ធស្ទាក់ដោយកម្លាំងនគរបានព្រំដែន២នាក់ ដែលធ្វើការនៅមាត់ច្រកព្រំដែន រថភ្លើងEurostar ឆ្ពោះទៅកាន់ប្រទេសអង់គ្លេស។ សមត្ថកិច្ចម្នាក់បានរងរបួសដោយអាវុធរបស់ជនដៃដល់ មុននឹងសមត្ថកិច្ចម្នាក់ទៀត បានប្រើកាំភ្លើងបាញ់។ ក្រោយឮសំឡេងផ្ទុះគ្រាប់កាំភ្លើង និងមនុស្សផ្អើលឈូឆរ នរគបាលក្នុងឯកសណ្ឋានស៊ីវីលម្នាក់ទៀត ដែលនៅមិនឆ្ងាយពីនោះ បានរត់មកអន្តរាគមន៍ បាញ់ចំនួន២គ្រាប់ទៅលើជនដៃដល់។ បច្ចុប្បន្នជនដៃដល់ដែលរងរបួសធ្ងន់ ត្រូវបានគេបញ្ជូនយកទៅសង្គ្រោះនៅមន្ទីរពេទ្យ។
រដ្ឋមន្ត្រីមន្ត្រីមហាផ្ទៃបារាំង បញ្ជាក់ថា គេពុំទាន់ដឹងអត្តសញ្ញាណពិតប្រាកដរបស់ជនដៃដល់ទេ ដោយសារក្នុងពេលកើតហេតុ ជនដៃដល់មិនមានលិខិតស្នាមសំគាល់ខ្លួនឡើយ។ ហើយក្នុងពេលធ្វើសកម្មភាពវាយប្រហារ ជននេះ ក៏ពុំបានបន្លឺសំឡេងនិយាយអ្វីដែរ។
ក្រោយហេតុការណ៍នេះបានកើតឡើង សមត្ថកិច្ចបារាំង បានយកក្រណាត់ស ហ៊ុំព័ទ្ធកន្លែងកើតហេតុ កុំឲ្យមានមនុស្សចោមរោមមើល។ អ្នកនាំពាក្យក្រុមហ៊ុនរថភ្លើងបារាំង SNCF បញ្ជាក់ថា ដំណើរការចរាចរណ៍រថភ្លើង បានបន្តជាធម្មតា។ សូមបញ្ជាក់ថា ស្ថានីយ៍រថភ្លើង Gare du Nord នៅខាងជើងក្រុងប៉ារីស គឺជាស្ថានីយ៍រថភ្លើងធំជាងគេបង្អស់នៅអឺរ៉ុប ដែលមានអ្នកដំណើរឆ្លងកាត់ ប្រមាណ៧សែននាក់ក្នុងមួយថ្ងៃៗ ពោលគឺប្រមាណ ២២០លាននាក់ក្នុងមួយឆ្នាំ។ ក្រៅពីមានរថភ្លើងចេញដំណើរទៅទីក្រុងធំៗភាគខាងជើងបារាំង ស្ថានីយ៍នេះគឺជាទីចេញដំណើរនៃរថភ្លើង ឆ្ពោះទៅកាន់ប្រទេសអង់គ្លេស ប្រទេសប៊ែលហ្សិក និងហូឡង់ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ