អគ្គលេខាធិការអូតង់ ចង់បន្ថែមជំនួយគ្រឿងសព្វាវុធធុនធ្ងន់ឲ្យអ៊ុយក្រែន ដើម្បីយកឈ្នះឲ្យបានឆាប់
សង្គ្រាមនៅអ៊ុយក្រែន កំពុងតែឈានដល់ដំណាក់កាលមួយ ដែលកងទ័ពអ៊ុយក្រែន កំពុងមានប្រៀប ដោយសារតែជំនួយគ្រឿងសព្វាវុធមួយចំនួន ពីបណ្តាប្រទេសលោកខាងលិច។ ទន្ទឹមគ្នានេះ កាលពីថ្ងៃអាទិត្យម្សិលមិញ លោកអគ្គលេខាធិការអង្គការអូតង់ បានអះអាងប្រាប់អ្នកកាសែតថា លោករំពឹងថាក្រុមប្រទេសសម្ព័ន្ធមិត្ត នឹងសម្រេចបញ្ជូនគ្រឿងសព្វាវុធធុនធ្ងន់ បន្ថែមទៀត ឲ្យអ៊ុយក្រែន ដើម្បីជួយអ៊ុយក្រែនបានជ័យជំនះឲ្យបានឆាប់។
ចុះផ្សាយនៅថ្ងៃ៖
ស្តាប់ - ០២:៣៤
លោក Jen Stoltenberg អគ្គលេខាធិការអូតង់ បានបញ្ជាក់ថាលោករំពឹងថា នៅក្នុងឱកាសប្រជុំក្រុមប្រទេសសម្ព័ន្ធមិត្តដើម្បីជួយអ៊ុយក្រែន នៅថ្ងៃទី២០មករាខាងមុខនេះ គឺគេនឹងសម្រេចបញ្ជូនគ្រឿងសព្វាវុធធុនធ្ងន់បន្ថែមទៀត ទៅឲ្យអ៊ុយក្រែន។ ជាជំនួយដ៏ចាំបាច់បំផុត ដើម្បីឲ្យអ៊ុយក្រែនយកឈ្នះលើរុស្ស៊ី ឲ្យបានឆាប់។ នេះគឺជាសំដីឆ្លើយទៅកាន់អ្នកសារព័ត៌មាន របស់កាសែតអាល្លឺម៉ង់ Handelsblatt នៅឯមូលដ្ឋានទ័ពទ័ពអាមេរិក Ramstein ក្នុងទឹកដីអាល្លឺម៉ង់ កាលពីរសៀលថ្ងៃអាទិត្យទី១៥មករា។
លោក អគ្គលេខាធិការអូតង់ គូសបញ្ជាក់ថា កាលៈទេសៈពេលជាពេលដ៏សំខាន់ បំផុតនៃសង្គ្រាមហើយដែលសម្ព័ន្ធមិត្តត្រូវតែប្រគល់អាវុធធន់ធ្ងន់ ដែលអ៊ុយក្រែនបានស្នើសុំ។ លោកបានរំលឹកថា ពីមុនមក ក្រុមប្រទេសលោកខាងលិច បានស្ទាក់ស្ទើរខ្លាំងណាស់ មិនចង់ប្រគល់ឲ្យអ៊ុយក្រែន នូវគ្រឿងសព្វាវុធធុនធ្ងន់នោះទេ ព្រោះមិនចង់លូកដៃចូលជ្រៅក្នុងសង្គ្រាម ឬក៏មិនចង់ឲ្យរុស្ស៊ីរករឿងខឹងសម្បារខ្លាំង។
គួរកត់សំគាល់ថា ជិតមួយឆ្នាំនៃសង្គ្រាមមកនេះ កងទ័ពអ៊ុយក្រែនបានបង្ហាញនូវកម្លាំងប្រយុទ្ធដ៏ស្វាហាប់ និងបានទប់ជាប់ ឬរុញកងទ័ពរុស្ស៊ីឲ្យដកថយនៅច្រើនសមរភូមិណាស់។ ដោយសង្កេតឃើញជោគជ័យនេះ ក្រុមប្រទេសសម្ព័ន្ធមិត្ត បានសម្រេចបន្ថែមជំនួយគ្រឿងសព្វាវុធ ដែលកាន់តែមានកម្លាំងខ្លាំងក្លាឡើង។ កាលពីដើមខែមករានេះ បារាំង អាល្លឺមម៉ង់ និងអាមេរិក បានសន្យាផ្តល់រថពាសដែកដឹកកម្លាំងទ័ព និងដែលមានបំពាក់កាណុងប្រយុទ្ធផងដែរ។ ចំណែកប៉ូឡូញវិញ បានអះអាងថាខ្លួននឹងប្រគល់ឲ្យអ៊ុយក្រែន ក្នុងរវាងប៉ុន្មានសប្តាហ៍ខាងមុខនេះ នូវរថក្រោះធន់ធ្ងន់ Leopard 2 ដែលផលិតនៅអាល្លឺម៉ង់ ចំនួន១៤គ្រឿង ហើយដែលកងទ័ពអ៊ុយក្រែន បានទទូចសុំជាយូរមកហើយ។
លោកអគ្គលេខាធិការអូតង់ បានលើកឡើងថា លោកពូទីន បានប៉ាន់ប្រមាណកម្លាំងរបស់កងទ័ពខ្លួន ខ្លាំងហួសជ្រុល ហើយបានគិតខុសធ្ងន់ណាស់ ដែលសម្រចចិត្តឈ្លានពានអ៊ុយក្រែន។ លោកបន្ថែមថា ប្រមាណជិតមួយឆ្នាំមកនេះ កងទ័ពរុស្ស៊ីបានបង្ហាញឲ្យពិភពលោកឃើញ នូវកំសោយសមត្ថភាពបច្ចេកទេស និងសព្វាវុធ គ្មានវិន័យ គ្មានមនសិកា គ្មានការគ្រប់គ្រងបញ្ជាត្រឹមត្រូវ ហើយដែលបានធ្វើឲ្យកងទ័ពនេះ បានបរាជ័យគ្រប់សមរភូមិនៅអ៊ុយក្រែន។
ដោយឡែក នៅក្នុងសុន្ទរកថាមួយផ្សាយតាមទូរទស្សន៍រុស្ស៊ី កាលពីថ្ងៃអាទិត្យ លោកពូទីន បានថ្លែងថា កងទ័ពរុស្ស៊ីកំពុងតែមានសន្ទុះយ៉ាងស្វាហាប់ ដោយអនុឡោមទៅតាមផែនការកំណត់។ លោកពូទីនបន្ថែមថា លោកសង្ឃឹមថាកងទ័ពរុស្ស៊ី នឹងធ្វើឲ្យរុស្ស៊ីសប្បាយចិត្តច្រើនដងបន្ថែមទៀត តាមរយៈជោគជ័យនៅសមរភូមិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ