អ៊ុយក្រែន៖ ស្លាប់យ៉ាងហោច១៨នាក់ ក្នុងនោះមានរដ្ឋមន្ត្រីក្រសួងមហាផ្ទៃ ក្នុងគ្រោះថ្នាក់ធ្លាក់ឧត្ថម្ភាគចក្រ
នៅមិនឆ្ងាយប៉ុន្មានពីរដ្ឋធានីកៀវ នៅព្រឹកថ្ងៃពុធទី១៨មករា មានករណីធ្លាក់ឧត្ថម្ភាគចក្រមួយគ្រឿង របស់ក្រសួងមហាផ្ទៃអ៊ុយក្រែន បណ្តាលឲ្យស្លាប់មនុស្ស ចំនួនយ៉ាងហោច១៨នាក់ និងរបួសច្រើននាក់ផ្សេងទៀត។ លោករដ្ឋមន្ត្រីក្រសួងមហាផ្ទៃអ៊ុយក្រែន ព្រមទាំងមន្ត្រីអ៊ុយក្រែន៨នាក់ផ្សេងទៀត បានស្លាប់នៅក្នុងហេតុការណ៍ដ៍អកុសលនេះ។
ចុះផ្សាយនៅថ្ងៃ៖
ស្តាប់ - ០២:០៨
គ្រោះថ្នាក់ធ្លាក់ឧត្ថម្ភាគចក្រមួយគ្រឿង បានកើតឡើងនៅក្រុង Brovary ដែលស្ថិតនៅជាប់ជាយទីក្រុងកៀវ។ យោងតាមលោក Oleksïi Kouleba អភិបាលតំបន់កៀវ គិតត្រឹមម៉ោង ១០និង៣០នាទីព្រឹកថ្ងៃពុធ គឺមានមនុស្សស្លាប់យ៉ាងហោច ១៨នាក់ ក្នុងនោះមានកុមារ៣នាក់។ លោកបានបង្ហាញការបារម្ភ ថាចំនួនអ្នកស្លាប់ អាចកើនលើសនេះ ព្រោះថាមានមនុស្សរបួសចំនួន២៩នាក់ ដោយរាប់ទាំងកុមារ១៥នាក់ផ្សេងទៀត។
សូមបញ្ជាក់ថា ឧត្ថម្ភាគចក្រនេះ ជារបស់ក្រសួងមហាផ្ទៃអ៊ុយក្រែន ដែលក្នុងពេលកើតហេតុ បានដឹកលោក Denys Monastyrsky រដ្ឋមន្ត្រីក្រសួងមហាផ្ទៃ អមដំណើរដោយអនុរដ្ឋមន្ត្រីម្នាក់ រដ្ឋលេខាធិការម្នាក់ ព្រមទាំងមនុស្ស៦នាក់ផ្សេងទៀត។ អ្នកដំណើរទាំង៩នាក់ នៅលើឧត្ថម្ភាគចក្រ ស្លាប់ទាំងអស់។ លោកប្រធានាធិបតីហ្សេឡេនស្គី បានថ្លែងសារ សោកស្តាយ និងតក់ស្លុតរន្ធត់ចិត្តជាពន់ពេក ក្រោយបានទទួលដំណឹងនៃការស្លាប់របស់លោករដ្ឋមន្ត្រីក្រសួងមហាផ្ទៃ ព្រមទាំងមន្ត្រីសំខាន់ផ្សេងទៀត នៅក្នុងហេតុការណ៍ដ៏អកុសលនេះ។
យោងតាមរូបភាពចែកចាយតាមបណ្តាញសង្គម គេឃើញបំណែកឧត្ថម្ភាចក្រ បានធ្លាក់រាយប៉ាយ នៅក្បែរទីតាំងសាលាមតេយ្យមួយកន្លែង ខណៈបំណែកផ្ទុះ បានឆាបឆេះបង្កឲ្យមានអគ្គិភ័យលើអគារសាលាមតេយ្យ។ បុគ្គលិកសាលាមតេយ្យ និងកុមារជាច្រើននាក់ កំពុងស្ថិតនៅទីនោះ ក្នុងពេលដែលឧត្ថម្ភាគចក្របានផ្ទុះធ្លាក់មក។ លោកអភិបាលតំបន់កៀវ បានអះអាងថា សមត្ថកិច្ចរួមជាមួយចៅក្រម បានចាប់ផ្តើមបើកការស៊ើបអង្កេត ដើម្បីស្វែងរកមូលហេតុដែលបណ្តាលឲ្យឧត្ថម្ភាគចក្រនេះធ្លាក់។
លោក Youry Ihnat អ្នកនាំពាក្យកងទ័ពអាកាសអ៊ុយក្រែន បានលើកឡើងថា ឧត្ថម្ភាគចក្រនេះ ជាប្រភេទ Super Puma ផលិតនៅបារាំង ហើយដែលកងសមត្ថកិច្ចអ៊ុយក្រែនប្រើប្រាស់ជាទូទៅ។ ការស៊ើបអង្កេតអាចចំណាយពេលច្រើនសប្តាហ៍ ដើម្បីអាចដឹងថាវាមានបញ្ហាបច្ចេកទេស ឬក៏ដោយសារមូលហេតុអ្វីផ្សេង ដែលអាចជាគ្រាប់មីស៊ីលរបស់រុស្ស៊ី ក៏ថាបាន។ តែយ៉ាងណា គិតត្រឹមពេលនេះ គេមិនទាន់អាចសន្និដ្ឋានដោយតក់ក្រហល់បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ