ការសិក្សាវិទ្យាសាស្ត្រ បង្ហាញពីរបត់វិជ្ជមាននៃការប្រយុទ្ធប្រឆាំងនឹងមហន្តរាយអាកាសធាតុ
នៅក្នុងរបាយការណ៍ចេញផ្សាយនៅថ្ងៃសុក្រទី ២០ មករា ២០២៣នេះ អ្នកវិទ្យាសាស្ត្របានបង្ហាញនូវឧទាហរណ៍បី ដែលអាចជារបត់វិជ្ជមាននៃដំណោះស្រាយប្រយុទ្ធប្រឆាំងនឹងគ្រោះមហន្តរាយបង្កឡើងដោយការប្រែប្រួលអាកាសធាតុ។ ដំណោះស្រាយទាំងបីនោះ គឺ ការលើកទឹកចិត្តឱ្យប្រើប្រាស់យានយន្តអគ្គីសនី (អាគុយ) ប្រើគ្រឿងចំហេះអាម៉ូញ៉ាក់ និងឱ្យទទួលទានជាតិប្រូតេអ៊ីនបានមកពីរុក្ខជាតិ។
ចុះផ្សាយនៅថ្ងៃ៖
ស្តាប់ - ០២:០៧
អ្នកវិទ្យាសាស្ត្រតែងស្រែកអាសន្នជាញឹកញយអំពីគ្រោះមហន្តរាយនៃការប្រែប្រួលអាកាសធាតុ ដែលអាចនឹងធ្វើឱ្យមានការរលត់ផុតពូជទ្រង់ទ្រាយធំ ដូចជាការផុតរលត់ជីវិតរុក្ខជាតិផ្កាថ្មក្រោមទឹក ឬការរលាយបាត់តំបន់ដីទឹកកក ជាដើម...
ប៉ុន្តែនៅថ្ងៃនេះ នៅវេទិកាសេដ្ឋកិច្ចអន្តរជាតិក្រុងដាវូស ក្រុមអ្នកវិទ្យាសាស្ត្រអង់គ្លេសបានបង្ហាញរបាយការណ៍ថ្មីមួយ ស្តីអំពីដំណោះស្រាយបីចំណុចដែលអាចជារបត់ដ៏វិជ្ជមានជានិរន្តន៍នៃការប្រយុទ្ធប្រឆាំងនឹងការប្រែប្រួលអាកាសធាតុ។ ដំណោះស្រាយនីមួយៗ ជាគន្លឹះបង្កើនលទ្ធភាពវិជ្ជមានបន្តបន្ទាប់គ្នាក្នុងបណ្តេញគ្រោះមហន្តរាយអាកាសធាតុ។ នេះបើតាមការគូសបញ្ជាក់របស់ម្ចាស់របាយការណ៍ លោក Mark Meldrum។
ដំណោះស្រាយទីមួយ គឺការប្រើយានយន្តអគ្គីសនី(អាគុយ) ដែលកំពុងចាប់វិវឌ្ឍយ៉ាងគួរឱ្យកត់សម្គាល់។ សម្រាប់អ្នកនិពន្ធ ការពន្លឿន និងជំរុញ ឱ្យទិញរថយន្តគ្មានបញ្ចេញផ្សែងពុល និងការសាងសង់បណ្តាញសាកអាគុយឡាន នឹងធ្វើឱ្យវិស័យផលិតអគ្គីសនីកើតឡើងវិញលូតលាស់ខ្លាំងទន្ទឹមនឹងការផលិតអាគុយ ហើយបើផលិតច្រើន ការប្រកួតប្រជែងមានខ្លាំង តម្លៃក៏នឹងចុះថោកទៅតាមនោះដែរ។
ការបញ្ចូលកាតព្វកិច្ចឱ្យប្រើថាមពល បានមកពីចំហេះបៃតងអាម៉ូញ៉ាក់ ឬ អ៊ីដ្រូហ្សែន ក្នុងកំរិត២៥% ក្នុងផលិតកម្មជីរ ជាឧទាហរណ៍ទីពីរ។ ថាមពលបៃតងអាម៉ូញ៉ាក់ឬអ៊ីដ្រូហ្សែន ក៏អាចប្រើបានយ៉ាងទូលំទូលាយសម្រាប់ការដឹកជញ្ជូនតាមផ្លូវទឹក ឬផលិតដែកថែប ជំនួសថាមពលហ្កាស។
ជាចុងក្រោយ អ្នកវិទ្យាសាស្ត្របានផ្តល់មធ្យោបាយទីបី ដោយលើកទឹកចិត្តឱ្យមានការបញ្ជាទិញជាសាធារណៈ សម្រាប់អាហារដ្ឋាននៅសាលារៀន មន្ទីរពេទ្យ និងរដ្ឋបាល ជ្រើសរើសទទួលទានប្រូតេអ៊ីនបានមកពីរុក្ខជាតិ។ ជម្រើសបែបនេះ នឹងអាចកាត់បន្ថយការបញ្ចេញឧស្ម័នផ្ទះកញ្ចក់ទាក់ទងនឹងការចិញ្ចឹមសត្វ ហើយសល់ដីសម្រាប់ដាំដុះកសិកម្មបានពី៧ទៅ១៥% និងអាចទប់ការកាប់ព្រៃឈើដែលជាអណ្តូងធម្មជាតិស្រូបជាតិកាបោន។
បើតាមការសិក្សា ឧទាហរណ៍បីចំណុចនេះ មិនមែនជាដំណោះស្រាយពេញលេញទេ ប៉ុន្តែជាក្តីសង្ឃឹមដ៏ធំធេងមួយដែលគេអាចជឿជាក់បានថាបើគេកាន់តែហ៊ានធ្វើវិនិយោគសង្គមនិងសេដ្ឋកិច្ចពិភពលោកអាចឈានឆ្ពោះទៅសម្រេចកម្មវត្ថុអព្យាក្រិត្យកាបោនកាន់តែលឿនរហ័ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ