រុស្ស៊ីដាក់បញ្ឈរប្រព័ន្ធបាញ់មីស៊ីលក្នុងក្រុងម៉ូស្គូ និងបើកការហាត់សមការពារផ្លូវអាកាស
យោងតាមប្រភពរូបថត នៅតាមបណ្តាញសង្គមរុស្ស៊ី បានបង្ហាញឲ្យឃើញថា កាលពីថ្ងៃសុក្រទី២០មករា អាជ្ញាធររុស្ស៊ី បានដាក់បញ្ឈរប្រព័ន្ធបាញ់មីស៊ីលជាច្រើនគ្រឿង នៅតាមទីតាំងសំខាន់ៗមួយចំនួន ក្នុងក្រុងមូស្គូ។ មិនមានការបញ្ជាក់ហេតុផលជាផ្លូវការណាមួយ ពីការដាក់ពង្រាយប្រព័ន្ធបាញ់មីស៊ីលនេះទេ។ តែយ៉ាងណា កាលពីថ្ងៃសៅរ៍ ម្សិលមិញ ក្រសួងការពារជាតិរុស្ស៊ីបានបញ្ជាក់ថា គេបានបើកការធ្វើសមយុទ្ធយោធា ការពារប្រព័ន្ធផ្លូវអាកាស នៅតំបន់ជុំវិញក្រុងម៉ូស្គូ។
ចុះផ្សាយនៅថ្ងៃ៖
ស្តាប់ - ០២:៥២
យោងតាមសាក្សីពីក្រុងម៉ូស្គូ យ៉ាងហោចណាស់មានប្រព័ន្ធបាញ់មីស៊ីលរុស្ស៊ី ប្រភេទ Pantsir បាញ់ពីដីទៅអាកាស ចំនួនជាង១០គ្រឿង ត្រូវបានគេដាក់ពង្រាយតាមទីតាំងមួយចំនួន ក្នុងក្រុងម៉ូស្គូ ដូចជានៅលើដំបូលក្រសួងការពារជាតិរុស្ស៊ី និងនៅចំងាយជាង១០គីឡូម៉ែត្រ ពីផ្ទះរបស់លោកពូទីន ក្នុងសង្កាត់ Novo-Ogariovo ខាងលិចក្រុងម៉ូស្គូ។
ជាមួយនឹងរូបថត ជាច្រើនសន្លឹកចែកចាយតាមបណ្តាញសង្គម បានបង្កឲ្យមានការភ្ញាក់ផ្អើល ចោទជាសំណួរថាមានហេតុផលអ្វី នៅពីក្រោយការដាក់ពង្រាយប្រព័ន្ធបាញ់មីស៊ីលទាំងនេះ ខណៈដែលក្រុងម៉ូស្គូ ស្ថិតនៅឆ្ងាយណាស់ពីសមរភូមិសង្គ្រាមអ៊ុយក្រែន។ មិនមានការបញ្ជាក់ហេតុផលណាមួយ ពីសំណាក់វិមានក្រឹមឡាំងទេ។ សមាជិកសភារុស្ស៊ីម្នាក់ ថែមទាំងបានប្រកែកទៀតផង ថារូបភាពកាត់ត។
សូមបញ្ជាក់ថា កាលពីថ្ងៃសុក្រ ទី២០មករា អ្នកកាសែតបានសួរសំណួរទៅលោក Dmitri Peskov អ្នកនាំពាក្យវិមានក្រឹមឡាំង ថាតើរដ្ឋាភិបាលខ្លាចក្រែងមានការវាយប្រហារ មកលើរដ្ឋធានីម៉ូស្គូដែរឬទេ តែលោកម្នាក់នេះ បានបដិសេធមិនឆ្លើយ ហើយបានប្រាប់អ្នកសែត ឲ្យទៅសួរក្រសួងការពារទៅ។ ស្រាប់តែនៅថ្ងៃសៅរ៍ទី២១មករា ក្រសួងការពារជាតិរុស្ស៊ី បានចេញលិខិតប្រកាសថា ខ្លួនបានបើកការធ្វើសមយុទ្ធហាត់សម ទប់ទល់ចំពោះការវាយប្រហារពីលើអាកាស ដើម្បីការពារទីតាំងយុទ្ធសាស្ត្រសំខាន់ៗមួយចំនួន នៅតំបន់ក្នុងនិងជុំវិញក្រុងម៉ូស្គូ។ ទីតាំងយុទ្ធសាស្រ្តដែលត្រូវការពារទាំងនោះ មានទាំងហេដ្ឋារចនាសម្ព័ន្ធកងទ័ព ឧស្សាហកម្ម និងរដ្ឋបាលនយោបាយ។ ដោយមិនបញ្ជាក់ថា ការហាត់សមនេះ បានធ្វើឡើងនៅពេលណា ក្រសួងការពារជាតិរុស្ស៊ី បានត្រឹមបញ្ជាក់ថា ក្នុងការហាត់សមនេះ មានទាហានរុស្ស៊ីប្រមាណ១៥០នាក់ចូលរួម និងបានហាត់ប្រើប្រព័ន្ធខែលមីស៊ីល S-300 ថែមទៀត។
យោងតាមអ្នកជំនាញ ការដាក់ពង្រាយប្រព័ន្ធបាញ់មីស៊ីលកណ្តាលក្រុងម៉ូស្គូបែបនេះ គឺជាយុទ្ធសាស្ត្រ ដាក់សំពាធផ្នែកចិត្តសាស្ត្រទៅលើប្រជាពលរដ្ឋរុស្ស៊ី ឲ្យដឹងថាស្ថានការណ៍ពេលនេះជាពេលសង្គ្រាម ដែលរុស្ស៊ីកំពុងត្រូវគេគំរាមកំហែង ដូចកាលពីជំនាន់សង្គ្រាមលោកលើកទី២។
ទន្ទឹមគ្នានេះ អ្នកវិភាគខ្លះទៀត លើកឡើងថា ការដែលរុស្ស៊ី ដាក់បញ្ឈរប្រព័ន្ធបាញ់មីស៊ីល នៅកណ្តាលក្រុងម៉ូស្គូបែបនេះ គឺប្រហែលជារុស្ស៊ីចាប់ផ្តើមគិតបារម្ភពិតមែន ថាទីតាំងសំខាន់ៗមួយចំនួន នៃអំណាចនយោបាយ និងកងទ័ពរុស្ស៊ី អាចប្រឈមនឹងការវាយប្រហារ។ ជារការកត់សំគាល់ ប៉ុន្មានខែចុងក្រោយនេះ មានទីតាំងមួយចំនួន នៅឆ្ងាយៗក្នុងទឹកដីរុស្ស៊ី ដែលត្រូវបានវាយប្រហារដោយយានដ្រូនរបស់អ៊ុយក្រែន។ មានដំណឹងតិចតួចបំផុតស្តីពីយានដ្រូនអ៊ុយក្រែនទាំងនេះ តែយ៉ាងណាភាគីរុស្ស៊ីទំនងជាមិនលេងសើចទេ។ ប្រភពជាច្រើនបានអះអាងផងដែរ អំពីករណីអគ្គិភ័យឆេះស្ថានីយ៍ប្រេងឥន្ធនៈ ឆេះផ្សារទំនើបជាច្រើនទីតាំងនៅរុស្ស៊ី ដែលទំនងអាចជាស្នាដៃ របស់ក្រុមចារកិច្ចអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ