អ៊ុយក្រែន៖ មន្ត្រីធំៗច្រើននាក់ លាឈប់ឬត្រូវបណ្តេញចេញពីតំណែង ក្រោយផ្ទុះរឿងអាស្រូវពុករលួយ
នៅអ៊ុយក្រែន រឿងអាស្រូវពុករលួយកំពុងតែបោកអន្រួនរដ្ឋាភិបាលលោកហ្សេឡេនស្គី ខណៈដែលប្រទេសនេះ កំពុងតែឆ្លងកាត់សង្គ្រាមដ៏ជូរចត់។ យ៉ាងហោចណាស់ មានអភិបាលតំបន់ចំនួន៤ អនុរដ្ឋមន្ត្រីចំនួន៤នាក់ និងប្រធានការិយាល័យជំនាញ២នាក់ ត្រូវបានបណ្តេញចេញពីតំណែង បន្ទាប់ពីបណ្តាញព័ត៌មានអ៊ុយក្រែន បានចុះផ្សាយថាមន្ត្រីធំៗទាំងនេះ មានពាក់ព័ន្ធនឹងអំពើ ពុករលួយ បក្សពួកនិយម ទទួលប្រាក់សំណូក និងកឹបកេងចំណេញលើថវិកាចំណាយរបស់កងទ័ពអ៊ុយក្រែនជាដើម។
ចុះផ្សាយនៅថ្ងៃ៖
ស្តាប់ - ០២:៥៨
យប់ថ្ងៃចន្ទទី២៣មករា លោកប្រធានាធិបតីហ្សេឡេនស្គី បានប្រកាសអំពីការជំរុះមន្ត្រីមួយចំនួន ចេញពីរដ្ឋាភិបាល បន្ទាប់ពីផ្ទុះរឿងអាស្រូវពុករលួយជាច្រើនករណី ចុះផ្សាយដោយបណ្តាញព័ត៌មានអ៊ុយក្រែន។ អភិបាលតំបន់ចំនួន៥ នឹងត្រូវបញ្ឈប់ពីមុខងារ ក្នុងនោះគឺមានអភិបាលតំបន់ Dnipropetrovsk តំបន់ Zaporijjia តំបន់ Soumy តំបន់ Kherson និងអភិបាលតំបន់ទីក្រុងកៀវ។
យោងតាមបណ្តាញព័ត៌មានអ៊ុយក្រែន លើកលែងតែលោក Oleksiï Kouleba អភិបាលតំបន់កៀវ ដែលត្រូវបញ្ឈប់ពីមុខងារ ដើម្បីតែងតាំងនៅមុខតំណែងថ្មីក្នុងរដ្ឋបាលប្រធានាធិបតី។ ចំណែក អភិបាលតំបន់ទាំង៤ទៀត ត្រូវបញ្ឈប់ពីមុខងារ បន្ទាប់ពីតុលាការបានបើកការស៊ើបអង្កេត ស្តីពីករណីប្រព្រឹត្តិអំពើពុករលួយ។ កាលពីខែវិច្ឆិកា បណ្តាញព័ត៌មានអ៊ុយក្រែន បានចុះផ្សាយអំពីអំពើពុករលួយ បង្កឡើងដោយលោកអភិបាលតំបន់ Dnipropetrovsk ឃុបឃិតប្រគល់កិច្ចសន្យាជួសជុលផ្លូវ តម្លៃជាច្រើនលានអឺរ៉ូ ទៅឲ្យក្រុមហ៊ុនដែលមានចំណែកភាគហ៊ុន របស់ស្រីកំណាន់ខ្លួន។
ក្រៅពីអភិបាលរដ្ឋទាំង៤នេះ យ៉ាងហោចណាស់មានអនុរដ្ឋមន្រ្តីចំនួន៤នាក់ ក៏ត្រូវដកចេញពីមុខងារដែរ ក្នុងនោះមានអនុរដ្ឋមន្ត្រីក្រសួងការពារជាតិ។ យោងតាមគេហទំព័រព័ត៌មាន ZN.UA ក្រសួងការពារជាតិអ៊ុយក្រែន បានចុះកិច្ចសន្យាតម្លៃ៣២៤លានអឺរ៉ូ ជាមួយក្រុមហ៊ុនឯកជន ដើម្បីផ្គត់ផ្គង់ចំណីអាហារឲ្យកងទ័ពអ៊ុយក្រែន។ ជាតម្លៃដែលថ្លៃខ្លាំង លើសតម្លៃចំណីអាហារជាក់ស្តែងនៅលើទីផ្សារដល់ទៅ ២ឬ៣ដង។
ដោយឡែក អនុប្រធានការិយាល័យដឹកជញ្ជូនផ្លូវទឹក ចំនួន២នាក់ ក៏ត្រូវបានដកហូតពីមុខងារដែរ។ ការដកហូតតំណែងបន្តបន្ទាប់ផ្ទួនៗគ្នា ក្រោយការផ្ទុះរឿងអាស្រូវ ពុករលួយ បំប៉ោងតម្លៃ បក្សពួកនិយម ឬទទួលប្រាក់សំណូក ជាដើម។ល។ បន្ថែមពីនេះ លោក Oleksiï Simonenko រដ្ឋអាជ្ញារងអ៊ុយក្រែន បានលាឈប់ពីមុខងារ បន្ទាប់ពីបណ្តាញព័ត៌មានផ្សាយថា លោកបានលបលួចទៅលំហែរកាយនៅអេស្ប៉ាញ ខណៈដែលសង្គ្រាមកំពុងឆាបឆេះនៅក្នុងប្រទេស ហើយដែលច្បាប់ហាមឃាត់មិនឲ្យមនុស្សប្រុសពេញកម្លាំងប្រយុទ្ធ ចាកចេញពីប្រទេស។
កាលពីថ្ងៃអាទិត្យ លោក Vassyl Lozinsky អនុរដ្ឋមន្ត្រីក្រសួងហេដ្ឋារចនាសម្ព័ន្ធអ៊ុយក្រែន ត្រូវបានចាប់ខ្លួន បន្ទាប់ពីមានការចោទប្រកាន់ថាលោកម្នាក់នេះ បានទទួលប្រាក់សំណូកចំនួន៤សែនដុល្លារ ទិញម៉ាស៊ីនភ្លើងក្នុងតម្លៃខ្ពស់ហួសពីតម្លៃទីផ្សារ។ លោក Pavlo Galimon អនុប្រធានគណបក្ស "អ្នកបម្រើជាតិ" របស់លោកប្រធានាធិបតីហ្សេឡេនស្គី ក៏ត្រូវបានដកចេញពីតំណែងដែរនៅថ្ងៃចន្ទ ក្រោយផ្ទុះរឿងអាស្រូវបន្លំគេចពន្ធ។
សូមបញ្ជាក់ថា នេះគឺជារឿងអាស្រូវពុករលួយដ៏ធំ ខណៈដែលអ៊ុយក្រែន កំពុងតែឆ្លងកាត់សង្គ្រាម ហើយទទូចសុំជំនួយយោធា និងថវិកាពីបណ្តាប្រទេសសម្ព័ន្ធមិត្តលោកខាងលិច។ តាំងតែពីមុនមានសង្គ្រាម អ៊ុយក្រែនត្រូវគេដឹងថាមានបញ្ហាពុករលួយធ្ងន់ធ្ងរណាស់ ជាប់ចំណាត់ថ្នាក់លេខ១២២ ក្នុងចំណោម១៨០ប្រទេស។ យ៉ាងណាមិញ សហភាពអឺរ៉ុបបានដាក់កំហិតថា អ៊ុយក្រែនត្រូវតែដោះស្រាយបញ្ហាពុករលួយឲ្យបានស្អាតស្អំ ទើបអាចចូលជាសមាជិកអឺរ៉ុប នៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ