អង្គការការពារសិទ្ធិមនុស្ស ដាស់តឿនព្រមាន អ៊ុយក្រែន ពីការប្រើប្រាស់មីនប្រឆាំងមនុស្ស
មានភស្តុតាងជាក់ស្តែងបញ្ជាក់ថា កម្លាំងយោធាអ៊ុយក្រែន បានប្រើប្រាស់គ្រាប់មីនប្រឆាំងមនុស្ស ដែលជាប្រភេទមីនហាមឃាត់។ នេះបើតាមរបាយការណ៍ស៊ើបអង្កេត របស់អង្គការការពារសិទ្ធិមនុស្ស Human Rights Watch ដែលទើបតែទម្លាយចេញ ថ្ងៃទី៣១មករា ម្សិលមិញ។ អង្គការការពារសិទ្ធិមនុស្សដដែល បានបញ្ជាក់ថា កងទ័ពទាហានរុស្ស៊ី បានប្រើប្រាស់គ្រាប់មីននេះ តែ អ៊ុយក្រែន មិនត្រូវធ្វើត្រាប់តាម ដោយខុសច្បាប់នោះដែរ។
ចុះផ្សាយនៅថ្ងៃ៖
ស្តាប់ - ០២:៣២
មីនប្រឆាំងមនុស្ស នេះ គេហៅសាមញ្ញថា មីនមេអំបៅ គឺជាប្រភេទមីនត្រូវហាមឃាត់។ លោក Steve Goose ប្រធានផ្នែកទទួលបន្ទុកមីន របស់អង្គការ Human Rights Watch បានបញ្ជាក់ថា យោធាអ៊ុយក្រែន ទំនងជាបានប្រើប្រាស់មីនមេអំបៅ នៅក្នុងតំបន់អ៊ីហ្ស៊ូម Izioum ហើយ មីននេះ បង្កគ្រោះថ្នាក់ដល់ប្រជាពលរដ្ឋស៊ីវិល ហើយវានឹងនៅតែបន្តឲ្យរងគ្រោះទៅថ្ងៃមុខទៀត។
ទីក្រុង អ៊ីហ្ស៊ូម Izioum ត្រូវកម្លាំងទាហានអ៊ុយក្រែន ដណ្តើមពី រុស្ស៊ី បានមកវិញ នៅពាក់កណ្តាលខែកញ្ញា ឆ្នាំទៅមិញ។ អង្គការ Human Rights Watch ក៏បើកការស៊ើបអង្កេត នៅទីក្រុងនោះ នាចន្លោះថ្ងៃទី១៩កញ្ញា ដល់ទៅ៩តុលាឆ្នាំ២០២២។ ក្នុងពេលស៊ើបអង្កេត អង្គការសិទ្ធិមនុស្សមួយនេះ សាកសួរសាក្សីចំនួន ១០០ នាក់ និងកត់សម្គាល់ជនរងគ្រោះ១១នាក់។ ប៉ុន្តែ នៅពេលសាកសួរទៅផ្នែកសុខភាព គឺបានទិន្នន័យថា ជនស៊ីវិលយ៉ាងហោច៥០នាក់ មានកូនក្មេង៥នាក់ផង រងគ្រោះដោយគ្រាប់មីន ពីក្នុងពេលនិងក្រោយពេលដែល រុស្ស៊ី កាន់កាប់តំបន់នោះ។ អ្នកខ្លះ ដាច់ប្រអប់ជើង ខ្លះទៀតដាច់ជើងពាក់កណ្តាលតែម្តង។
ស្នងការអ៊ុយក្រែនទទួលបន្ទុកសិទ្ធិមនុស្ស Dmytro Luninets បានប្រកាសនៅក្នុងប្រព័ន្ធតេលេក្រាមថា អ៊ុយក្រែន ចូលជារដ្ឋសមាជិកសន្ធិសញ្ញាអន្តរជាតិ ស្តីពីការហាមឃាត់មិនប្រើប្រាស់គ្រាប់មីនប្រឆាំងមនុស្ស នៅឆ្នាំ១៩៩៧ ហើយ អ៊ុយក្រែន តែងទទួលយកការស៊ើបអង្កេតជានិច្ច។ បញ្ហាមីននេះបន្តកើតមានតាំងតែពីឆ្នាំ២០១៤មកម្ល៉េះ ក៏ព្រោះតែ អ៊ុយក្រែន ត្រូវប្រឈមមុខនឹងសត្រូវ ដែល សត្រូវនេះ ចង់បំផ្លាញប្រជាជនអ៊ុយក្រែន។ នេះជាសម្តីអ្នកតំណាងអ៊ុយក្រែន។
ផ្ទុយទៅវិញ របាយការណ៍ Human Rights Watch លើកហេតុផលថា ពុំមែនពីព្រោះតែទាហានរុស្ស៊ីប្រើមីននេះ ដូច្នេះ ទាហានអ៊ុយក្រែនត្រូវតែប្រើវាដែរទេ។ អង្គការការពារសិទ្ធិមនុស្សដដែល ក៏ស្នើឲ្យអាជ្ញាធរអ៊ុយក្រែនបើកការស៊ើបអង្កេតពីការប្រើប្រាស់និងដាក់មីននេះ ពីសំណាក់កងទ័ពអ៊ុយក្រែន ហើយនិងត្រូវកម្ទេចចោលចេញពីស្តុក។
អង្គការការពារសិទ្ធិមនុស្ស បានរំឭកថា នៅឆ្នាំ២០០៥ អ៊ុយក្រែន បានផ្តល់សច្ចាប័ន លើ សន្ធិសញ្ញាអន្តរជាតិ ស្តីពីការហាមឃាត់មិនប្រើប្រាស់គ្រាប់មីនប្រឆាំងមនុស្ស ។ កតិកាសញ្ញានេះ គេហៅថា កតិកាសញ្ញាទីក្រុងអូត្តាវ៉ា ដែលចូលជាធរមាន នៅឆ្នាំ១៩៩៩ និងប្រទេស១៦៤ ជារដ្ឋសមាជិក វៀរលែងតែ សហរដ្ឋអាមេរិក សហព័ន្ធរុស្សី និង មហាយក្សចិន គឺមិនព្រមផ្តល់សច្ចាប័នទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ