បារាំងផ្តល់កាំភ្លើងCeasarបន្ថែមដល់អ៊ុយក្រែន ចំណែកអ៊ីស្រាអែលចង់ឱ្យប្រព័ន្ធការពារដែនអាកាស
ក្នុងឱកាសទទួលស្វាគមន៍ដំណើរទស្សនកិច្ចជាលើកទីមួយរបស់រដ្ឋមន្ត្រីក្រសួងការពារជាតិអ៊ុយក្រែន នៅទីក្រុងប៉ារីស បារាំងបានប្រកាសផ្តល់កាំភ្លើងផ្លោងប្រភេទCeasar ចំនួន១២គ្រឿងបន្ថែមទៀតឱ្យក្រុងកៀវ។ ចំណែកខាងអ៊ីស្រាអែលវិញ លោកនាយករដ្ឋមន្ត្រីនេតាន់យ៉ាហ៊ូ បានអះអាងថាកំពុងពិចារណាផ្តល់ជំនួយយោធាមានអាទិ៍ប្រព័ន្ធការពារដែនអាកាសដល់អ៊ុយក្រែនដែរ។
ចុះផ្សាយនៅថ្ងៃ៖
ស្តាប់ - ០២:១៧
កាំភ្លើងផ្លោងCeasar១២គ្រឿង មានកាណុង ១៥៥មីល្លីម៉ែត្រ បាញ់បានចម្ងាយមធ្យម នឹងដឹកទៅដល់សមរភូមិអ៊ុយក្រែននៅប៉ុន្មានសប្តាហ៍ទៀតខាងមុខ។ នេះជាប្រសាសន៍របស់លោក Sabastien Lecornu រដ្ឋមន្ត្រីក្រសួងការពារជាតិបារាំង ក្នុងសន្និសីទកាសែតរួមជាមួយសមភាគីអ៊ុយក្រែនលោកOleksiï Reznikov ដែលអញ្ជើញមកបំពេញទស្សនកិច្ចនៅប្រទេសបារាំងជាលើកទីមួយ គិតចាប់តាំងពីផ្ទុះសង្គ្រាមនៅថ្ងៃ២៤កុម្ភៈ២០២២មក។
បើតាមលោករដ្ឋមន្ត្រីការពារជាតិបារាំង ពេលនេះអ៊ុយក្រែនមានកាំភ្លើងផ្លោងច្រើនសមល្មម ព្រោះបើបូកនឹងជំនួយថ្មីទៅ អ៊ុយក្រែនមានកាំភ្លើងផ្លោងCeasarសរុបដល់៤៩គ្រឿង ៖ ១៨គ្រឿងជាជំនួយរបស់បារាំងផ្តល់ឱ្យរួចហើយ និង១៩គ្រឿងសន្យាផ្តល់ដោយប្រទេសដាណឺម៉ាក កាលពីពីរសប្តាហ៍មុន។
ជាងនេះទៅទៀត បារាំងបានសន្យាជួយឧបត្ថម្ភប្រព័ន្ធ រ៉ាដា Ground Master200 ដែលអាចចាប់សញ្ញាយន្តហោះសត្រូវដល់២៥០គីឡូម៉ែត្រ ហើយអាចបាញ់កម្ចាត់បាននៅចម្ងាយ១០០គីឡូម៉ែត្រ នូវយានយន្តលើអាកាសហោះក្នុងល្បឿនយឺត និងក្នុងរយៈកម្ពស់ទាប ដូចយ៉ាងដ្រូន ឬយន្តហោះចម្បាំងហោះនៅទីខ្ពស់ខ្លាំង។ ប្រព័ន្ធរ៉ាដាបារាំងដែលអាចដឹកជញ្ជូនតាមឡានកាមីញ៉ុង ក៏អាចការពារកងកម្លាំងជើងគោក ពីគ្រាប់រ៉ុកកែត និងគ្រាប់កាំភ្លើងធំរបស់សត្រូវបានទៀត។ ជាចុងក្រោយ លោកLecornu បានបញ្ជាក់ថាបារាំងកំពុងពិភាក្សាជាមួយសម្ព័ន្ធមិត្តដើម្បីប្រមូលស្តុកមីស៊ីលCrotaleឱ្យបានគ្រប់គ្រាន់សម្រាប់ជួយអ៊ុយក្រែនទៀត។ ទាហានបារាំង១៥០នាក់នឹងបញ្ជូនទៅប៉ូឡូញដើម្បីជួយបំពាក់បំប៉នទាហានអ៊ុយក្រែន។
ក្រៅអំពីបារាំង អ៊ីស្រាអែលក៏គ្រោងផ្តល់ជំនួយយោធាដល់អ៊ុយក្រែនដែរ។ តាំងពីផ្ទុះសង្គ្រាមនៅអ៊ុយក្រែនមក ដើម្បីកុំឱ្យរង្គាសចិត្តរុស្ស៊ី អ៊ីស្រាអែលមិនដែលបញ្ជាក់ជំហរកាន់ជើងអ៊ុយក្រែនសោះ ប៉ុន្តែជាមួយនឹងសំណើសុំធ្វើអន្តរការីដោះស្រាយវិបត្តិអ៊ុយក្រែន-រុស្ស៊ី នៅថ្ងៃពុធទី១កុម្ភៈនេះ ក្នុងបទសម្ភាសន៍ជាមួយបណ្ដាញCNN នាយករដ្ឋមន្ត្រីអ៊ីស្រាអែលបានអះអាងថារដ្ឋាភិបាលរបស់លោកកំពុងពិចារណារឿងផ្តល់ជំនួយយោធាឱ្យអ៊ុយក្រែនដែរ។ បើតាមលោក នេតាន់យ៉ាហ៊ូ អ៊ីស្រាអែលចង់ឱ្យប្រព័ន្ធការពារដែនអាកាស។ ប្រសាសន៍របស់លោកនាយករដ្ឋមន្ត្រីអ៊ីស្រាអែល ធ្វើឡើងក្រោយពីដំណើរទស្សនកិច្ចរបស់លោករដ្ឋមន្ត្រីការបរទេសអាមេរិក អង់តូនី ប្លីងកិន នៅតំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ